Z wudaća: póndźela, 27 julija 2020

póndźela, 27 julija 2020 14:00

Mobilny stan za test korony

Mnichow (dpa/SN). Po masowej infekciji 174 ratarskich pomocnikow w plaho­warni zeleniny w bayerskim Mammingu je tam knježerstwo dźensa staciju za test korony natwarić dało. Wobydlerjo gmejny maja składnosć, so w mobilnym stanje darmotnje na koronawirus testować dać. To je bayerska ministerka za strowotnistwo Melanie Huml (CSU) připowědźiła. „Runje w tajkej situaciji je to jara wažny poskitk wobydlerjam.“

Kónc tydźenja bě krajnoradny zarjad Dingolfingu-Landauwje zdźělił, zo je so w mjeztym zawrjenym ratarskim zawodźe w gmejnje z 3 300 wobydlerjemi třećina tam dźěłacych ratarskich pomocnikow natyknyła. Pomocnicy z Madźarskeje, Rumunskeje, Bołharskeje a Ukrainy běchu na žnjach kórkow zasadźeni. Woni bydla w kontejnerach. Zawod je mjeztym z płotom wobdaty a w karatenje.

wozjewjene w: Kraj a swět
póndźela, 27 julija 2020 14:00

Razniše naprawy

Washington (dpa/SN). Po tydźenje trajacych protestach w Portlandźe w staće Oregon je knježerstwo USA razniše naprawy přećiwo namócnym skućićelam mjez demonstrantami připowědźiło. Po słowach ministra za škit domizny Chada Wolfa nochcedźa dlěje ćerpjeć, zo na­mócni kóždu nóc policistow nadběhuja. W Portlandźe je tež minjenu nóc k zražkam mjez demonstrantami a policiju dó­šło­. Po namócnej smjerći Afroameričana Geor­gea Floyda ludźo w USA mjeztym mě­sacaj přećiwo rasizmej a policajskej namocy protestuja. Při tym bu wčera w texaskim Austinje muž zatřěleny. Kaž policija zdźěli, bě wopor sam wobrónjeny a je so awtu bližił, z kotrehož su jeho zatřělili.

wozjewjene w: Kraj a swět
póndźela, 27 julija 2020 14:00

Nowy přiměr na wuchodźe Ukrainy

Kijew/Donjeck (dpa/SN). Po wjace hač 20 pospytach płaći wot dźensnišeho w krizowej kónčinje na wuchodźe Ukrainy přiměr. „Dospołny a wšo wopřijacy přiměr“ je wot połnocy skutkowny, zdźěli prezidialny zarjad w Kijewje. Ukrainske wójsko a zastupnicy proruskich wojowarjow z kónčin wokoło Donjecka a Lu­hanska běchu so na kónc wojowanjow dojednali. Dotal běchu wšitke dojednanja w tym nastupanju po krótkim času zaso zwrěšćili. Ruski prezident Wladimir Putin a ukrainski prezident Wolodimir Zelenskij chwaleštaj w telefonaće do­jed­nanje na přiměr. Zdobom žadataj sej wobaj­ wjace prócowanja kontaktneje skupiny, dotalne dojednanja přesadźić.

Wot nalěća 2014 wojuja jednotki ukrainskeho knježerstwa přećiwo wot Ruskeje podpěranym zběžkarjam. Po trochowanju UNO je w bojach dotal wjace hač 13 000 ludźi žiwjenje přisadźiło. Lěta 2015 z pomocu Němskeje a Francoskeje wujednany měrowy plan předwidźi wojowanja a wólby skónčić. Hišće lětsa planuja mjezynarodnu konferencu.

