Z wudaća: wutora, 23 apryla 2019

Jutry su dale najwažniši turistiski magnet Łužicy. Po tysacach sćěhowachu hosćo křižerske procesiony. Wjetšina dróhow regiona bě znajmjeńša nachwilnje zašlahana, štož wuskutkowa na wobjězdach pomału wlečace so kolony jězdźidłow. Samo na najschowanišim pućiku sy hdys a hdys busy widźał, z kotrymiž chcychu syły ludźi přichodny wjeršk sčasom docpěć. Byrnjež za Łužicu rjenje było, dźeń a wjace turistow přiwabić, wědu wo (a snano tež akceptancu za) Serbow šěrić a nic naposledk poselstwo zrowastanjenja wozjewić, ma nawal přiwšěm tež ćěmnu stronku. Jutry su přiběrajcy ryzy event. Njesměmy so tuž dźiwać, hdyž potom pasažěrojo mjeno­wanych busow w cyrkwi sedźo na swoje mobilne telefony sutaja. Wuhlad to snano na dobu, w kotrejž je so digitalizacija samo w božich domach přesadźiła a wšitcy město­ z Wosadnika/Spěwarskich z wobrazowki spěwaja. Ale je to woprawdźe w zmysle wunamakarja? Bosćan Nawka

Budyšin (CS/SN). Jaroslav Rudiš njemóže jenož ekscelentnje pisać, ale swoje teksty tež žiwje a lóštnje přednjesć. Tak bu poslednje zarjadowanje Łužiskeho literarneho dopołdnja w małkej žurli Budy­skeho Dźiwadła na hrodźe hišće woprawdźite dožiwjenje. Čěski awtor, kotryž je w namjeznym regio­nje Čěskeje a Zwjazko­weje republiki wotrostł, předstaji swoju nowu knihi „Winterbergs letzte Reise“, kotraž je w něm­skej rěči wušła. Přełožk do čěsćiny chce wón někomu druhemu přewostajić. Z knihu bě wón za literarne myto Lipšćanskich knižnych wikow nominowany, kotrež pak skónčnje dóstał njeje, štož pak je derje znjesł. „Wšako móža na Morawje a w Awstriskej poražku po­žiwać“, wón žortnje wuzběhny. Wo tym swědča drje stawizniske nazhonjenja. W srjedźišću swojeje kni­hi steji mjenujcy bitwa wo Hradec Králové w lěće 1866, kotruž stej Sakska a Awstriska zhromadnje přěhrałoj. Bitwa je w romanje wopřijeće za wšitke móžne wosobinske katastrofy. Stajnje zaso wopodstatnjeja jemu Awstričenjo, kelko zhromadnosćow su mjez Morawčanami a Awstričanami.

Njebjelčicy (SN/MiR). Njebjelčanski křižerski procesion ličeše lětsa 102 křižerjej, runje telko kaž loni. Wosadny farar Michał Nawka jich na puć do Wotrowa wužohnowaše. Mjez nimi běchu dwaj ze zelenym a třo ze slěbornym wěnčkom. „Smy z wotběhom procesiona jara spokojom“, rjekny kantor Jan Smoła. „Dźakowni smy wosebje mnohim pomocnikam, kotřiž steja nam křižerjam wob­stajnje při přihotach a w běhu njedźele poboku. K tomu słušeja ći, kotřiž wobchad rjaduja abo wsy wupyša.“ Tak je Pěske­čan křižerjow z awtom přewodźał a jich z pitnej wodu zastarał.
Wotrow (SN/MWj). Nad wulkotnym wjedrom smědźachu so Wotrowscy křižerjo hižo rano wjeselić, jako wokoło polow před Jaworu do połneho słónca jěchachu. Připołdnju je potom kapłan dr. Jens Buliš 114 křižerjow na jich puć do Njebjelčic wužohnował, dweju mjenje hač loni. Mjez nimi bě dejmantny jubilar Feliks­ Buk, kiž 60. raz sobu jěchaše. Dale wuhladachu syły přihladowarjow třoch slěbornych jubilarow a dweju nowačkow.

Wojerecy (SN/MWj). Łužiske naměsto we Wojerecach je wot dźensnišeho wulke twarnišćo. Městno před Łužiskej halu za do­hromady nimale 500 000 eurow saně­ruja, zdźěla tamniše měšćanske zarjadnistwo w nowinskej informaciji. Po cyłym naměsće chcedźa nowe betonowe platy skłasć a roły, po kotrychž dešćikowa woda wotběži, ponowić. Mjeztym zo změja betonowe platy wšelake šěre barby, wostanu plesternaki w nakromnych pasmach skerje ćmowožołte.

Na studni wosrjedź naměsta so lědma što změni. Wona tež wobstatk twarskeho projekta njeje. Trěbne pak su někotre přiměrjenja wysokosćow při wonkownym wobhrodźenju kwětkowych rabatow. To sobu zaruča, zo budźe naměsto tež přichodnje dospołnje bjez zadźěwkow přistupne. Tuchwilne móžnosće posydnjenja wostanu, kajkež su. To samsne płaći za wobswětlensku připrawu. Chcedźa pak nowe wotpadkowe sudobja nastajić, kaž w nowinskej zdźělence rěka. Dale w njej pisaja, zo njebudu štomy wokoło studnje zachować móc, dokelž dyrbja tež tam wysokosće přiměrić. Za to chcedźa štyri nowe štomy sadźić.

