Z wudaća: srjeda, 16 oktobera 2019

Benjamin Robel je ratar z ćěłom a dušu. Tuž podpěra młody pomocliwy muž z Krynhelec (Kringelsdorf) swojeho dźěda w Dyrbachu (Dürrbach) rady. Tuchwilu wšak je čas žnjow praweje abo wódneje rěpy. Rostlinu plahuja w małym ratarskim zawodźe poprawom k zastaranju nuklow. Přiwšěm pak naprašowanje za zeleninu dale přiběra. Tak je so prawa rěpa wot jědźe za chudych k delikatesy wuwiła, předewšěm mnohich witaminow dla. Najlěpje wotbywaja Robelecy swoje wódne rěpy hižo wjacore lěta na nazymskich­ a rybarskich wikach po wšej Łužicy. Foto: Joachim Rjela

W Chrósćicach maja dotalne nazhonjenja płody njesć.

Chrósćicy (JK/SN). Radźićelam Chróšćanskeje gmejnskeje rady su bytostne znamjenja našeje krajiny chětro wažne. To wujewi na minjenym wuradźowanju rady diskusija wo přeměstnjowanju swjatych křižow. Pozadk bě informacija pomnikoškitneho zarjada, zo bě priwatnik křiž na swojej ležownosći přeměstnić dał (SN rozprawjachu), štož bě rozbudźenosć wuwabiło, wšako bě komuna wo tym hakle wot zarjada zhoniła, kaž wjesnjanosta Marko Kliman (CDU) wuswětli.

Gmejna Hamor wobstara wšěm aktiwnym nowu drastu

Hamor (AK/SN). Hamorska gmejna inwestuje sylnje do swojich wjesnych wohnjowych woborow. Tak dóstanu wšitcy něhdźe 200 aktiwnych kameradow nowu zasadźensku drastu. To je zawčerawšim tamniša gmejnska rada jednohłósnje wobzamknyła. Zdobom přepoda parlament nadawk trěbnu drastu wobstarać fachowej firmje Genius Development & Sales Alexandera Lohfa w Lützenje pola Lipska. Cyłkowna suma za nakup drasty wučinja 257 000 eurow. Z toho ma gmejna 103 000 eurow sama nałožić, zbywace 154 000 eurow přida wokrjes Zhorjelc. Nadawk bě po wšej Europje wupisany był. Lipšćanska firma bě najlěpši poskitk a přeswědčace referency minjenych třoch lět přepołožiła. W jednotliwych dypkach wopřijima nadawk wobornikam wobstarać nowe cholowy, kapy a rukajcy.

„Štyri lěta so mjeztym intensiwnje z tejele temu zaběramy“, wuswětli nawoda hłowneho zarjada gmejny Arian Leffs. „Smy dołho z wokrjesom jednali. Zarjad za wohnjowy a katastrofowy škit wudawki nětko ze 60 procentami spěchuje.“ Wosebita dźěłowa skupina je drastu wupytała a intensiwnje testowała.

Nimale 170 wobsedźerjow a šoferow starych motorowych kolesow zličichu zarjadowarjo na njedawnym 15. zetkanju za kolesa z pomocnymi motorami, tak mjenowanymi MAWjemi w Bjezdowach (Klein Partwitz) při Parcowskim jězorje. Zarjadowanje steješe pod hesłom „Na MAWju wokoło łužiskich jězorow“. Najdlěši puć do Łužicy měješe wobdźělnik z Hessenskeje. Najstarše pokazane motorizowane kolesa běchu z 30tych lět minjeneho lětstotka. Wjeršk zetkanja bě zhromadna kołojězba wšitkich wobdźělnikow wokoło bliskich jězorow. Ale tež po tym podawachu so jednotliwcy rady hišće raz pak na 25- abo 50kilometrowsku čaru. Foto: Gernot Menzel

Worklecy (AN/SN). Wosebity, ale tola trochu njewšědny wopyt mějachu šulerjo 3. a 4. lětnika Worklečanskeje zakładneje šule „Michał Hórnik“ na poslednim šulskim dnju do nazymskich prózdnin. Do šule bě mjenujcy tak mjenowany „Wuměłstwowy bus“ Drježdźanskich Statnych wuměłstwowych zběrkow přijěł.

