Z wudaća: srjeda, 08 apryla 2020

Tež w tuchwilnym napjatym času gmejnski zarjad dale dźěła

Njeswačidło (JK/SN). Zarjadniske dźěło w gmejnach tež w krizowym času njewotpočuje. Gmejnske nadawki a winowatosće dyrbja dźě dale spjelnjene być, tak tež w Njeswačanskej gmejnje. Kaž tamniši wjesnjanosta Gerd Schuster (CDU) na naprašowanje SN zdźěli, dźěłaja w zarjadni­stwje tučasnje z dwěmaj mustwomaj a tak wotpowědnje strowotniskim žadanjam dźěłakmanosć zaručeja. Mustwje so wšědnje wotměnjatej, a wotewrjeny je gmejnski zarjad nětko wšědnje hač do 16 hodź. Tak je zarjadnistwo nimale přez cyły tydźeń wjesnjanam přistupne, při čimž tam wězo trěbne naprawy hygieny wobkedźbuja.

Drježdźany. Priwatne domjacnosće, w kotrychž su z koronawirusom inficěrowane wosoby w karantenje, njeměli swoje wotpadki dźělić. Kaž sakske ministerstwo za wobswět a ratarstwo zdźěli, měli so w tym času tež zapakowanske a biowotpadki w karantenowej domjacnosći do čorneho wotpadkoweho sudobja mjetać, nic pak papjera a škleńca, elektrošrót a baterije. To ma tych ludźi škitać, kotřiž wotpadki wotwožuja, ale tež susodow a domownikow. Dale měli potrjecheni na to dźiwać, zo su jich wotpadki w krutych wotpadkowych titach abo měchach a zo na přikład papjerjane nósniki jednotliwje do wotpadkoweho sudobja njemjetaja.

Poradźuja telefonisce

Budyšin. W času zawrjenych šulow a pěstowarnjow poskića Hornjołužiski zwjazk Carity telefoniske poradźowanje w swójbnych prašenjach. Pod telefonowym čisłom 03591/ 498 220 móža sej zajimcy pomhać dać, trjebaja-li někajku pomoc w kubłanskich naležnosćach, hdyž je w partnerstwje kriza nastała, hdyž su pokiwy za dźěćace zaběry trěbne, abo maja-li pjenježne prašenja.

Serbske Nowiny namołwjeja swojich čitarjow pod nadpismom „Wostanjemy doma!“ dopisować, što za čas koronakrizy doma abo w zahrodce tak činiće. Kak kreatiwni sće a što wam k přeprěčenju tohole ćežkeho časa do mysli přińdźe, z čimž móhli so zaběrać. Pisajće nam na . K tomu podajće prošu hesło „Wostanjemy doma!“ Čakamy na waše dopisy, wobrazy a rysowanki a wuprajamy hižo nětko wutrobny dźak. Uwe Gutšmidt z Bórkowow pisa:

Spěšnosć měrili

Komorow. Na zwjazkowej dróze B 156 blisko Komorowa pola Klukša, hdźež je 70 km/h dowolenych, je policija předwčerawšim spěšnosć měriła. Do směra na Budyšin přepruwowachu zastojnicy dohromady 250 jězdźi­dłow, třinaće bě přespěšnych. Njesławny rekord docpě Mazda ze 100 km/h.

SSW chce so sama wo mjeńšinowe naležnosće zwjazkowym sejmje w Berlinje starać (2. dźěl a kónc)

W Južnoschleswigskim wolerskim zwjazku (SSW) po słowach předsydy Flemminga Meyera z toho wuchadźeja, zo dosaha za mandat zwjazkoweho sejma 50 000 do 60 000 wolerskich hłosow. K přiru­nanju: Lěta 2017, jako zaćahny sewjerny zwjazkowy kraj ze 26 wolenymi zapósłancami do sejma w Berlinje, bě za jedyn mandat 58 000 hłosow trěbnych. W lěće 1949 bě 75 388 ludźi při wólbach prěnjeho zwjazkoweho sejma w šěsć južnoschleswigskich wólbnych wokrjesach za SSW hłosowało.

Předewzaćel Robert Lejnart, kotryž sportowe towarstwa a jednotki ze sportowej drastu wuhotuje, je wčera akciju T-shirtow Nawróć so sylniša/sylniši startował.

Kupiće-li sej T-shirt, podpěraće swoje sportowe towarstwo, swoju sportowu jednotku abo Serbski Sokoł z.t. T-shirt płaći 19,99 eurow, a twoje sportowe towarstwo, sportowa jednotka abo Serbski Sokoł z.t. dóstanje z toho pjeć eurow! Skazanku směće hnydom pola wotpowědneje kontaktneje wosoby sportoweho towarstwa wotedać. Za Serbski Sokoł z.t. je to Jan Hrjehor pod mejlku .

Po sezonje je do sezony, rěka na polu najwšelakorišich sportowych družin. Po swětowym cupje je do swětoweho cupa, rěka nětko tež w Oberhofje. Tam su mjenujcy w januarje swětowy biatlonowy cup přewjedli. Kilian Hrjehor je někotre fakty nastupajo přihoty na nowy cup klětu zezběrał.

Wid na sezonu 2020/2021

Swětowy biatlonowy cup 2019/2020 je nimo. Kóždy wě, zo je so sezona na wašnje skónčiła, kotrež bychmy sej hinaše předstajili. Najebać tučasny ćežki čas wusměrjeja so zamołwići w Oberhofje hižo dawno na januar 2021, hdyž ma so tam přichodny swětowy cup wotměć. Poprawny start za wubědźowanje pak bě hižo lětsa w januarje, jako zahajichu předpředań lisćikow za klětu. Hač do kónca měrca su sej fanojo hižo 11 250 tiketow za­wěsćili.