Z wudaća: pjatk, 20 měrca 2020

Datumy hižo žane njemjenuja

Zapadołužiski kaž tež Sakski koparski zwjazk nětko hižo žane datumy njemjenujetej, hdy hodźała so zaso kopańca hrać. Najprjedy raz su wšitke dypkowe partije wotprajene.

Snano tola po jutrach hraja

Žónske koparske cyłki Zapadołužiskeho koparskeho zwjazka a Hornjołužiskeho koparskeho zwjazka chcedźa po jutrach zhromadnje tak mjenowane wuchodosakske mišterske koło přewjesć. Stajnje najlěpšej cyłkaj wobeju staflow nastupitej potom dwójce přećiwo sebi tak, zo nastanje šěsć hrajnych dnjow. Tež dalše mustwa zhromadnje dale hraja. Wot sezony 2020/2021 ma potom mjez koparskimaj zwjazkomaj hrajna unija z jenož jednej staflu nastać.

Město witanja so rozžohnować

Wólnočasni wolejbulisća Mustwa 1296 su za wutoru, 24. měrca, planowany wólnočasny turněr „Witamy nalěćo“ přesunyli. Nowy hrajny termin cyłk wokoło kapitana Marka Dźisławka hišće nima. Poprawne mjeno turněra pak budźe na kóždy pad změnjene, a to na „Rozžohnujemy so z wirusom“.

Dumpery chcedźa startować

Dopominaće so hišće na swój prěni dowol w krajach, wo kotrychž běšće lěta dołho jenož sonili? Snano sće pod palmami leželi, na sankach po wěčnym lodźe jěli abo sej metropole z nadměru wysokeje wěže wobhladali? Rady bychmy wo tym wědźeli. Chcemy z fotami wo dalokim swěće w Serbskich Nowinach na to dopominać, zo je tomu mjeztym 30 lět, zo smy skónčnje móhli tež za mjezu NDR pućować. Sćelće nam do redakcije motiw ze swojeho prěnjeho dowola na zapadźe Němskeje, w Španiskej, Norwegskej, Francoskej atd. Krótka informacija wo tym, hdźe sće přebywali, dopomnjenku skulojći. Milenka Rječcyna

Hač do 19. apryla wostanje Budyska Smolerjec kniharnja zawrjena. To žada sej škit před coronawirusom. Byrnjež kniharnja zawrjena była, móža sej zajimcy dale knihi, słuchoknihi, hudźbne cejdejki a wideja w LND kupić. Skazać móža je pak internetnje pod www.domowina-verlag.de, wšědnje wot 10 do 17 hodź. telefonisce pod 03591/577 288 abo z faksom na 03591/577 289 kaž tež z mejlku na . Sobudźěłaćerjo kniharnje, mjez nimi Annett Šołćic, was rady poradźuja. Hač do19. apryla LND skazanu tworu bjezpłatnje dodawa. Foto: SN/Hanka Šěnec

Zarjadowanja žane njejsu!

Coronapandemije dla njemóžemy tuchwilu žane zarjadowanja připowědźić. Wšako su statne instancy wšitkežkuli zjawne zetkanja zakazali! Tak su mjeztym nimale wšitke zarjadowanja hač do znajmjeńša 9. apryla, někotre samo hač do 19. apryla, wotprajene. Hač SLA, NSLDź, Wojerowska Łužiska hala abo Čornochołmčanski Krabatowy młyn, wšudźe pod aktualnej situaciju ćerpja. Tak namołwjamy tež my sobudźěłaćerjo a sobudźěłaćerki redak­cije Serbskich ­Nowin wšitkich čitarjow a wšitke čitarki našeho wječornika, po předpisach zarjadow so měć, doma wostać a so socialnych zwiskow wzdać, byrnjež to tomu abo tamnemu ćežko było. Čim lěpje rozpřestrěwanju wirusa za­dźěwamy, ćim prjedy móžemy so zaso zetkawać.

Wodorunje: 3 dojutrowny čas, 5 podwólny słužownik, 6 bóh lubosće, 7 rubježnik na morju, 10 dołhi sylny kadla, 13 nalětni měsac, 14 twjerda twaršćizna, 15 hłuboka dźěra

Padorunje: 1 modernje: špatny wuslědk, 2 rěka w Smolinach, přitok rěki Aller, 3 dźěl nohi, 4 njewjesta ptačeho kwasa, 8 myslička, 9 kopar FC Bayern, 11 grjekski pismik, 12 roman Zole

Tydźenske wiki w městach kaž w Kulowje, Wojerecach a Kamjencu, słuža zastaranju ludnosće. Tuž wotměja so tajke wiki na Budyskim Hłownym torhošću stajnje wutoru a sobotu a na Žitnych wikach kóždy štwórtk.

