Z wudaća: pjatk, 07 awgusta 2020

Wojerecy. Wjacore prózdninske poskitki ma Wojerowski zwěrjenc přichodne dny za šulerjow a jich swójbnych přihoto­wany. Tak móža zajimcy 12. awgusta ze­znać, kak zwěrjenc poprawom funguje. Štó čini­ što a kelko ludźi w zwěrjencu popra­wom dźěła? Na tejle prašeni a dalše Silke Kühn wobšěrnje wotmołwja. Program budźe na mjenowanym dnju w 9 a w 14 hodź. a traje stajnje dwě ho­dźi­nje. Wobdźělenje płaći 39 eurow na swójbu. Dalši prózdninski poskitk wě­nuje so zaběrje zwěrjatow. 19. awgusta móža swójby hromadźe ze Silku Kühn picu do kašćikow schować a sej wšelake hry wumyslić, z kotrymiž su zwěrjata wě­sty čas zaběrane. Program započnje so w 14 hodź. a płaći na swójbu 39 eurow.

Wustajeńcu sej wobhladać

Fota: Matej Dźisławk, Beno Brězan (2)Kaž je hižo z minjenych lět znate, móžeš sej tež lětsa zaso po swjatoku na zahrodźe SLA tón abo tamny słódny napoj popřeć. „Sundowner“-bara je hišće hač do kónca awgusta wotewrjena. Beno Brězan, kiž ma tam wotežki w rukomaj, je najebać cha­błace wjedro spočatk julija z lětušej sezonu dosć spokojom. „Ludźo tu stajnje běchu, hdyž mějach­my wotewrjene. Nadźijam so, zo nětko tež hišće měsac ćopłe wostanje, tak zo njetrjebamy baru wjac přehusto začinić.“ Wot srjedy do njedźele su tam wot 17 hodź. durje wotewrjene. Nic jenož słódne napoje, ale tež tu abo tamnu mału jědź tam poskićeja. Pod sundowner.bar móžeće so tež wo temowych wje­čorkach a zarjadowanjach informować, kotrež tam pře­wjeduja – wězo wěstotny wot­stawk wobkedźbujo. Jurij Bjeńš

Lětuši maturanća Budyskeho Serbskeho gymnazija Fota: Darius BudarWotchadna rjadownja z Worklec Foto: Milena ŠołćicWotchadnicy 10. lětnika ze Slepo­ho Foće: Jan Hrjehor
 SERBSKE NOWINY – KÓNCTYDŹENSKA PŘIŁOHA
Pjatk, 7. awgusta 2020

Młodostni, kotřiž su lětsa šulu wu­cho­dźili, bě­chu sej wotchad za­wěsće hinak před­sta­jili. Na zbo­žo móžachu swoju wot­chad­ničku wšudźe pod wěstymi wuměnjenjemi swjećić. Hinak hač hewak pak swjedźenje na kóždy pad běchu. Někotre wo­brazy lětušich 10tkow ze Slepo­ho a Worklec kaž tež maturantow Serbskeho gymnazija Budyšin smy za was zapopadnyli.

Jurij Bjeńš

webinar

Šulerjo ze Slepoho

foto: Jan hrjehor

Z wěstotu w syći je so 14 šulerkow a šulerjow z Worklec a 16 šuler­kow a šulerjow ze Slepoho w starobje 13 do 15 lět zaběrało. Po tym zo bě syć z pomo­cu SAEK Budyšin stabilna a rumnosći wobeju šulow z webcam a mikrofonom wuhotowanej, powita moderator Michał Cyž šulerjow, za­moł­witych wučerjow a dweju referentow po­li­cije. W nimale dwuhodźinskim webinarje (inter­netnym seminarje) wonaj młodostnym rozkłado­wa­štaj a zwobrazništaj, na čo měli w syći kedź­bować a kak so škitać. Putace krótko­filmy a zapřijeće wob­dźělni­kow přez kolaboratiwne graty wolóžichu zrozu­mjenje a zmóž­nichu jim inter­aktiwne sobu­skut­kowanje.

Hrajne koparske zjednoćenstwo Sokoła Ralbicy/Hórki, SJ Chró­sćic, SJ Njebjelčic a ST Marijineje hwězdy pyta hišće trenarja za nowu hrajnu dobu. Dotal su wšitcy kandidaća wotprajili. Zamołwići wšěch štyrjoch towarstwow su pomału bjez­radni, zo nichtó nadawk pře­wzać nochce. Loni trenowaštaj C-juniorow Frank Ričel a Guido Zahrodnik, tuž su młodźi koparjo hižo jara derje nastajeni. Zajimcy, kotřiž bychu dwanaće- do 14lět­nych hólcow trenować chcyli, njech so w jednym ze štyrjoch mjenowanych towarstwow při­zjewja. Serbscy koparjo bychu ­jim nje­směrnje dźakowni byli. Tekst a foto: Jurij Bjeńš

Lara Kralisch (nalěwo) stara so dźensa hromadźe z Inu Züchner wo šulerki a šulerjow, kiž maja wotpohlad, wěsty čas do wukraja hić. Angažuje so tuž w organizaciji Youth for Understanding (YfU). Foto: Silke Richter

Lara Kralisch bě wuměnjenska šulerka a so nětko sama w powšitkownowužitnej organizaciji za wuměnu šulerjow „Youth for Understanding (YfU)“ angažuje, zo by zajimowa­nych šulerjow poradźowała. Silke Richter je so z 18lětnej wo nazhonjenjach we wukraju rozmołwjała. Nimo toho je jej Brětnjan­ka dalše zaměry rozłožiła, kotrež nochce tež w času korony z wočow zhubić.

