Z wudaća: wutora, 17 nowembera 2020

Ličba nowoinfekcijow woteběra

Budyšin. Wo dalšej zemrětej pacientce a 59 nowych natyknjenych z korona­wirusom w Budyskim wokrjesu je kraj­noradny zarjad wčera informował. 2 031 ludźi je schorjenych, z nich 63 (+3) stacionarnje lěkuja. Wot štwórtka budu wojacy Zwjazkoweje wobory w Budyskej chorowni zasadźeni. W Zhorjelskim wokrjesu zwěsćichu wčera dalšej infekciji a dwaj smjertnej padaj.

SŠT zhromadźiznu přesunje

Budyšin. Płaćacych wukazow knježerstwa dla přesunje Serbske šulske towarstwo swoju hłownu a wólbnu zhromadźiznu. Předsydstwo towarstwa je rozsudźiło, přewjesć 23. januara 2021 listowe wólby. Tuchwilu zběraja woni mjez čłonami namjety za nowe předsydstwo. Wjelelětna předsydka Ludmila Budarjowa runje tak kaž někotři dalši čłonojo k wólbam hižo njenastupja.

Nakupy za mjezu wusadźene

Serwjety z napisom hornjo- a delnjoserbskeho spěwa słušeja k wosebitym poskitkam Budyskeje Serbskeje kulturneje in­formacije, kotrež je wona hromadźe z Choćebuskim towarstwom Studnja wudała. Sobudźěłaćerce SKI Maria Swierczekowa a Jacqueline Bjeńšec (prědku) poradźuja kupcow wotnětka we wotewrjenskim času wot 10 do 14 hodź. Foto: SN/Hanka Šěnec

Diana Šołćina

Kajke ma naše žiwjenje wupadać, kak chcemy naslědnosć zaručić. Zo móhli so z tym rozestajeć, kajki měł naš přichod być, měli sej wuwědomić, kotre zakłady w přitomnosći kładźemy. Što zakótwimy w towaršnosći, zo bychmy naslědnosć w najlěpšim zmysle zmóžnili.

Namjet Domowiny, serbski medijowy centrum wutworić, budźi prašenja

Budyšin (SN/JaW). Diskusija wo nowych dźěłowych směrnicach Domowiny połnje běži. To zdźěli na naprašowanje předsyda třěšneho zwjazka Dawid Statnik. Wot spočatka oktobra naćisk župam a towarstwam předleži. Tež prezidij zwjazka je přidźěło a předležacy druhi naćisk hižo rozjimał a za wobjednanje w zwjazkowym předsydstwje schwalił.

Kaž Dawid Statnik dale zdźěli, chcedźa so čłonojo Zwjazkoweho předsydstwa Domowiny 11. decembra z naležnosću zaběrać a „předležacy naćisk za diskusiju na hłownej zhromadźiznje wobzamknyć“. Statnik pak pokaza tež na to, zo móhło zwjazkowe předsydstwo naćisk „změnić abo wotpokazać“. Na diskusiji wo nowych směrnicach, kotrež maja hač k přichodnej hłownej wólbnej zhromadźiznje 2023 płaćić, móže kóždy namjety zapodać. Wšako je we wustawkach rjadowane, „zo Domowina dźěłowe směrnicy ma a zo njeje nichtó wuzamknjeny swoje ideje a mysle přinošować“.

Praha (SN). W Praskim nakładnistwje Epocha je runje wušła wobšěrna kniha prof. dr. Leoša Šatavy „Serbja na wróćicy 20./21. lětstotka“. Nowostka wopřijima najwuznamniše popularne kaž tež wědomostne teksty čěskeho awtora – wón je wot 1996 do 2001 jako wědomostnik w Serbskim instituće dźěłał –, wusměrjene na łužisku problematiku. Hłowne temy su etniskosć, rěč, stawizny a kultura. Knihu dopjelnjeja něhdźe 80 fotow, dwě karće a bohata bibliografija. Titul ma bórze tež w Budyskej Smolerjec kniharni na předań być.

Zhorjelski wokrjes je wobšěrne naprawy zahajił, kotrež maja dalšemu wupřestrěću afriskeje swinjaceje mrětwy (ASP) zadźěwać, podšmórny tamniši krajny rada wokrjesa Bernd Lange (CDU) minjeny štwórtk na nowinarskej rozmołwje w Zhorjelcu.

