Mnichow (dpa/SN). Po masowej infekciji 174 ratarskich pomocnikow w plahowarni zeleniny w bayerskim Mammingu je tam knježerstwo dźensa staciju za test korony natwarić dało. Wobydlerjo gmejny maja składnosć, so w mobilnym stanje darmotnje na koronawirus testować dać. To je bayerska ministerka za strowotnistwo Melanie Huml (CSU) připowědźiła. „Runje w tajkej situaciji je to jara wažny poskitk wobydlerjam.“
Kónc tydźenja bě krajnoradny zarjad Dingolfingu-Landauwje zdźělił, zo je so w mjeztym zawrjenym ratarskim zawodźe w gmejnje z 3 300 wobydlerjemi třećina tam dźěłacych ratarskich pomocnikow natyknyła. Pomocnicy z Madźarskeje, Rumunskeje, Bołharskeje a Ukrainy běchu na žnjach kórkow zasadźeni. Woni bydla w kontejnerach. Zawod je mjeztym z płotom wobdaty a w karatenje.
Kijew/Donjeck (dpa/SN). Po wjace hač 20 pospytach płaći wot dźensnišeho w krizowej kónčinje na wuchodźe Ukrainy přiměr. „Dospołny a wšo wopřijacy přiměr“ je wot połnocy skutkowny, zdźěli prezidialny zarjad w Kijewje. Ukrainske wójsko a zastupnicy proruskich wojowarjow z kónčin wokoło Donjecka a Luhanska běchu so na kónc wojowanjow dojednali. Dotal běchu wšitke dojednanja w tym nastupanju po krótkim času zaso zwrěšćili. Ruski prezident Wladimir Putin a ukrainski prezident Wolodimir Zelenskij chwaleštaj w telefonaće dojednanje na přiměr. Zdobom žadataj sej wobaj wjace prócowanja kontaktneje skupiny, dotalne dojednanja přesadźić.
Wot nalěća 2014 wojuja jednotki ukrainskeho knježerstwa přećiwo wot Ruskeje podpěranym zběžkarjam. Po trochowanju UNO je w bojach dotal wjace hač 13 000 ludźi žiwjenje přisadźiło. Lěta 2015 z pomocu Němskeje a Francoskeje wujednany měrowy plan předwidźi wojowanja a wólby skónčić. Hišće lětsa planuja mjezynarodnu konferencu.
Zhorjelc (AK/SN). Zhorjelski wokrjes rozšěrja hač do lěta 2024 swójski krajnoradny zarjad na moderne a na přichod wusměrjene zarjadniske stejnišćo, hdźež budźe městno za cyłkownje 730 sobudźěłaćerjow. Na Zhorjelskej Dwórnišćowej, Berlinskej a Salomonowej dróze budu wažne wobłuki kaž wobydlerski zarjad, wotrjady za přizjewjenje jězdźidłow, bydlenski pjenjez, młodźinski zarjad a jobowy center koncentrowane. Nimo toho nastanu w Lubiju, Běłej Wodźe a Žitawje wobydlerske běrowy. Mjeńše wotdźěle zarjadniskeho dźěła maja so tež w Nowosólcu-Hródku, Mužakowje, Rózborku a Ebersbachu-Neugersdorfje zarjadować. „Chcemy wobydlerjam bóle bliske być a je docpěć. Wobłuki kaž strowotniski zarjad, weterinarny zarjad, přirodoškit a wobswět dźěłaja přichodnje bóle digitalnje z elektroniskimi aktami. Kročimy na prawym puću“, wuzběhny krajny rada wokrjesa Bernd Lange (CDU) minjenu srjedu w Zhorjelcu.
Praha (ČŽ/K/SN). W Čěskej je produkcija awtow w prěnim połlěće 2020 chětro woteběrała. W tym času bu 503 934 wozydłow zhotowjenych, štož je 32,6 procentow produkciskeho wukona prěnich šěsć měsacow zašłeho lěta. To wozjewjeja medije kraja, powołace so na informacije Zjednoćenstwa čěskeje awtomobiloweje industrije. Wšitke tři awtotwornje Čěskeje su raznych naprawow přećiwo koronawirusej dla produkciju jězdźidłow přez tydźenje přetorhnyć dyrbjeli. Škoda auto w Mladej Boleslavje zhotowi wot januara do kónca junija 337 580 wozydłow, 28,2 procentaj mjenje hač loni w samsnym času. W Nosovicskej fabrice Hyundai spadny produkcija wo dwě pjećinje na 96 390 eksemplarow, a twornja TPCA nadźěła 69 635 małych awtow, štož su 40,3 procenty mjenje hač samsny čas loni.
