Z wudaća: póndźela, 27 julija 2020

Slepo (AK/SN). Němska železnica chce w Slepom nastajić 30 metrow wysoki škričkowy sćežor. Natwarić chcedźa jón sewjerowuchodnje dwórnišća, njedaloko hłubokotwarskeho předewzaća Gerhard Heilmann a industrijoweho puća. Gmejn­scy radźićeljo su so na swojim zašłym pose­dźenju jednohłósnje přećiwo twarej „GSM-R bazisowa stacija Slepo“ wuprajili. „Němska železnica je nam zdźěliła, zo chcedźa škričkowy sćežor jeničce za interne zaměry wužiwać. K tomu słuša na při­kład tež, hdyž chce lokomotiwnik z wuhibkarnju telefonować“, rozłoži Steffen Seidlich, nawoda zarjada za planowanje, twar a hórnistwo Slepjanskeho zarjadniskeho zjednoćenstwa gmejnskim radźićelam. Techniski wuběrk je so intensiwnje z temu zaběrał a měješe mnohe prašenja: Nastanu problemy za strowotu? Kotre mjezy su hladajo na promjenja? Kak ma so transport realizować? Steffen Seidlich wo tym informowaše, zo železniski zwjazkowy zarjad proces jednanjow pruwuje a přewodźa. Próstwje, přewjesć woby­dlersku zhromadźiznu, pak wotpowě­dować njebudu.

Tuchwilu witaja nas na mnohich blakach wulke kukuricnišća. Zeleń łopjenow skići rjany napohlad, kaž tu pola Nowoslic do směra na Róžant a na Koslow. Při polu z biokukuricu tón abo tamny rady pozastanje, zo by čerstwe słódne zornjatka woptał.­ Wysoko zrosćene rostliny pak nas zdobom napominaja kedźbliwi być. Wose­bje šoferojo měli po dróhach a pućach mjez tajkimi zahonami trochu pomałšo jěć, ­předewšěm blisko křižowanišćow. Wšako njeje wid na jězdnju přeco swobodny. We wječornych hodźinach, hdyž směrki padaja, su z polow słyšeć zwuki dźiwich swini. Wone dźě kukuricu wosebje rady žeru. Foto: Feliks Haza

Randalěrarja lepili

Wojerecy. Na Starej Berlinskej dróze we Wo­jerecach je we wčerawšich rańšich hodźinach wobydler wobkedźbował, kak něchtó busowe zastanišćo kóncuje. Nje­znaty ze wšej mocu do škleńcy kopaše a ju skónčnje rozbi. Alarmowana policija muža na to w bliskosći dosahny. Při přepytowanju blišich wobstejnosćow so wukopa, zo bě 20lětny nimo toho zachodne durje wjaceswójbneho domu wobškodźił. Načinjena wěcna škoda wučinja cyłkownje něhdźe 1 100 eurow.

Budyšin (SN/MWj). Turistiska branša ­so po dospołnym zlemjenju w měrcu ­a aprylu poněčim zaso wočerstwja. Tole pytnu tež w Budyšinje. Štož je tele słónčne dny mjez Bohatej hasu a Hrodom wočiwidne, bě so hižo w meji započało pokazować. To wobkrućeja nětko ličby statistiskeho krajneho zarjada w Kamjencu.

Mjeztym zo běchu ličby přenocowanjow w sprjewinym měsće w aprylu na jědnaće procentow porno lětu 2019 spadnyli, docpěchu wone w meji hižo 42 procentow porno meji 2019, rěka w nowinskim zdźělenju měšćanskeho zarjadnistwa. Byrnjež před měsacomaj hišće krućiše koronowe postajenja płaćili a ža­ne­ dowolowe skupiny do Hornjeje Łužicy přijěć njesměli, zličichu w Budyšinje přiwšěm 7 445 přenocowanjow. Tohodla zhladuja w radnicy optimistisce na lěćne měsacy, w kotrychž je sprjewine město mjez dowolnikami tradicionalnje wosebje woblubowane. Pozitiwny trend je tež za cyłu Saksku spóznajomny. Mjeztym zo docpěchu w aprylu jenož 15 procentow přenocowanjow minjeneho lěta, rozrosće ličba w meji na 32 procentow.

