Z wudaća: pjatk, 13 septembera 2019

Budyšin (SN). Šule w dwurěčnej Hornjej Łužicy trjebaja nuznje serbskorěčnych wučerjow. Na uniwersitach wukubłany dorost dawno hižo njedosaha. Z njedawno wotewrjenej Serbskej rěčnej šulu w Budyšinje chcetej kultusowe ministerstwo a Sakski krajny zarjad za šulu a kubłanje pomhać problem rozrisać. Kaž wučerjam poski­ćeja tam tež rěčne kursy sobudźěłaćerjam zarjadow. Wo tym rozprawjeja jutře, 14. septembra, w 11.45 hodź. we Wuhladku. Wćipni być móža přihladowarjo sćelaka MDR tohorunja na přinošk wo musicalu Worklečanskeje šule „Quo vadis – dokal dźeš?“, kotryž je minjene dny w Chróšćanskej hali „Jednota“ wulki wuspěch žnjał.

Na premjeru komedije

Haslow. Lubowarjo serbskorěčneje komedije su jutře, 14. septembra, w 19.30 hodź. k Bizoldecom w Haslowje na premjeru inscenacije NSLDź „Łapanje šefa“ přeprošeni. „Wšitko je prima, wšitko běži po planje, hač na to, zo su toho wopačneho popadnyli – koncernoweho šefa Ludwiga Stromppa wosobinsce, muža z najwyšeje hospodarskeje etaže.“ Tak rěka w krótkim wopisowanju komedije Thomasa Steinki, kotruž je Lubina Hajduk-Veljkovićowa přełožiła. Na jewišću wuhladamy Istvána Kobjelu, Annu-Mariju Brankačkec, Jana Mi­kana a Měrka Brankačka. Režiju na starosći ma Odette Bereska. Přichodne předstajenje budźe njedźelu, 22. septembra, w 17 hodź. w Sulšečanskim kulturnym domje.

Summer-ending-openair

Zahaja blidotenisowu sezonu

Blidotenisća 1. mustwa Viktorije Worklecy změja za­zběhowu dypkowu hru do noweje hrajneje doby jutře w 14 hodź. we Worklecach přećiwo Kubšicam. Póndźelu potom w Konjecach a Radworju za celuloidowym bulikom honja. W 19 hodź. wočakuja Konječenjo cyłk HZ Wětnica/Hola II. Poł hodźiny pozdźišo započnje so duel mjez Radworjom a Hornjej Hórku.

Nětko HoyWoj-cityjowy běh

Na 13. HoyWoj-cityjowym běhu jutře we Wojerecach budźe w 11 hodź. VBH-firmatlon, wot 13 hodź. wubědźuja so běharjo zakładnych šulow. Hłowny běh na čarje 10 km budźe w 16.15 hodź.

Irmscher a Stange přijědźetaj

Sportowemu towarstwu FSV Budissy Budyšin a sportowemu reporterej Hanspeterej Benadej je so zhromadnje poradźiło sej něhdyšeho narodneho trenarja koparskeje wubranki NDR Bernda Stangu zhromadnje z narodnym koparjom NDR Haraldom Irmscherom přeprosyć. Rozmołwny wječor budźe 7. winowca w Budyskim hotelu AKZENT na Wjelećanskej 32. Započatk je za 18.30 hodź. planowany. Zastupny lisćik płaći šěsć eurow­, w předpředani pjeć.

Kónctydźenska kopańca

14.09. 14:00 Jednota Kamjenc –

  LSV Nowe Město

Jedyn z wjerškow na Ralbičanskim babylěću budźe sobotu wječor w něhdźe dwuhodźinskim programje wustup skupiny „Rockowe­ brody“. Wjeselić móža so přihladowarjo zbliska a zdaloka nimo znatych coverowanych spěwow tež na cyle nowy serbski­ hit, kotryž su sej „brodačojo“ po přikładźe karnewala za swjedźeń wumyslili. Foto: SN/Maćij Bulank

Jako poslednja we wobłuku zarjadniskeho zwjazka Při Klóšterskej wodźe je so wčera wječor w Róžeńće lětsa w meji nowowu­zwolena gmejnska rada Ralbicy-Róžant skonstituowała.

W Lejnje prawidłownje přespěšnych šoferow lepja

Budyšin (SN/mwe). Nimo stacionarnych błyskačow kaž w Chelnje abo Ćisku su přistajeni a specialisća Budyskeho krajnoradneho zarjada po puću, zo bychu z wosebje wuhotowanym awtom tež na wsach prawidłownje spěšnosć kontrolowali. To so tež wudani, dokelž mnozy wodźerjo awtow do „paslow“ zajědu, a krajnoradny zarjad ma z toho wob lěto tójšto přidatnych dochodow. Mnozy šoferojo pak na tym dwěluja, hač přeco na prawym městnje błyskaja, hdźež hrozy pěškam a kolesowarjam woprawdźe tež strach wobchada dla. W Starej Cyhelnicy na přikład steješe mobilny błyskač 29. julija dopołdnja při wosebje zarjadowanym twarnišću za kładźenje syće. Hdźež je hewak spěšnosć 50 kilometrow na hodźinu dowolena, bě wona tam wěsty čas na 30 km/h wobmjezowana.

