Z wudaća: srjeda, 13 januara 2021

Incidenca něhdźe konstantna

Budyšin/Zhorjelc. We wokrjesu Budyšin su wčera 164 dalšich z koronawirusom natyknjenych zwěsćili. W chorownjach lěkuja 237 pacientow, 34 z nich na intensiwnej staciji. Štyrjo schorjeni su wčera zemrěli. Incidenca w Budyskim wokrjesu wučinja 480,33. W Zhorjelskim maja tuchwilu 3 011 natyknjenych (+ 124), jědnaće wosobow je zemrěło. Incidenca tam je 436,44.

Statne zrěčenje podpisałoj

Drježdźany/Magdeburg. Ministerskaj prezidentaj Sakskeje a Saksko-Anhaltskeje Michael Kretschmer a Reiner Haseloff (wobaj CDU) staj wčera nowe statne zrě­če­nje za MDR podpisałoj. Durinski premier Bodo Ramelow (Lěwica) bě jemu hižo­ do hód přihłosował. Nětko móža mjez druhim nowu rozhłosowu radu ­zestajeć, jeli parlamenty zrěčenje schwala, zdźěli powěsćernja dpa.

Płomjo znowa online

Wot póndźele dźěła šćěpjenski centrum w sportowni při Kamjenskim lětanišću. Mjeztym su tam w zamołwitosći Němskeho čerwjeneho křiža (DRK) wjacore sta ludźi pře koronu šćěpili. Wšědnje po informacijach jednaćela DRK Budyšin Petera Marka 200 wosobow šćěpja, sto z nich z pomocu mobilnych teamow. Wšědny kontingent šćěpiwa hač na poslednju dozu přetrjebuja a ničo preč njemjetaja. Tuchwilu wšak maja techniske ćeže dojednanja terminow online dla pod: https://sachsen.impftermin­vergabe.de/. Telefonisce ma to wot ju­třišeho móžno być. Foto: René Plaul

Hornjołužiski festiwal komorneje hudźby, po swójskim podaću najmłódše zarjadowanje toho razu w Sakskej, chce nas nazymu druhi raz pod hesłom „Zetkawanja“ z wobšěrnym programom zabawjeć. Z přidatnym koncertom je lětsa cyły kulturny rum Hornja Łužica-Delnja Šleska zastupjeny.

Budyšin/Zhorjelc (SN/bn). Patronat komornohudźbneho festiwala wukonjataj krajnaj radaj Budyskeho resp. Zhorjel­skeho wokrjesa Michael Harig a Bernd Lange. Jako festiwalneho pósłanca zdobychu sej zarjadowarjo wospjet ministerskeho prezidenta Sakskeje Michaela Kretschmera (wšitcy CDU). Kooperaciscy partnerojo su festiwal komorneje hudźby Krzyżowa-Music, festiwal šesćiměstow Přińc a woteńć, Sakska hudźbna rada, Carla Bechsteinowa załožba a Serbski ludowy ansambl.

Nowe lěto čaka z nowymi nadawkami. Te złožuja so wosebje na dotal wuspěšnje zdokonjane dźěło. Tak je to tež pola Serbskeho šulskeho towarstwa.

Budyšin (SN/MiR). „Minjene lěto bě cyle wosebite za kóždeho z nas. Korona je nas w pu­tach měła a hišće dale ma“, zdźěli předsydka SŠT Ludmila Budarjowa. W dźěćacych přebywanišćach towarstwa we Wotrowje, Němcach, Malešecach, Ralbicach a Chrósćicach kaž tež w delnjołužiskimaj w Žylowje a Choćebuzu su loni hišće dostojnje ptači kwas kaž tež póst­nicy a zapust swjećili. Po tym běše nadobo kónc. Byrnjež tež rěčne prózdninske lěhwo přestorčić dyrbjeli, su je ze 44 dźěćimi – lěto do toho bě jich 70 wobdźělnikow – přiwšěm wuspěšnje přewjedli.

Hižo minjeny tydźeń bě so we Łužicy sněžiło. Tež wčera je so dosć sněha našło­. Zo bychu ludźo stajnje ćopłe bydle­nje a milinu měli, su łužiske milinar­nje njeparujomne. Wone tuž z połnej paru dale dźěłaja.

Choćebuz (SN/BŠe). W prěnim tydźenju noweho lěta běchu štyri łužiske bruni­cowe jamy předewzaća Łužiska energija a milinarnje (LEAG) kaž tež jeho tři łužiske milinar­nje w Braniborskej a Sakskej połnje wućežene. Runje nětko w ćmowym počasu zawěsćeja wone zastaranje ludnosće w Němskej z milinu. Wšako solarne připrawy a wětrniki tuchwilu wjele energije njeprodukuja. W minjenych dnjach bě jara mało słónca, a wětřika zdźěla tež žanoho njebě.