wozjewjene w: Kraj a swět
póndźela, 27 julija 2020 14:00

Twarske dojednanje podpisane

Moderne na přichod wusměrjene nowe stejnišćo za krajnoradny zarjad

Zhorjelc (AK/SN). Zhorjelski wokrjes rozšě­rja hač do lěta 2024 swójski krajno­radny zarjad na moderne a na přichod wusměrjene zarjadniske stejnišćo, hdźež budźe městno za cyłkownje 730 sobudźěłaćerjow. Na Zhorjelskej Dwórnišćowej, Berlinskej a Salomonowej dróze budu wažne wobłuki kaž wobydlerski zarjad, wotrjady za přizjewjenje jězdźidłow, bydlenski pjenjez, młodźinski zarjad a jobo­wy center koncentrowane. Nimo toho nastanu w Lubiju, Běłej Wodźe a Žitawje wobydlerske běrowy. Mjeńše wotdźěle zarjadniskeho dźěła maja so tež w Nowosólcu-Hródku, Mužakowje, Rózborku a Ebersbachu-Neugersdorfje zarjadować. „Chcemy wobydlerjam bóle bliske być a je docpěć. Wobłuki kaž stro­wotniski zarjad,­ weterinarny zarjad, přirodoškit a wobswět dźěłaja přichodnje bóle digitalnje z elektroniskimi aktami. Kročimy na prawym puću“, wuzběhny krajny rada wokrjesa Bernd Lange (CDU) minjenu srjedu w Zhorjelcu.

wozjewjene w: Łužica
póndźela, 27 julija 2020 14:00

Woprawnjeny dźak

Lědma někajki cyłk ludźi móže na tak dołhe­ stawizny zhladować kaž katolske bratstwo swjateho Bosćana. Tohodla je derje, zo wone swojej 600. róčnicy wose­bitu wustajeńcu wěnuje. A prawje wjele zajimcow měło sej ju wobhladać, přetož štož su Pětr Suchi, Tadej Šiman, Ludwig Zahrodnik a dalši sobuwojowarjo hro­madźe znjesli, je zawěrno wobhladanjahódne. Tam móžeš sej mjenujcy wuwě­domić, kak hłuboko zakorjenjene česćowanje swjateho Bosćana w Chróšćanskej wosadźe je. Wo tym njeswědčitej jenož procesion na patronatnym dnju abo hłowna zhromadźizna. Wočiwidniša je wulka ličba modlerskich stołpow, postawow, kapałkow a dalšich formow. Zo je wěriwi zwjetša z wjele pjenjezami wu­dźeržuja, je wšeje česće hódne. Tohodla je předsyda Towarstwa Cyrila a Metoda Jurij Špitank wčera k wotewrjenju z prawom na to skedźbnił a so mějićelam za jich angažement dźakował. Marian Wjeńka

wozjewjene w: Towarstwa
póndźela, 27 julija 2020 14:00

Pola awtow wulki minus

Praha (ČŽ/K/SN). W Čěskej je produkcija awtow w prěnim połlěće 2020 chětro woteběrała. W tym času bu 503 934 wozy­dłow zhotowjenych, štož je 32,6 procentow produkciskeho wukona prěnich šěsć měsacow zašłeho lěta. To wozjewjeja medije kraja, powołace so na informacije Zjednoćenstwa čěskeje awtomobiloweje industrije. Wšitke tři awtotwornje Čěskeje su raznych naprawow přećiwo koronawirusej dla produkciju jězdźidłow přez tydźenje přetorhnyć dyrbjeli. Škoda auto w Mladej Boleslavje zhotowi wot januara do kónca junija 337 580 wozydłow, 28,2 procentaj mjenje hač loni w samsnym času. W Nosovicskej fabrice Hyundai spadny produkcija wo dwě pjećinje na 96 390 eksemplarow, a twornja TPCA nadźěła 69 635 małych awtow, štož su 40,3 procenty mjenje hač samsny čas loni.

Dźeń a bóle sej žadaja, zo stat awtowej industriji jako lokomotiwje ekonomiki financnje skutkownje pod pažu přimnje. Premier Andrej Babiš (ANO) je po nawróće z Brüsselskeho wjerška EU připowědźił, pjenjezy z europskeho fondsa za wobnowjenje hospodarstwa hłownje tež za spěchowanje awtoindustrije nałožić.

wozjewjene w: Słowjanski wukraj
póndźela, 27 julija 2020 14:00

Hornčerske wiki derje wopytane

Wopytowarjow zbliska a zdaloka přiwabili su mjeztym 17. hornčerske kónctydźenske wiki w błótowskich Bórkowach. Na swjedźenišću prezentowaše so wjace hač třiceći­ hornčernjow z Braniborskeje, Berlina, Bayerskeje, Sakskeje a samo z Litaw­skeje, Pólskeje a Madźarskeje. Nimo toho běchu tež wšelake dalše rjemjesła zastupje­ne. Zo bychu předpisy koronawirusa dla dodźerželi, su zarjadowarjo tónkróć­ zachod a wuchod wikow dźělili. Napoje a jědźe poskićachu gastronomojo kaž hižo n­a rjemjeslniskich a burskich wikach před tydźenjomaj zwonka swjedźe­nišća. Tak nje­je tam k žanej tołkańcy dóšło. Foto: Michael Helbig

