Z wudaća: póndźela, 21 septembera 2020

Budyšin. Ličby, fakty a orientacija na temu bydlić maja so wot januara přichodneho lěta znowa zestajeć. Kaž je dźěłowa skupina z Budyskeho měšćanskeho zarjadnistwa wobzamknyła, maja so daty wot januara zběrać. Hač do wozjewjenja dokumenta płaći dale 7. Budyski přehlad wo podružach. W dźěłowej skupinje skutkuja zastupjerjo wotnajerjow bydlenjow, hamtskeho sudnistwa kaž tež wuběrka za dobrozdaća Budyskeho wokrjesa. Wobhonić móža so zajimcy pola wotpowědneho partnera na komunalnym zarjedźe za statistiku pod mejlowej adresu , pod telefonowym čisłom 03591/534 491 abo pod: https://www.bautzen.de/leben-in-bautzen/wohnen-bauen/wohnen/

Zwjazkowa wobora zwučuje

Za demokratiju, tolerancu a wotewrjenosć swětej napřećo

Wojerecy (AK/SN). Iniciatiwa Ciwilna kuraža Wojerecy wobdźěli so z bohatym programom na lětušim mjezykulturnym tydźenju. To praji Cindy Paulick, sobudźěłaćerka koordinaciskeho městna kubłanje za politisko-historiske projekty. „Lětuše hesło rěka ‚Hromadźe žiwi być – hromadu zrosć‘. Wot 27. septembra do 11. oktobra budu w našim měsće mnohe akcije, lětsa prěni króć z kolesowanjom. Tež ći najmjeńši změja zaběru“, wona rozjasnja. Mjezykulturny tydźeń ma wabić za tolerancu, respekt a akceptancu, za swobodno-demokratiski porjad. „Wón je w Němskej po generacijach rostł, a w nim leži přichod našeje towaršnosće“, Cindy Paulick podšmórnje.

Wažne na mjezykulturnym tydźenju je, zo su tež šule na poskitkach wobdźělene. Zarjadowanja jeno za swoje kubłanišćo přihotuje mjez druhim Lessingowy gymnazij. Šulerjo dožiwja sceniske pokazki a dokumentarne filmy a nazhonja, kotre wuskutki rasizm ma. Woni wuknu, kak móža so jemu wobarać.

Sprjejcy (SN). Wjes z němskim mjenom Spreewitz ma hižo dlěje derje dokumentowanu cyrkwinsku chroniku. Nětko su zakónčili zwjazk čisło III a IV, zdźěli farar tamnišeje ewangelskeje wosady Jörg Michel. W třećim zwjazku dokumentuja čas wot 1945 do 1972, a to z mnohimi dodatkami. Štwórty zwjazk jako kónc zaběra so z lětami 1973 do 2020. Zapřijate su tam barbne fotowe napohlady ze Sprjejčanskeje cyrkwje, přewodnik za nju kaž tež za cyrkej w Bórkhamorje. Bjezdwěla jimace budu z dźensnišeho wida přinoški w rubrice „Małe regionalne krótkostawizny“. W nich namaka čitar zapiski Arnošta Muki wo prusko-hornjołužiskich Serbach, wo kotrychž je wón 1884 pisał, a wo dźělenju Łužicy 1815. Nadrobnišo zaběraja so w brošurce tež z wołtarjom w Sprjejčanskim Božim domje a z emporu. Zajimc móže dale čitać wotrězki wo regionalnych cyrkwinskich stawiznach. Hač do dźensnišeho časa sahaja rozestajenja wo tym, zo bu kónčina w lěće 2004 do cyrkwje Berlin-Braniborska přewzata.

Delni Wunjow (GK/SN). Sewjerna wjesna tafla Delnjeho Wunjowa je wot 21. awgusta zaso dwurěčnje popisana. Nětko tam čitamy: „Niederuhna – Delni Wunjow“.

Hač do lěta 1936 bě sydlišćo samostatna gmejna, po tym wjesny dźěl a za čas NDR formalnje jenož hišće dróha susodneho Hornjeho Wunjowa, doniž so wopřijeće „Delni Wunjow“ dospołnje z taflow njezhubi.

Wjesnjenjo so jara wjeselachu, jako Budyski wyši měšćanosta Alexander Ahrens (SPD), měšćanskej rada a zarjadnistwo wobydlerske požadanje akceptowachu a Delnim Wunjowje znowa status samostatneho dźěla sprjewineho města přiznachu. „To je dobry přikład woby­dlerjam bliskeje komunalneje politiki! Nětko so nadźijamy, zo přichodnje tež na južnym kóncu sydlišća wotpowědnu wjesnu taflu připrawja“, podšmórny sobuiniciator požadanja Gerat Krawc.

FC Energija Choćebuz – VfB Germania Halberstadt 0:2 (0:1)

Zestawa hosći: Stawecki – Rahn, Storb, Koch, Borgmann, Fl. Brügmann, Pelivan (78. Gladrow), Geisler (59. Hoppe), Kremer, Fe. Brügmann, Stettin (59. Mäder)

Tež po tym zo běchu trenarja Sebastiana Abta pušćili, njebě ničo wo polěpšenju trenda FC Energije Choćebuz widźeć. W pjatej hrě w Auerbachu poćerpje wona štwórtu poražku 2:5. W domjacej partiji drje wobsedźeše nětko nimale přez cyły čas bul, z wrotowym wuspěchom pak sej to mytowała njeje. Florian Brügmann a jeho partner w nadběhu Nils Stettin staj w prěnim połčasu najlěpše šansy wuwostajiłoj. A tak přińdźe kaž hižo husto. Sporadiski nadběh a róžk wužichu hosćo k nawjedowanju 0:1 (44.).