Budyšin. Přichodna wuměłska rozmołwa „tracTare“ wotměje so jutře, srjedu, we 18 hodź. w Budyskim hosćencu „Tiroler Stuben“ na Lessingowej. W srjedźišću steji kniha Křesćana Krawca „Sej statok stajili“. Zawod podataj dr. Christiana Pinjekowa a Jan Nuk. Rozmołwu nawjedować budźe prof. dr. Dietrich Šołta. Wšitcy zajimcy su wutrobnje přeprošeni.

Alkohol wina był

Trjebin. Zo tež z chorobnym stołom pod wliwom alkohola jězdźić njesměš, wě nětko 47lětny muž, kiž bě z tajkim pomocnym srědkom jutrowničku wječor na kolesowanskej šćežce mjez Trjebinom a Běłej Wodu po puću. Tam zajědźe wón najprjedy do přirowa a by so na to nimale na jězdnju dóstał. Přiwołanym zastojnikam napadny, zo bě wón po wšěm zdaću alkohol pił. Pola 47lětneho naměrichu 2,12 promilow alkohola w kreji.

Dźiwadźelnica Hanka Mikanowa wosomdźesaćiny swjećiła

Po cyłej Łužicy znata a woblubowana Hanka Mikanowa bě z ćěłom a dušu dźiwadźelnica. Sama je raz rjekła, zo bě je­j radosć runje tak kaž winowatosć, w serbskej rěči na jewišću skutkować. Wona zasłuža sej kaž lědma tamna wuměł­ča titul „ludowa hrajerka“, a to w nanajlěpšim zmysle. Trajne slědy zawo­staji pak tež za kulisami – hač jako nawodnica dźěćaceho respektiwnje lajske­ho cyłka abo jako rozhłosowa rěčni­ca. Ćichu sobotu, 20. apryla, je wona­ swoje 80. narodniny swjećiła.

Sokoł Ralbicy/Hórki

– HFC Jednota Wojerecy 3:0 (2:0)

Zestawa domjacych: Mjetaš-Wowčer – Brězan, Statnik, Matka, M. Žur, Jakubaš (41. Hrjehor), Zynda, Rychtar, Serbin, Brückner (20. Krawc), S. Žur (60. Obst)

Jako lońši wobdźělnik połfinala mě­jachu Ralbičenjo w prěnim kole swobodny los a dyrbjachu hakle w štwórć­finalu nastupić. Přećiwnik běše Jednota Woje­recy. Po sćoplenju pak so spěšnje wukopa, zo maja hosćo jednoho muža mjenje, dokelž je tučasnje dźewjeć hrajerjow zranjenych. Najebać to pak nastupichu.

Sportowi přećeljo Lotte

– FC Energija Choćebuz 0:3 (0:0)

Zestawa hosći: Spahić – Schneider (81. Kruse), Müller, Matuwila, Schlüter, Weidlich, Gjasula, Bohl, Hemmerich, Viteritti (77. Holthaus), Mamba (86. Geis­ler)

To bě na kóždy pad zasłužene wonkowne dobyće FC Energije Choćebuz w Osnabrückskim měšćanskim dźělu Lotte. Po prěnim połčasu, kotryž bě na woběmaj stronomaj bjez wulkich wjerškow, nasta w druhim jasna dominanca hosći. Skónčnje so Choćebuženjo tež z wrotami mytowachu. Najprjedy smo­kny Lasse Schüter wólny kop ze zdale­nosće 20 metrow do wrotow hosćićela (58.), tři mjeńšiny po tym suny Kevin Weidlich bul k 2:0 (61.) do klětki SC Lotte. Najrjeńše wrota dnja pak třěli Fabio Vi­­teritti. Třělwa zadyri do hornjeho tři­róžka k 3:0 (67.).

Tak móžeše Energija w měrje na wčerawši wukónc partije Uerdingen přećiwo Braunschweig čakać. Hosćo přesadźichu so tež z 3:0 a městnje w tabulce z FCE hišće­ raz změništej. Ze samsnej ličbu dypkow póńdźetej Braunschweig a Choćebuz nětko do přichodneho hrajneho dnja. Do Choćebuza přijědźe sobotu VfL Osnabrück. Georg Zielonkowski

Wuslědki a tabulka wólnočasneje koparskeje ligi Zapadołužiskeho koparskeho zwjazka

Hórnikecy/Ćisk – Bluń/Lubuš 2:1

Rakecy/Sćeńca – Hermsdorf 5:0

Hory – Kulow 1:4

Ralbicy – Aktiwist/Lok/Wojerecy 3:1

Aktiwist/Lok/Woj. – Rakecy/Šćeńca 2:5

Hermsdorf – Hórnikecy/Ćisk 0:4

1. HZ Rakecy/Sćeńca  4  14 : 5  9

2. Sokoł Ralbicy/Hórki  3  8 : 5  7

3. HZ Natwar Wojerecy/

Wětnica  2 10 : 1  6

4. HZ Hórnikecy/Ćisk 3 7 : 4  6

5. HZ Bluń/Lubuš  3  3 : 3  4

6. HFC Jednota Wojerecy  3  6 : 7  4

7. Módro-běli Kulow  2  5 : 4  3

8. LSV Hory  3  4 : 6  3

9. Hermsdorfske ST  3  3 : 12  1

10. HZ Aktiwist/Lok/

SC Wojerecy  4  6 : 19  0