Wotrow (SN). Na swojim konstituowacym posedźenju wutworichu we Wotrowje srjedu nowu wjesnu radu. Wjesny předstejićel je nětko Tobias Škoda, jeho naměstnik Marcel Rjeda. Kaž wjesnjanosta gmejny Pančicy-Kukow Markus Kreuz (CDU) zdźěli, dotalny Wotrowski wjesny předstejićel Měrko Pohonč a jeho naměstnik Stefan Weclich gremijej hižo njepřisłušataj. Dojednali běchu so na to we wzajomnej přezjednosći.

Šulerska wustajeńca na hrodźe

Wojerecy (SN). „Kuzło zelow“ rěka wustajeńca šulerskich dźěłow, kotraž je hač do 22. septembra w foyeru Wojerowskeho hrodu přistupna. We wobłuku projektoweho tydźenja bě so 13 holcow a hólcow w starobje sydom do jědnaće lět hromadźe z Wojerowskim młodźinskim domom „Ossi“ a Wojerowskim měšćanskim muzejom zelam wěnowało. Kotre zela na łužiskich łukach rostu, to a tójšto wjace zajimcy we wustajeńcy zhonja.

Centrum seniorow wita hosći

Pod wliwom medikamentow jěła

Budyšin. Starosćiwi wobydlerjo informowachu dźensa w nocy policiju, zo běchu na awtodróze pola Hornjeho Wujězda njewobswětleny Opel z Budyskim čisłom wobkedźbowali. Tam jědźeše awto ze směra Drježdźan do Zhorjelca w kwaklatej liniji. Patrulja awtodróhoweje policije zwěsći na to 63lětnu wodźerku Corsy, kotraž bě sylne medikamenty brała.

W měsće do awtow kopałoj

Wojerecy. Předwčerawšim wječor staj mužej w starobje 27 a 28 lět w starym měsće Wojerec randalěrowałoj. Na Hasy Clary Zetkin kopaštaj do wotstajenych awtow, mjetaštaj bleški na nje a pjerještaj samo ze železnym rjećazom do nich. Patrulja Wojerowskeho policajskeho rewěra wza jeju sobu na rewěr. Wěcna škoda wučinja dohromady něhdźe 20 000 eurow.

Impresije z XIII. mjezynarodneje dźěłarnički rězbarjow při Miłočanskej skale

Willi Selmer z delnjołužiskeho Łaza bě mjez lětušimi debitantami při skale.

Tu a tam mamy we Łužicy městna, hdźež wotwěra so nam wokno do swěta snadnje zwonka toho, štož hodźało so jako wšědny dźeń wopisować. Tajke wuhladko zmóžnja wid na Łužicu, kajkaž móže wona tež być: graciozna, trochu dźiwnuška, přećelna a njenapjata, tolerantna, fantaziju pohonjowaca. Jedne tajke městno je areal towarstwa Kamjenjak při bywšej Miłočanskej skale.

Nad łučnym dólčkom Jawory w najjužnišim kónčku Njebjelčanskeje gmejny je wot lěta 2001 wosebita zahroda nastała. Tehdy kupi gmejna skału kaž tež jej přisłušace wokolne ležownosće. Běchu tež druzy zajimcy, kiž planowachu spediciju abo deponiju w zornowcowej dźěrje. Město­ toho maja tam nětko małe nurjenske towarstwo, płoninu za permakulturu a lěto wob lěto rozrostowacu kulisu rězbarskich wudźěłkow, kotrež so podłu pućow a šćežkow a druhdy tež zboka nich widej wopytowarja wotkrywaja (a kotrež móžeš tež kupić).

Towarstwo wjesnych žonow so čestnohamtsce angažuje a město Budyšin za swjedźenje wupyša

Z lubosću a wulkej prócu wija čłonki towarstwa wjesnych žonow pletwy hałžkow, pyšene z pisanymi kwětkami a zelemi, za lětuši Budyski staroměšćanski festiwal. Žony maja rozwalinu mnišeje cyrkwje wuhotować. Wotwažuja tuž, kelko metrow girlandy je trěbnych, a dojednaja so skónčnje na to dwě pjećmetrowskej a jednu dźesaćmetrowsku nawić. Hałžki za to maja ze swójskich zahrodow. A tak pletu meter wob meter najwšelakoriše družiny hałžkow a debja je přidatnje z pisanymi kćenjemi kwětkow. Kajke to sprócniwe dźěło, kotrež wone čestnohamtsce wukonjeja a tak město Budyšin podpěruja. Tak wobkruća mi to předsydka towarstwa wjesnych žonow wokoło sprjewineho města Hella Helm z Jitka.