Tež po přestawce Choćebuženjo wrota VfB nadběhowachu, přeco zaso pak zwrěšćichu na klewernosći a wusahowacym wrotarju Florianu Sowade. Jedyn z wjacorych konterow wotzamknychu hosćo k 0:2 (79.). Wołanje za „prawym“ nowym trenarjom bu wótřiše. Přeco zaso bě mjeno Wollitz w rjadach přiwisnikow słyšeć, kotřiž měnjachu, zo móhł to prawy muž za FC Energiju być.

Georg Zielonkowski

Prěnje koparske mustwo Sportoweje jednotki Chrósćicy je swoju prěnju domjacu dypkowu hru noweje sezony dobyło. We ­wokrjesnym derbyju přesadźichu so chowancy trenarja Pavela Runta přećiwo Drohotce Ramnow z 1:0. Rozsudne wrota třěli ­Miroslav Sentivan (naprawo, Chrósćicy) Foto: Jörg Stephan

Awtorka dźensa Halena Jancyna

Koronapandemija ma wuskutki na kóždy sport, tež na konjacy. Kaž sće hižo čitali, bě konjace sportowe towarstwo Při Klóšterskej wodźe njedawno jěchanski turněr na sportnišću w Hórkach přewjedło. Dołho njebě jasne, hač a jeli haj, pod kotrymi wuměnjenjemi je wubědźowanje móžne. Najprjedy njeběchu přihladowarjo dowoleni, pozdźišo jenož minimalna ličba, bychu-li turněr bjez hygienoweho koncepta přewjedli. Předsydstwo je so za tajki koncept a tuž za přihladowarjow a wjac dźěła rozsudźiło. Ale što dyrbi do koncepta, štó je zamołwity, kotre naprawy su trěbne, što maš přidatnje organizować a wobstarać? Wšo prašenja, na kotrež dyrbjachu zamołwići wotmołwić a wo kotrychž mějachu wuradźować. Přewjesć turněr rěkaše tuž tójšto koordinacije za cyłe towarstwo. Wulke wužadanje pak je so poradźiło.

TSV Wachau – ST Marijina hwězda 4:1 (3:0)

Zestawa hosći: O. Schmidt – Peschmann, Zelnak, Łušćanski, R. Cyž, P. Schmidt, Pjetaš (68. Kurink), Ch. Cyž, Čornak (46. Langer), Hawš, Eldor (84. Krawc)

Kopańca, regionalna liga muži

1. Viktoria Berlin 6 12 : 4 18

2. VSG Altglienicke 6 15 : 8 15

3. BSG Chemija Lipsk 6 11 : 4 12

4. Union Fürstenwalde 6 16 : 10 12

5. Lok Lipsk 6 10 : 6 11

6. BFC Dynamo 6 17 : 11 10

7. FC Carl Zeiss Jena 6 12 : 7 9

8. FSV 63 Luckenwalde 6 9 : 12 9

9. Kamjeničanski FC 6 9 : 9 8

10. ZFC Meuselwitz 6 9 : 10 8

11. VfB Auerbach 6 10 : 12 7

12. Berlinski AK 6 11 : 14 7

13. Hertha BSC II 6 9 : 13 7

14. FC Energija Choćebuz 6 8 : 10 6

15. SV Babelsberg 6 7 : 9 6

16. Biskopičanske KT 6 9 : 14 6

17. Tennis Borussia Berlin 6 9 : 11 5

18. SV Lichtenberg 47 6 5 : 10 5

19. Optik Rathenow 6 6 : 14 4

20. Germania Halberstadt 6 4 : 10 3

Vatikan (B/SN). Po wótrej kritice němskich biskopow na dokumenće z Roma wo wosadnych reformach poskića Vatikan wujasnjowacu rozmołwu. Klerusowa kongregacija biskopow rady přijmje, zo bychu dwěle a rozhorjenosć wotstronili. To rjekny nawoda kongregacije, kardinal Beniamino Stella. Wón nochcyše so k tomu wuprajić, čehodla bu instrukcija bjez připowědźenja biskopam posrědkowana, kotřiž runje na tam wopisanych přerjadowanjach dźěłaja.

Spěchuje cyrkwinske twary

Hannover (B/SN). Załožba k zachowanju cyrkwinskich twarskich pomnikow w Němskej (KiBa) je loni sto projektow k saněrowanju cyrkwinskich twarow z 1,5 milionami eurow podpěrała. Mjez nimi běchu cyrkwje w 19 wosadach Braniborskeje, 20 w Mecklenburgsko-Předpomorskej, 17 w Durinskej a 14 w Saksko-Anhaltskej. Wot časa załoženja 1997 je załožba nimale tysac cyrkwjow spěchowała. Nawoda jeje předsydstwa Eck­hart von Vietinghoff wujasni, zo je za čas koronapandemije wuznam cyrkwinskich twarow jasnje spóznajomny. „Tež cyrkwje su runje w krizach za nas wšitkich nuznje trěbne.“

Misereor žada sej škit klimy