Zhorjelc (AK/SN). 27. oktobra su blisko Nysy inficěrowane dźiwje swinjo našli. To wšak pokazuje, zo drje su prěnje ­škitne naprawy pomhali, kotrež w juniju zahajichu. Wokrjes, gmejny a ministerstwo swobodneho stata a Zwjazka su hromadźe na tym dźěłali. Wokrjes z wjele ratarskimi zawodami, hdźež mjez druhim tež swinje plahuja a mjaso předźěłuja, je přiwšěm wosebje potrjecheny. Přede­wšěm wjele wužitneho skotu maja před mrětwu škitać. W Kodersdorfje na přikład je zawod z něhdźe 25 000 ­swinjemi.

Nałožki hajić a narodnu drastu Slepjanskeho regiona zachować stej Heidemari Rychtarjowej wěc wutroby. Hižo wjele lět wona w Slepom a wokolinje w towarstwach aktiwnje sobuskutkuje a je wot 2014 zdobom předsydka tamnišeje Domowinskeje skupiny. Minjeny měsac počesćichu Slepjanku za čestnohamtske skutkowanje w Budyšinje z Čestnym znamješkom Domowiny.

1952 w Mužakowje rodźena maturowaše na Choćebuskej Serbskej rozšěrjenej wyšej šuli. Tam bě sej zdobom delnjoserbšćinu přiswojiła. Po maturje studowaše wona aziske wědomosće na Berlinskej Humboldtowej uniwersiće, zwotkelž so 1977 z mandźelskim do Slepoho nawróći.

Berlin/Drježdźany (dpa/SN). Nimale lěto po spektakularnym rubježnistwje w Drježdźanskim Zelenym wjelbje je­policija dźensa rano w Berlinje třoch podhladnych zajała. Jich chcychu w běhu dnja sudnikej předstajić, kaž Drježdźanske statne rěčnistwo zdźěli. Wot ranja přepytuje policija cyłkownje 18 objektow w stolicy, mjez nimi dźesać bydlenjow, garaže a jězdźidła. Na akciji je 1 640 policistow z Berlina a wjacorych zwjazkowych krajow wobdźělenych. Njeznaći běchu loni w nowembru w Zelenym wjelbje wuměłske drohoćinki rubili.

Lockdown w Awstriskej

Wien (dpa/SN). W boju přećiwo koronapandemiji je Awstriska zjawne žiwjenje na najniši móžny staw wobmjezowała. Wot dźensnišeho hač do 6. decembra smědźa ludźo bydlenje jenož hišće z wažnych přičin wopušćić, na přikład za nakupowanje abo na dźěło. Najwjace wobchodow je zawrjenych. Šule jenož hišće internetnje wuwučuja. Ličba nowych infekcijow bě naposledk raznje přiběrała.

Biden trjeba podłožki

Po cyłej Ruskej nastawaja tuchwilu prowizoriske chorownje. W Moskwje přetwarichu lodosportowu halu, zo móhli tam na korona­wirus schorjenych lěkować. Hižo něšto tydźenjow ličba inficěrowanych w kraju razantnje přiběra. Ruske zarjady přizjewichu wčera 22 778 nowych infekcijow. Jeničce w stolicy Moskwje bě to 6 390 padow. Foto: pa/Reuters/Maksim Šemjetow

Při wuchodźowanju z psom je so žona njedźelu w lěsu pola bayerskeho Coburga zabłudźiła. Wona zamó policiju hišće wo tym informować, zo je w błóće tčacy wostała. Na to pak njebě hižo docpějomna. Po wulkej pytanskej akciji nańdźechu zastojnicy žonu hač do brjucha stejacu w błóće wotpušćeneho hata a móžachu ju na zbožo wuchować. Swoju słužbnu drastu wšak po tym hižo wužiwać njemóžachu.

Widejo z mrowjemi, kotrež kaž dźiwje wokoło mobilneho telefona běhaja, je na Facebooku wjele kedźbnosće wubudźił, a to pod hesłom „Widejo pokazuje wjace hač kóždažkuli studija“. Zamóža elektromagnetiske pruhi handyja mrowje tak wobwliwować, zo so w kruhu pohibuja? Po analyzy wideja fachowcy měnja, zo jedna so wo manipulaciju. Tak je filmčk po wšěm zdaću na kompjuteru nastał.