wozjewjene w: Hospodarstwo
póndźela, 27 julija 2020 14:00

Lětsa žane dobre žně kórkow

Lubin (dpa/SN). Plahowarjo kórkow w Błótach zhladuja ze starosćemi na lětuše žně. „Lěto je wobćežne, nic jenož koro­ny dla“, rjekny jednaćelka Błótowskeho zwjazka Melanie Kossacojc. Wjedro je přenjewobstajne, nocy su zdźěla přezymne. Kórki trjebaja znajmjeńša 15 stopnjow. W juniju su temperatury hač na pjeć stopnjow spadnyli. To je ze­leninje přewjele, tak Kossacojc. Nimo toho­ su rostliny lětsa wot chorosćow wosebje potrjechene.

Tuchwilu su po jeje informacijach hakle­ połojcu mnóstwa lońšeho lěta nažnje­li. Kossacojc wočakuje straty pola plahowarjow a w konserwowych fabrikach. Ratarjo nadźijeja so lěpšeho wjedra w přichodnych pjeć tydźenjach, zo móhli deficit tak derje kaž móžno wobmje­zować. Wokomiknje wočakuja mnóstwo něhdźe 30 000 tonow kórkow k zawa­rjenju a k bělenju. Koronakriza wuměnjenja na žnjach přidatnje poćežuje. Hygie­niske předpisy a škitne naprawy zawinuja ratarjam přidatne kóšty. W Błótach plahuje dźewjeć předewzaćow kórki na cyłkownje 500 hektarach. W něhdźe dwanaće zawodach je předźěłuja.

wozjewjene w: Hospodarstwo
póndźela, 27 julija 2020 14:00

Wotbłyšćuje wulki pokład

Wustajeńcu wo česćowanju swj. Bosćana wotewrěli

Chrósćicy (SN/MWj). Lětuša 600. róčnica wobstaća katolskeho bratstwa swjateho Bosćana je na wčerawšej njedźeli dalši wjeršk dožiwiła. W Chróšćanskim Hór­nikowym domje wotewrěchu wobšěrnu a zajimawu wustajeńcu wo česćowanju swjateho Bosćana w Chróšćanskej wosadźe. W zhromadnym dźěle Towarstwa Cyrila a Metoda (TCM), wosady a bratstwa znosychu mnozy angažowani wjele najwšelakorišich fotow a dokumentow, kotrež pokazuja na 24 płachtach, tak mje­nowanych rollupach. Něhdźe 80 zajimcow je sej wčera přehladku wobhladało. Mjez druhim witaše předsyda TCM Jurij Špitank Budyskeho krajneho radu Michaela Hariga (CDU) a abatisu klóštra Marijineje hwězdy Gabrielu Hesse. Skupina wosadnych dujerjow je wotewrjenje swjatočnje wobrubiła.

wozjewjene w: Towarstwa
póndźela, 27 julija 2020 14:00

Zetkanje motorskich njewupadnyło

Paleta zarjadowanjow, kotrež so lětsa najebać wobmjezowanja koronapandemije dla wotměwaja, je jara přewidna. Nimale wšitke dźě su minjene měsacy wotprajili. Jedne pak su kónc tydźenja přiwšěm přewjedli.

Bórkhamor (JoS/SN). Lědma jednomu zarjadowarjej wjelelětnych wjesnych tradicijow je so lětsa poradźiło zwučene podawki dale wjesć. Wuwzaće je zetkanje motorskich při Jantarowym jězoru pola Bórkhamora. Kónc tydźenja su je mjeztym jědnaty raz přewjedli. „Kaž stajnje smy lětsa w januaru wšitko planować zapo­čeli“, powěda předsyda towarstwa Kurvenliga Lausitz Bastian Lowke. „Zrěčenja smy tak wotzamknyli, zo bychmy je bjez přidatnych wudawkow wupowědźić móhli. Po tym smy wočaknyli, kak so połoženje dale wuwije. A skónčnje móžachmy swój zarjadowanski koncept zapodać.“

wozjewjene w: Łužica

Serbska debata

nowostki LND