ST Běła-Cunnersdorf – Sokoł Ralbicy/Hórki 0:6 (0:4)

Zestawa hosći: Měškank – Rychtar, Kocor­, Lulak, M. Žur, Jakubaš, Šołta, Zynda, Čornak, S. Žur (41. Brězan), Šwejda (31. Statnik)

Tróšku njewšědne běše nastaće tu­teje přećelskeje hry. Poprawom běchu Pan­čičanscy koparjo jako přećiwnik za Běłu předwidźani, jim pak njebě móžno nastupić. Dźak sportowcej Andréjej Kobe­rej, kiž bě kontakty za hru Maikej Brězanej sposrědkował, móžachu So­koljo zaskočić. Něhdyši hrajer starych knjezow Sokoła Ralbicy/Hórki Heiner Rawš mó­žeše so dopomnić, zo běchu Ralbičenjo před sydom lětami posledni raz přećiwo cyłkej z Běłeje-Cunnersdorfa hrali.

FSV Budissa Budyšin – ST Traktor Reinhardtsdorf 18:1 (6:1)

Za Budissu Budyšin zasadźeni: Köhler, Höhne - Noack, Vrabec, Käppler, Schröder, Henčel, Barnickel, Gebhardt, Hagemann, Kärger, Rülicke, Schröder, Lehmann, Schumacher, Baudisch, Ričel, Voigt, Hentsch

Wrota za Budissu třělili: Toni Barnickel (3), Karel Vrabec (3), Tom Hagemann (1), Franz Voigt (6), Florian Baudisch (2), Julien Hentsch (3)

Na stronje koparjow Budissy Budyšin steji po prěnim tesće hišće młodeje hrajne­je doby 2020/2021 wysoke dobyće. Z 18:1 (6:1) je so hosćićel přećiwo wo­krjesnemu wyšemu ligistej ze Sakskeje Šwicy přesadźił. Budissa běše přez cyły hrajny čas lěpše mustwo. Najebać intensiwne prěnje treningowe jednotki běchu domjacy spěšniši a w dwubojach sylniši. Reinhardtsdorf pak wojowaše a so zmužiće wobaraše, a tak poradźichu so jemu w 41. min. znajmjeńša čestne wrota.

Awtor dźensa Toni RyćerPoprawom njeslěduju wšitke běhi formule 1 w telewiziji. W zašłych lětach je so w tutej seriji mjenujcy wěsta napjatosć zhubiła. Lětsa je tomu kusk hinak. Sprěnja so hišće tak wjele w motorsporće njehiba a zdruha su wobstejnosće wubědźowanjow pandemije dla jara wosebite. Ale kóžde lěto wurjadny je Grand Prix na madźarskim Hungaroringu. Tuta čara je zwjazana z wosebitymi podawkami a wosobinskimi dožiwjenjemi. Zamołwići formule 1, na čole Bernie Ecclestone, mějachu són, so jónu tež z kralowskej seriju w jednym socialistiskim kraju wubědźować. Prěnja adresa bě Čerwjene naměsto w Moskwje. Zajimawa ideja, ale zdobom njerealistiska. Po ćežach z organizatorami w rakuskim Zeltwegu, hdźež bu tamniši Grand Prix dotal pře­wjedźeny, rozsudźichu 1985 zhromadnje z madźarskim knježerstwom, so lěto pozdźišo blisko Budapesta wubědźować. Wólba­ tuto­ho kraja njeje při tym žadyn připad. Madźarska ma w motorsporće spomnjećahódne tradicije, tež hdyž je wo tym mało znate.