Budyšin (SN/MiR). W běhu zašłych dnjow mějachu wikowarjo přeco zaso na prašenja kupcow wotmołwić, hač so wiki dale wotměja. Nětko je dóšła wotpowědna informacija z boka Budyskeho měšćanskeho zarjada. Wiki so dale wotměja, tež hdyž nic wobstajnje po zwučenym wašnju.

Čerstwe twory tam wikowarjo z regiona dale poskićuja. Mjez nimi su handlerjo, kotřiž wotewzaja swoje čerstwe produkty, wosebje sad a zeleninu wot Žitawskich hór hač k błótowskim groblam a tež njedaloko pólsko-němskeje mjezy. Hač na dalše so tydźenske wiki štwórtk jenož hišće za poskićowarjow žiwidłow wotměja. Tuž měšany sortiment kaž drastu, domjace twory a dalše hižo njezměja. Pozadk rozsuda je powšitkowne postajenje sakskeho statneho ministerstwa za socialne a towaršnostnu zhromadnosć wot 18. měrca 2020.

Coronawirus trjechi nětko wosebje najsłabšich našeje towaršnosće

Wojerecy (SiR/SN). We Wojerecach a Habrachćicach su předawanišća tafle za­wrjene, we Łutach dotal hišće nic. We Wojerowskim „Domje zetkawanja“, kotryž je w nošerstwje towarstwa „Zjednajomnosć powołanja a swójby spěchować“ je połoženje wosebje ćežke. Dom z poliwkowej kuchnju, taflu a dalšimi wobłukami kaž dźěłarnju za meble a šiće na Ulricha von Huttenowej 31–33 je wot 18. měrca zawrjeny. „Orientujemy so tak na zasadne předpisy zwjazkoweho knježerstwa a Swobodneho stata Sakskeje“, zdźěla nawodnica zarjadnišća Madlen Krenz. Mnohim wužiwarjam tafle je to wulke wužadanje, kaž wona potwjerdźa: „Tafla njeběše a njeje tež bjez coronawirusa za to myslena chłódźaki a składy potrěbnych pjelnić. Podpěrujemy a wudospołnjamy jeničce wšědnu potrjebu na žiwidłach, a móžemy našim kupcam jenož to dać, štož darićeljo, kaž wulkopředawanišća, taflam darja.“

Pančicy-Kukow (SN/MiR). Hižo tydźenje do poprawneho podawka so lubowarjo pućowanja po cyłej Sakskej na nalětni wjeršk hotuja – tež lětsa. Za akciju „Nalětnje pućowanja“, wot apryla hač do junija planowanu, bě hižo wjace hač 330 turow přizjewjenych. Wot 3. apryla hač do 19. apryla bě 65 zarjadowanjow předwidźanych. „Kaž pak smy zhonili, pućowanja w mjenowanym času coronawirusa dla njebudu“, zdźěli rěčnik Křesćansko-socialneho kubłanskeho skutka Miłoćicy Maik Brězan. „Naše dźěćace dnjowe přebywanišća su wobstajnje do projekta bywšeho sakskeho ministerstwa za ratarstwo a wobswět zapřijate. Hač lětsa pućujemy, njeje tuž docyła jasne.“

Kolesa chětro požadane

Ćisk/Wojerecy. Kolesa su tuchwilu najskerje mjez paduchami chětro woblubowane. Kaž policija zdźěla, dósta wona tón tydźeń wjace přizjewjenjow padustwow kolesow hač hewak. Tak běchu so njeznaći wutoru w Ćisku namócnje do kólnje zadobyli a wottam hnydom dwě drohej ­kolesy marki Cube Nature Pro a Pegasus sobu wzali. Hódnotu rubizny trochuje policija na nimale 1 200 eurow.

We Wojerecach su so paduši srjedu do pincy wjaceswójbneho domu na Šepšečanskej dróze zadobyli. Tam spakosćichu tohorunja dwě kolesy w hódnoće něhdźe 840 eurow. Paduši pak mějachu so tam jara lochko, dokelž njebě pinca zamknjena. Za wšitkimi štyrjomi kolesami policija nětko mjezynarodnje pyta.

Budyšin (JKf/SN/MiR). Na wupisanje stipendijow za intensiwny kurs čěšćiny w Čěskej je dźesać zajimcow reagowało, kaž Rěčny centrum WITAJ zdźěla. Tak móža so štyri wosoby na Lětnjej šuli ­Karloweje uniwersity w Praze wobdźělić a jedna na kursu Južnočěskeje uniwersity w Českich Budějovicach. Runje tak wulku ličbu požadarjow je RCW čěskemu ministerstwu za kubłanje, młodźinu a sport za narunanskich kandidatow doporučiło. Porno lětam, hdźež bě mjenje zajimcow, je ličba požadarjow přiběrała. Wšako dyrbješe RCW druhdy tež dlěje za młodostnymi pytać, kotřiž chcyli čěšćinu wuknyć a sej susodny kraj z ludźimi ze wšeho swěta wotkryć.