Dźeń a bóle sej žadaja, zo stat awtowej industriji jako lokomotiwje ekonomiki financnje skutkownje pod pažu přimnje. Premier Andrej Babiš (ANO) je po nawróće z Brüsselskeho wjerška EU připowědźił, pjenjezy z europskeho fondsa za wobnowjenje hospodarstwa hłownje tež za spěchowanje awtoindustrije nałožić.
Lubin (dpa/SN). Plahowarjo kórkow w Błótach zhladuja ze starosćemi na lětuše žně. „Lěto je wobćežne, nic jenož korony dla“, rjekny jednaćelka Błótowskeho zwjazka Melanie Kossacojc. Wjedro je přenjewobstajne, nocy su zdźěla přezymne. Kórki trjebaja znajmjeńša 15 stopnjow. W juniju su temperatury hač na pjeć stopnjow spadnyli. To je zeleninje přewjele, tak Kossacojc. Nimo toho su rostliny lětsa wot chorosćow wosebje potrjechene.
Tuchwilu su po jeje informacijach hakle połojcu mnóstwa lońšeho lěta nažnjeli. Kossacojc wočakuje straty pola plahowarjow a w konserwowych fabrikach. Ratarjo nadźijeja so lěpšeho wjedra w přichodnych pjeć tydźenjach, zo móhli deficit tak derje kaž móžno wobmjezować. Wokomiknje wočakuja mnóstwo něhdźe 30 000 tonow kórkow k zawarjenju a k bělenju. Koronakriza wuměnjenja na žnjach přidatnje poćežuje. Hygieniske předpisy a škitne naprawy zawinuja ratarjam přidatne kóšty. W Błótach plahuje dźewjeć předewzaćow kórki na cyłkownje 500 hektarach. W něhdźe dwanaće zawodach je předźěłuja.
Chrósćicy (SN/MWj). Lětuša 600. róčnica wobstaća katolskeho bratstwa swjateho Bosćana je na wčerawšej njedźeli dalši wjeršk dožiwiła. W Chróšćanskim Hórnikowym domje wotewrěchu wobšěrnu a zajimawu wustajeńcu wo česćowanju swjateho Bosćana w Chróšćanskej wosadźe. W zhromadnym dźěle Towarstwa Cyrila a Metoda (TCM), wosady a bratstwa znosychu mnozy angažowani wjele najwšelakorišich fotow a dokumentow, kotrež pokazuja na 24 płachtach, tak mjenowanych rollupach. Něhdźe 80 zajimcow je sej wčera přehladku wobhladało. Mjez druhim witaše předsyda TCM Jurij Špitank Budyskeho krajneho radu Michaela Hariga (CDU) a abatisu klóštra Marijineje hwězdy Gabrielu Hesse. Skupina wosadnych dujerjow je wotewrjenje swjatočnje wobrubiła.
Paleta zarjadowanjow, kotrež so lětsa najebać wobmjezowanja koronapandemije dla wotměwaja, je jara přewidna. Nimale wšitke dźě su minjene měsacy wotprajili. Jedne pak su kónc tydźenja přiwšěm přewjedli.
Bórkhamor (JoS/SN). Lědma jednomu zarjadowarjej wjelelětnych wjesnych tradicijow je so lětsa poradźiło zwučene podawki dale wjesć. Wuwzaće je zetkanje motorskich při Jantarowym jězoru pola Bórkhamora. Kónc tydźenja su je mjeztym jědnaty raz přewjedli. „Kaž stajnje smy lětsa w januaru wšitko planować započeli“, powěda předsyda towarstwa Kurvenliga Lausitz Bastian Lowke. „Zrěčenja smy tak wotzamknyli, zo bychmy je bjez přidatnych wudawkow wupowědźić móhli. Po tym smy wočaknyli, kak so połoženje dale wuwije. A skónčnje móžachmy swój zarjadowanski koncept zapodać.“