Čehodla sy so rozsudźiła z wuměnjenskej šulerku so stać?

L. Kralisch: Moji swójbni běchu wina. Dokelž smy jako hóstna swójba šulerki z wukraja witali, mějach z nimi wězo wjele kon­takta, a tak chcych so tuž raz sama na puć podać. Mějachmy dwě holcy z Mexika na tři tydźenje pola nas doma, pozdźišo hišće dalšu na poł lěta. Mějach hižo přeco wulki zajim na cuzych rěčach a kulturach. Sym so za Chile rozsudźiła, dokelž je mje španišćina fascinowała a dokelž njebě to typiski kraj za wuměnu, kaž na přikład USA.

Z ćěšenkom po Aziji (3/4)

Fota: Fabian Bejma

Fabian Bejma, pochadźacy z Ralbic, bydli dźensa ze swójbu w Drježdźanach. Wot nowembra 2019 do februara 2020 pak njebě w domiznje docpějomny, ale je z mandźelskej a dźěsćom po Aziji pućował. W prěnim a druhim dźělu rozprawješe młody Serb wo Indiskej a Malajziji. Dale dźěše za młodu swójbu do Indoneskeje. Što tam dožiwichu, čitaće w dźensnišim wudaću njewšědneje tury.

Foće: Štefan Paška

„Dźakuju chcemy wam nětk prajić

nowe zaměry zas sej stajić.

Nowe šule nětk wopytamy,

zawěsće so raz wuhladamy!“

Takle spěwachu šulerjo 4. lětnika w zašłym času časćišo na Serbskej zakładnej šuli w Pančicach-Kukowje. Wšako chcychu něšto cyle wosebiteho zaspěwać a z tym pokazać, kak ćežko jim poprawom je so ze zakładnej šulu rozžohnować a zdobom dźakowni być, za kóžduž­kuli hodźinu. Pjatk do wulkich prózdnin běše potom tak daloko, zo dyrbjachu so ći wulcy ze swojimi sobušulerjemi a wučerjemi rozžohnować. Lochko jim wokoło wutroby njeběše. Mi pak sprawdu prajene tež nic! Lěta zhromadneho wuknjenja zawostajeja slědy. Před sobušulerjemi a wučerjemi pokazachu ći wulcy mały program – spěwy a skeč – a přepodachu šuli njezapomnity darik – wobrazaj, kotrejž stej nastałoj we wuměłskim kubłanju na temu akci­ske molo­wanje Jackson Pollock. Kóždy wučer dósta ­samo­spaslenu kartu z krasnej basnju šulerjow.

My šulerjo 4. lětnika Serbskeje zakładneje šule „Šula Ćišinskeho“ smy so w tydźenju do lěćnych prózdnin zhromadnje z našimaj wučerjomaj knjeni Čižankowej a knjezom Pašku na slědy Ćišinskeho podali. Započawši ze spěwom „Šćežka Ćišinskeho“ wobhladachmy sej w šuli zaměstnjeny muzej. Nazajtra rano wjedźeše nas puć k ródnemu domej w Kukowje, dale do Lipja a ke chěži, w kotrejž přebywaše Ćišinski poslednje lěta swojeho žiwjenja – to je nětčiša lutowarnja w Pančicach. Z busom jědźechmy do Wotrowa, zo bych­my rownišćo Ćišinskeho wopytali a tam mały kwěćel stajili. Zhromadnje zaspěwachmy při rowje hymnu našeje šule „My smy dźěći Šule Ćišinskeho“. A hdyž hižo we Wotrowje běchmy, podachmy so wězo tež na tamniši najwyši dypk Kopcy. Mějachmy překrasny wuhlad a zličichmy dohromady šěsć cyrkwjow, ko­trež wottam horjeka widźachmy. Po „šćežce Ćišin­ske­ho“ – pólnym pućiku mjez Wotrowom a Pančicami-Ku­kowom – nóžkowachmy zaso wróćo do šule. Běše to překrasna ekskursija, na kotrejž smy při kóždej staciji wosebity dźěl puzzla nadešli, kotryž je na kón­cu „Myto Ćišinskeho“ pokazał.

Rysowanka: Christin Lukašowa
Zalubowana kokoška Zalubowana kokoška by kokotej rad zdźěliła: „Njewostań ty w Chrósćicach, budź tla při mni w Ralbicach. Na žerdźi chcu z tobu sydać, zornjatka na dworje dypać.“ Ale kak to napisa? Nihdźe njeje papjerka – za to jenož jejko ma. Na póst jejko donjese, póstownik je kołkuje. Ow, jejdyrko – je rozbite. W.Š.