Z wudaća: póndźela, 21 septembera 2020

Rěčny certifikat złožili

Budyšin. Štyrjo wobdźělnicy z Łužicy a zwonka njeje su sobotu pruwowanje za Rěčny certifikat hornjoserbšćiny na niwowomaj A1 a A2 w Rěčnym centrumje WITAJ złožili. Z pomocu mustrowych pruwowanjow na internetnej stronje www.sprachzertifikat-sorbisch.de móžachu so zajimcy na pruwowanje přihotować. Aktualnje wuwiwa RCW material za schodźenkaj B2 a C1.

Wirus druhi raz zwěsćeny

Budyšin. W Budyskim wokrjesu maja pad, zo su pola wustrowjeneje koronapacientki wirus znowa zwěsćili, kaž strowotniski zarjad minjeny pjatk zdźěli. Samsny dźeń powjetši so ličba pozitiwnje testowanych wo štyri na dohromady 574. Budyski krajnoradny zarjad na to skedźbnja, zo su ludźo-dowolnicy, nawrótnicy z rizikowych kónčin, winowaći na strowotniskim zarjedźe so přizjewić.

Emmy za Mariju Schrader

W Budyskim Serbskim muzeju přehladku „Barby daliny“ wotewrěli

Budyšin (SN/CoR). Wotewrjenje lětušeje hłowneje wosebiteje wustajeńcy Budyskeho Serbskeho muzeja „Barby daliny – moler Ante Trstenjak a Łužiscy Serbja“ wotmě so wčera pod wěstotnymi wuměnjenjemi koronapandemije. Tak njejsu jenož někotrych zajimcow wobmjezowaneje ličby městnow dla zaso domoj pósłali. Tež partner z Narodneho muzeja w Praze njemóžeše statnych postajenjow dla přijěć. Ćim bóle so direktorka muzeja Christina Boguszowa wjeseleše, mjez hosćimi nimo direktora Załožby za serbski lud Jana Budarja a priwatnych wupožčowarjow z čěskeje stolicy tež sobuiniciatora přehladki Igora Pirca z Ljubljany a kuratorku Wuměłskeje galerije Maribor ­Andreju Borin witać móc.

Torsten Ruban-Zeh (SPD) je nowy Wojerowski wyši měšćanosta. W druhim wólbnym kole dosahaše jemu wčera ze 44,3 procentami jednora wjetšina hłosow. Z 33,4 procentami slědowaše Dorit Baumeister (njestronjanka). Kandidat AfD Marco Gbureck dósta 16,2 procentaj hłosow, zastupjerka CDU Claudia Florian jeničce 6,1 procent.

Wojerecy (SN/BŠe). „Wólbny wuslědk je za Wojerecy dobytk“, wuzběhny sakski hospodarski minister a předsyda SPD w swobodnym staće Martin Dulig. Wobydlerjo dóstanu tak město z přichodom, kotrež je wšitkim generacijam atraktiwne a strukturnu změnu na swoje dobro wužiwa. Tež předsyda sakskeje Lěwicy Stefan Hartmann nowemu wyšemu měšćanosće gratulowaše, skedźbnjejo zdobom na dobry wuslědk Dorit Baumeister, kotruž je Lěwica podpěrała.

Ruban-Zeh je jednaćel Dźěłaćerskeho dobroćelskeho zwjazka we Wojerecach a naslěduje Stefana Skoru (CDU), kiž njeje hižo k wólbam nastupił. Po kóncu wudobywanja brunicy ma komuna wulka wužadanje zmištrować. Wšako mnozy wobydlerjo w branši dźěłaja. Ruban-Zeh chce nadawkej wotpowědować.

Nic kóždy za sebje, ale wšitcy hromadźe po swojich móžnosćach – tajki angažement je za wožiwjenje delnjoserbšćiny wunošniši. Tohodla měli w Delnjej Łužicy Serbsku rěčnu radu załožić.

Lubin (HA/SN). We wokrjesu Sprjewja-Nysa, w bjezwokrjesnym měsće Choćebuzu kaž tež druhdźe zasadźeja so z mnohimi aktiwitami za serbsku rěč a kulturu. To zhonichu čłonojo Zwjazkoweho předsydstwa Domowiny na posedźenju minjeny pjatk w Lubinje, wokrjesnym měsće wo­krjesa Dubja-Błóta. Na žurli, hdźež so hewak wokrjesny sejmik schadźuje, witaše jich zastupowacy krajny rada Karsten Saß. Wón wu­zběhny, zo su w měsće a we wokrjesu na serbskim polu tójšto na dobro přeměnili a nadźěłali. K tomu přinošowali su wosebje wobšěrne a intensiwne diskusije wo serbskim sydlenskim rumje, kotremuž su město Lubin a wšelake komuny w Delnich Błótach přistupili. „Nětko pak, hdyž smy so tak rozsudźili, chcemy to tež w praktiskim dźěle za serbsku rěč, kulturu a identitu pokazać a zeskutkownić. Karsten Saß je připowědźił, zo chce wo­krjes Dubja-Błóta jako spěchowanski čłon Domowinje přistupić a wot lěta 2021 za serbske naležnosće 20 000 eurow wudać. Dörte Ziemer z Lubinskeho měšćanskeho zarjadnistwa mjez druhim ­na to skedźbni, zo přewjeduja w radnicy hižo dlěši čas kurs za serbsku rěč.

