Praha (ČŽ/K/SN). W stolicy Čěskeje republiki wotmě so wčera prawidłowny wjeršk statow Visegrádskeje štyrki (V 4). Wurjadny bě wón tónkróć z teje přičiny, zo su so po wuradźowanjach premierow krajow V 4 ministerscy prezidenća šěsć zapadobalkanskich statow na nim wobdźělili.
Čěski ministerski prezident Andrej Babiš jako hosćićel zarjadowanja wuradźowaše z pólskim kolegu Mateuszom Morawieckim, słowakskim kolegu Peterom Pelegrinijom a madźarskim kolegu Viktorom Orbánom. Na jednanjach dźěše hłownje wo europske naležnosće, wo přichodny budget Europskeje unije a nic naposledk wo migraciske prašenja.
Waršawa. Njewšědna spektakularna akcija wobswětoškitneje organizacije Greenpeace spočatk tydźenja w Gdańšćanskim přistawje je po cyłej Pólskej kaž tež mjezynarodnje wulku kedźbnosć zbudźiła. Zdobom je wona ludźom hladajo na wobchadźenje z wuhlom woči wotewrěła.
Wjace hač dwaceći aktiwistow Greenpeace bě wulku nakładnu łódź před přistawom ze swojimi čołmami blokowało, žadajo sej kónc zmilinjenja brunicy w Pólskej. Łódź transportowaše wuhlo z dalokeho Mosambika do Pólskeje. Policija je akciju namócnje skónčiła a aktiwistow zajała. Po tym zo běchu woni po něšto času zaso swobodni, zalězechu na krany přistawa a tomu zadźěwachu, zo dźěłaćerjo wuhlo z łódźe wukładuja.
Pólska zjawnosć so nětko praša, čehodla dyrbi kraj wuhlo z 15 000 kilometrow zdaleneho afriskeho kraja dowožować. Najwjetši dźěl ludźi bě sej dotal wěsty, zo kraj za milinarnje a tepjenje trěbne „čorne złoto“ sam wudobywa.
Praha (dpa/SN). Sławny čěski šlagrowy spěwar Karel Gott je na akutneho raka kreje schorjeł. To rjekny spěwar, kiž bě w juliju 80. narodniny woswjećił, nowinje Blesk. „Nochcych was ze swojimi problemami wobćežować“, piše Gott swojim přiwisnikam na Facebooku. Mustwo wodźacych fachowcow uniwersitneje chorownje so wo Gotta stara a jeho ambulantnje lěkuje. „Jězdźu prawidłownje na přepytowanje do chorownje.“ We wobłuku kontrolow tež nad cyłkownym strowotnym stawom Gotta stražuja.
Zo by spekulacijam zadźěwał, bě so Gott rozsudźił, zjawnosć wo swojim strowotnym stawje informować. Spěwar zdobom na bulwarne medije apeluje, priwatnu sferu jeho swójby respektować. „Wjeselu so, zo směm doma w kruhu swójby być“, Gott potwjerdźi. Wón bydli zhromadnje z mandźelskej Ivanu a młódšimaj dźowkomaj Charlottu Ellu a Nelly Sofie. Tuchwilu dźěła na swojej awtobiografiji, kotraž ma klětu wuńć.
Kónc julija je Gott dołho planowany koncert zahorjenja płucow dla wotprajić dyrbjał. Hižo před třomi lětami bě wuspěšny spěwar schorjenje raka přetrał.
Podobnje, kaž pozaby so nimale sto lět na namrěwstwo drje wot nikoho njedocpějomneho ženija Johanna Sebastiana Bacha, zaběra so hudźbny swět hakle zaso wot 1960tych lět minjeneho lětstotka z kompozitoriskim tworjenjom 1898 zemrěteje Clary Schumann. Dźensa spominamy na jeje 200. narodniny.
Znata wosta Clara Schumann jako wirtuozna pianistka, kotraž je swoje připosłucharstwo we wšěch tehdyšich europskich hudźbnych metropolach zahorjała. Druzy pak widźachu w njej bóle horco lubowanu mandźelsku Roberta Schumanna a widźachu w mandźelstwje perfektne partnerske zhromadźenstwo. Něhdźe 500 listow, kotrež wulku mjezsobnu lubosć wobswědčeja, je zdźeržanych.
Bórze so wona zaso do łužiskich domow dóstanje – Serbska protyka. A tak drje so wosebje lubowarjo šlagroweje nocy wjesela, dokal so aktualne wudaće měri, mjenujcy do Njeswačidła. Hornjołužiskej wsy z baroknym hrodom a sławnym parkom wěnuja so wšelacy awtorojo, kotrychž je hibićiwy redaktor Pětr Šołta zaso k pisanju pohnuć móhł.
Pjatk 13. do 15.9. Babylěćo w Ralbicach
Wjesny swjedźeń we Wotrowje
Sobotu 14. a 15.09. Turněr w konjacej dresurje w Holešowskej Dubrawce
Sobotu 14.9. Wohnjowoborny swjedźeń a dźeń wotewrjenych duri na Rakečanskim knježim dworje
9:00 Nazymske wiki we Łazu
19:30 Premjera hornjoserbskeje inscenacije NSLDź „Łapanje šefa“ w Haslowje
Njedźelu 15.9. Kermuša w Budyšinje
13:00 Nazymske wiki we Wjazońcy (Neukirch/Lausitz)
15:00 Kemušny kofej Grodkowskeje Domowinskeje skupiny a župy Delnja Łužica w Blunju
15:00 Hudźbne zarjadowanje z dujerskej kapału Horjany na Ćišćanskim Kasperec dožiwjenskim dworje
16:00 Koncert z tenorom Björnom Casapietru w Budyskim Serbskim muzeju
Srjedu 18.9. 10:00 Předstajenje Serbskeho dźěćaceho dźiwadła „Mały Muk“ w Budyskim Dźiwadle na hrodźe
19:00 Měrana Cušcyna, Róža Domašcyna a Měrka Mětowa čitaja ze swojeje knihi „Znaki pominaki kopolaki“ w Röhrmeisterowym domje Kamjenskeho Lessingoweho muzeja
njedźelu, hornjoserbsce
11:00 Łužica tutón tydźeń – mjez druhim wo premjerje NSLDź
11:20 Marja Grólmusec a jeje njeznate stronki
11:45 Matej a Jakub so wubědźujetaj
12:00 Nabožne wusyłanje
(dr. Hans-Friedrich Fischer)
po tym zbožopřeća
delnjoserbsce
12:30 Aktualny magacin – wo wotewrjenju wustajeńcy w Slepom a z předstajenjom kandidatow za serbsku radu
13:00 Wo projekće SMiLE
13:40 Nabožne wusyłanje
(Manfred Hermaš)
po tym gratulacije