Z wudaća: srjeda, 19 februara 2020

Njebjelčicy. Štóž chce serbske jutrowne jejka debić nawuknyć, móže to 29. februara a 1. měrca stajnje wot 14 hodź. w Njebjelčanskim gmejnskim centrumje z Marju Šefrichowej. Za barby, pjerka a wósk zapłaća wobdźělnicy sydom eurow­ (dźěći 3,50 eurow). Wudute jeja měli sej sobu přinjesć. Zajimcy njech přizje­wja so pod telefonowym čisłom 0 35 78 / 30 18 04 (wot 18 hodź.).

Zaso na Žitnych wikach

Budyšin. Techniskich njedostatkow dla wotměwachu minjene tydźenje štwórtkowne měšane wiki na Budyskim Hłownym torhošću. Mjeztym je na Žitnych wikach­ wšitko sporjedźane, tak zo móža wikowarjo wot jutřišeho zaso čerstwe žiwi­dła, domjacnostne wudźěłki a wšitko dalše na naměsće pod Bohatej wěžu poskićeć. Tak mjenowane zelene wiki wutoru a sobotu su dale na Hłownym torhošću před radnicu.

Wólby maja tež konsekwency na zestawu gmejnskeje rady

Radwor (SN/BŠe). Wólby noweho wjesnjanosty běchu tema wčerawšeje gmejnskeje rady w Radworju. Hišće hač do 21. apryla amtěrowacy wjesnjanosta Wincenc Baberška (CDU) gratulowaše wuzwolenej naslědnicy Madeleine Rentsch, kritizowaše pak zdobom wozjewjenja měnjenjow w medijach, měrjace so předewšěm na to, zo je němskorěčna kandidatka najwjac hłosow w Radworju dóstała. „Ludźo měli jej najprjedy šansu dać, prjedy hač ju nadběhuja“, Baberška wu­zběhny. Wón připowědźi Madeleinje Rentsch rjap skrućić a ju na nowy nadawk derje přihotować. Nimo toho je so tež wobydlerka jara emocionalnje wuprajiła, měnjo zo su sej Serbja ze swojimi wuprajenjemi sami ško­d­źe­li. Gmejnski radźićel Jovan Hrjehor, jedyn­ ze štyrjoch kandidatow wo zastojnstwo wjesnjanosty, je z wólbneho wuslědka konsekwency sćahnył a chce swoje dźěło w gmejnskej radźe złožić. Přichodnje budźe so zaso stoprocentnje na swoje předewzaće koncentrować, štož je sobudźěłaćerjam dołžny. Wšako woni dołho njewědźachu, hač zawod dale wobsteji.

Z bywšeje Worklečanskeje předawarnje ma dnjowa hladarnja nastać

Hač do kónca lěta 2017 je Wałdźic rěz­nistwo w swojim Worklečanskim předawanišću wobydlerjow z tworami wšědneje potrjeby zastarowało. Bě to zdobom kaž wjesne zetkanišćo, hdźež su wjacore lěta samo wulce kermušowali a dalše swjedźenje wotměwali. Mjeztym twarjenje dwě lěće prózdne steji, jenož napisy na fasadźe wo zašłych lěpšich časach swědča. Ale do bywšeje předawarnje ma bórze zaso žiwjenje zaćahnyć. Hdźež su něhdy kołbasu, butru a muku předawali, nastanje hač do klětušeho dnjowe hla­danje za staršich ludźi.

FC Energija Choćebuz

– 1. FC Lok Lipsk 2:2 (0:2)

Zestawa domjacych: Stahl – Fl. Brügmann, Müller, Koch, Borgmann, Eisenhuth, Erlbeck (46. Pelivan), Rangelow, Geisler (45. Taz), Broschinski, Fe. Brügmann

Rekordna kulisa nimale 10 000 wopytowarjow dožiwi hru daloko nad niwowom štwórteje ligi. W prěnim połčasu postajachu hosćo ze swojej pasowej hru scenarij, tak zo bě nawjedowanje 2:0 (9./19.) dospołnje zasłužene. Energija njemóžeše ničo znapřećiwić, dokelž pobrachowachu jej sylnosć w dwubojach, sebjewědomje a tempo.

Zymski čas w kopańcy woznamjenja čas změnow. Tež na polu serbskeje ko­pań­cy so tuchwilu tójšto hiba. Tak přihotuja so koparjo na druhu połseriju, na tamnej stronje pak so tež za kulisami w serbskich towarstwach něštožkuli stawa. Štó kotre mustwo wopušći a kotry­ hrajer so hdźe zaso přizamknje, wo tym­ rozprawja Clemens Šmit.

Sokoł Ralbicy/Hórki: Trenar Sokoła Chrystof Gloxyn móže wot januara z Tomašom Bejmu planować, kiž so wot Rakečanskeho ST nawróći.

ST Marijina hwězda: Nowi hrajerjo so tam­ předstajili njejsu, za to su wjacori po zranjenju zaso wustrowjeni, mjez druhim Paul Schmidt a Oskar Hawš. Nastu­pajo wotchady je nas ze stron klóšter­skich koparjow jeničce powěsć docpěła, zo wrotar Fabian Hejduška towarstwo wopušći.