Studentka Christine Jakob bě sej z nim tón dźeń sobu do Łužicy dojěła. Wona rozkładowaše dźěćom trajnu, stajnje zaso měnjacu so twórbu němskeje wuměłče w busu. Při tym jedna so wo wosebitu platu z napisom, do kotrejež móžachu šulerjo a šulerki tak mjenowane „scoubidou-bančiki“ tykać abo dalše zaso wućahnyć. Tak twórbu njepřestawajcy aktiwnje sobu měnjachu. Dale nańdźechu dźěći w busu naprawu, z kotrejž hodźi so wosebity barbojty ješć produkować. Z nim wuměłča nowe wuměłstwowe wudźěłki stwori.

Jako wjeršk projekta smědźachu so šulerjo a šulerki sami we wuměłstwowym tworjenju pospytać. Za to smědźachu tež nastroj k zhotowjenju wonych mydliznowych pucherjow wužiwać. Z nimi dujachu pak čornu, módru abo běłu barbu na wulke łopjena, při čimž nastachu woprawdźe krasne twórby.

Budyšin (SN). Za šulerjow ma Budyski Serbski muzej w nazymskich prózdninach wosebitej poskitkaj. Jedyn steji pod hesłom „Złota nazyma – rjana pyšerka“. Z łopješkow a z barbami stworja sej zajimcy nazymski wobraz, kołkuja abo pomoluja karty a twarja mobile. Za to měli prasowane lisćowe łopjena sobu přinjesć. Poskitk budźe 17. a 22. oktobra stajnje wot 10 do 11.30 hodź. Přidatne wudawki wučinjeja­ euro. Při dalšim poskitku 24. oktobra wot 10 do 12 hodź. steji serbski street style w srjedźišću. Tak wobhladaja sej wobdźělnicy tuchwilnu wustajeńcu mody ze serbskimi elementami. Přizamknje so mała dźěłarnička, hdźež naćisnu a pasla sami serbsku modernu drastu a debjenki abo kołkuja łužiske mustry. Wuslědki móža sej sobu domoj wzać. Za přidatne wudawki zběraja dwaj euraj. Muzej prosy wo při­zjewjenje pod telefonowym čisłom 03591/ 270 870 11.

Změnjene wotewrjenske časy

NDRske mopedy požadane

Eckartsberg/Rózbork. Chětro požadane su mjez paduchami tuchwilu zaso raz NDRske mopedy typa Simson. Tón zaćišć znajmjeńša zbudźa wčerawša nowinarska zdźělenka policije. Tam mjenujcy rěka, zo su njeznaći hnydom dwaj tajkej mopedaj spakosćili. W Eckartsbergu w gmejnje Mittelherwigsdorf pola Žitawy su so paduši w nocy na póndźelu do garaže zadobyli a S 50 sobu wzali. Moped měješe hódnotu něhdźe 1 500 eurow.

Tohorunja w Rózborku (Rothenburg) su njeznaći Simson typa S 51 w nocy na póndźelu z garaže pokradnyli. Tež tón měješe hódnotu něhdźe 1 500 eurow. Na woběmaj městnomaj su policisća wjacore slědy zawěsćić móhli. Dalše slědźenja za pokradnjenymaj Simsonomaj je mjeztym kriminalna policija přewzała.

Předstaja dwurěčnu čitanku

Rakecy. Na premjeru z wudawaćelom Markom Grojlichom a jeho nowej dwurěčnej čitanku „A srjedźa Kaponica – Mittendrin der Hahneberg“ přeprošuja Ludowe nakładnistwo Domowina, Rakečanska bjesada a Domowinska skupina Komorow/Trupin/Rakecy wšitkich zajimcow pjatk, 18. oktobra, do Rakečanskeje farskeje bróžnje. Wot 15.30 hodź. poskićeja tam kofej a tykanc, w 16 hodź. nowu publikaciju předstaja. Po čitanju móža sej hosćo knihu na městnje kupić a sej ju wot wudawaćela signować dać.

Předpředań zahajena

Malešecy. Župa „Jan Arnošt Smoler“ Budyšin a Załožba za serbski lud přeprošatej zhromadnje 2. nowembra na nazymski koncert do Malešanskeho hosćenca „Wódny muž“. Program wuhotuja Serbski folklorny ansambl Wudwor kaž tež skupinje Přezpólni a Brankatschki. Zastupne lisćiki předawaja wot wčerawšeho w předpředani za wosom eurow w Budyskej Serbskej kulturnej informaciji, pola Hendrichec w Barće kaž tež w kupnicy Bärbel’s Einkaufseck w Malešecach.

Na wulki bal