Berlin (dpa/SN). Na zetkanju ze zwjazkowej kanclerku Angelu Merkel (CDU) su kubłanska ministerka Anja Karliczek Karliczek (CDU), předsydka SPD Saskia Esken a kultusowi ministrojo zwjazkowych krajow dźensa wo połoženju na šulach a wo dalšim postupowanju w časach koronapandemije wuradźowali. Nimo wuměny wo skutkownosći směrnicow hygieny rěčachu tež wo dalšej digitalizaciji a wo dalekubłanju wučerjow we wobchadźenju z digitalnymi medijemi.

Swětnišćowy centrum dźěła

Berlin (dpa/SN). Zwjazkowa zakitowanska ministerka Annegret Kramp-Karrenbauer je dźensa nowy swětnišćowy operaciski centrum do słužby stajiła. Swětnišćo hraje we wěstotnych prašenjach dźeń a wjetšu rólu, rjekny politikarka CDU žurnalistam a oficěram w sewjerorynsko-westfalskim Uedemje. Wobkedźbuja a katalogizuja tam swětnišćowe objekty kaž tež swětnišćowe wotpadki, kotrež móhli ludźi na zemi wohrozyć.

Minister korony dla wotstupił

W Slepom je so wčera něhdźe sto ludźi zetkało a so zhromadnje do Rownoho na puć nastajiło. Na protestne lěsne wuchodźowanje bě Choćebuska wobswětowa skupina přeprosyła. Nimo potrjechenych z Łužicy bě tež přewodnik po přirodźe Michael Zobel z Porynskeje pódla, kiž je z wodźenjow po Hambachskim lěsu znaty. Po jeho słowach měli tudyši wobydlerjo wo kóždy kwadratny meter łužiskeho lěsa wojować, zo njeby so wudobywanja brunicy dla zničił. Foto: www.ideengruen.de/markus pichlmaier

Pozdatny čorny panter šěri strach a hrózbu mjez 650 wobydlerjemi juhošpaniskeje wsy Ventas de Huelma. Wjacori swědcy twjerdźa, zo su strašne rubježne zwěrjo widźeli. Wjesnjanosta ludźom tuž radźi, radšo doma wostać. Nětko chcedźa pasle nastajić a pantera, kiž je poprawom a Africe a Aziji doma, popadnyć. Pomocnicy z wjacorymi jězdźidłami a helikopterom za nim pytaja.

Město tradicionalneho natočenja piwa na oktoberskim swjedźenju w Mnichowje su tam sobotu demonstraciju škitarjow klimy dožiwili. Wjace hač sto wobdźělnikow w pisanych kostimach je na swjedźenišćo zaćahnyło, na kotrymž by so w normalnym času z ludźimi jenož tak mjerwiło. Koronakrizy dla běchu swjedźeń lětsa wotprajili. Loni je wjace hač šěsć milionow ludźi oktoberski swjedźeń wopytało.

Drježdźany (dpa/SN). Hladajo na raznje přiběracu ličbu koronainfekcijow w Čěskej sakska socialna ministerka Petra Köpping (SPD) wšitkich pućowacych namołwja, předpisy karanteny dla dodźeržeć. Wjacore kónčiny susodneho kraja, mjez druhim stolica Praha, su jako rizikowy region deklarowane. Štóž so wottam nawróći, je winowaty so na strowotniskim zarjedźe přizjewić, do domjaceje izolacije so podać a so testować dać, Köpping rozłoži. Wuwzaća płaća jeno za wěste skupiny ludźi, kaž za powołanskich dojězdźowarjow, kotřiž trajnje w Čěskej bydla. Połoženje je dale chutne, ministerka potwjerdźi. Wona na wobydlerjow apeluje, „swoju zamołwitosć chutnje brać a radšo dokładnje rozmyslować a zamołwiće rozsudźić“.

Brüssel (dpa/SN). Přewodźana wot raznych protestow wonkowneju ministerstwow w Moskwje a Minsku je so nawodnica běłoruskeje opozicije Swjetlana Tichanowskaja dźensa z wodźacymi zastupnikami EU w Brüsselu zetkała. Społnomócnjeny EU za wonkowne naležnosće Josep Borrell bě 38lětnu Tichanowskaju na dźěłowu snědań do zetkanja wonkownych ministrow EU přeprosył. Wonkownej ministerstwje Běłoruskeje a Ruskeje kritizujetej to jako měšenje do nutřkownych naležnosćow Běłoruskeje. Europska unija wuslědk běłoruskich prezidentskich wólbow 9. awgusta njepřipóznawa a ma Swjetlanu Tichanowskaju za woprawdźitu dobyćerku.