Z nowym lětom zahaji so za Andreju Nowa­kowu tež nowy žiwjenski wotrězk, a to jako lektoratna asistentka w Ludowym nakładnistwje Domowina. Tak je so 40lětna zaso do Łužicy, znajmjeńša powołansce, nawróćiła. Wotrostši w Starej Cyhelnicy je po maturje na Serbskim gymnaziju Budyšin w Drježdźanach ger­ma­nistiku, anglistiku a sociologiju studować započała, bórze pak wukubła so na korespondentku za jendźelšćinu, fran­cošćinu a španišćinu. Jako tajka je po połlětnym přebytku w južnej Francoskej 15 lět na Drježdźanskej rěčnej šuli dźěłała, so zmandźeliła, swójbu załožiła a so w sakskej stolicy zažiwiła.

Berlin (dpa/SN). Zymske wobstejnosće na dróhach su minjenu nóc w Němskej wobchadny chaos zawinowali. Na sewjeru Delnjosakskeje dyrbjachu wotrězk awtodróhi zalodźeneje jězdnje dla zawrěć. Na juhu a zapadźe so wobchad kopješe, po tym zo běchu awta tčacy wostali. Při wjacorych njezbožach je znajmjeńša jedna wosoba žiwjenje přisadźiła. Wjacore so ćežko zranichu. Zwjetša pak wosta při blachowych škodach, kaž policija zdźěli.

Proces přećiwo mafiji

Lamezia Terme (dpa/SN). Na juhu Italskeje je so dźensa proces přećiwo 350 čło­nam a pomocnikam mafijoweje organizacije Ndrangheta zahajił. Jednanje je jedne z najwjetšich procesow přećiwo mafiji minjenych lětdźesatkow. Fachowcy rěča wo wažnym signalu stata, kotryž chce tak swoju móc w boju přećiwo organizowanej kriminaliće pokazać. Za proces, kotryž drje budźe dwě lěće trać, su wosebite twarjenje přihotowali.

Mortwi při israelskich nalětach

Lěkarski personal w škitnych woblekach wita tule němsku narodnu wubranku mjetarjow, kotraž je wčera k swětowym mišterstwam na lětanišću egyptiskeje stolicy Kaira přizemiła. Tam měrjachu tež temperaturu prezidenta zwjazka mjetarjow Andreasa Michelmanna (srjedźa). Čěska a USA su swoje wobdźělenje na turněrje wotprajili, po tym zo běchu we wjacorych mustwach pady­ natyknjenjow z koronawirusom zwěsćili. W šwedskej wubrance je dźesać hrajerjow potrjechenych. Foto: dpa/Sascha Klahn

Młódšich ludźi přećiwo koronawirusej šćěpić chcedźa wot dźensnišeho w Indoneskej. Jako prěni je so prezident Joko Widodo w swojim palasće šćěpić dał. Slědu­ja sobudźěłaćerjo strowotnistwa a wosoby w starobje 18 do 59 lět. Po tym puću chcedźa docpěć, zo su wulke dźěle wobydlerstwa spěšnje škitane. Nabožinscy nawodźa kraja z 270 milionami wobydlerjow su wobkrućili, zo njeje serum ze swinjacych produktow zhotowjeny a so tuž za muslimow hodźi.

Sarkastiske pokiwy policije je muž w Berlinje na puć dóstał, po tym zo běchu jeho ze 105 km/h na jednej z hłownych dróhow stolicy lepili. Štóž najebać zymske puće dwójce tak spěšnje kaž dowolene smali, změje dwaj měsacaj chwile zwěsćić, hač so „póduše čriji na chódniku suwaja. 280 eurow pokuty by za tójšto jězdźenkow dosahało“, policija pisa.

Berlin (dpa/SN). Rozesłanje dobropisow za škitne nahubniki typa FFP 2 za ludźi, staršich hač 60 lět a za chronisce chorych so po posudku Zwjazka apotekow Němskeje chětro dliji. „Stajnje zaso so kupcy w apotekach prašeja: Hdźe wostanu dobro­pisy?“, rjekny wčera zastupowaca předsydka zwjazka Ursula Sellerberg powěsćerni dpa. Runje tak so ludźo stajnje zaso prašeja, hač móhli hišće raz darmotne nahubniki dóstać, dokelž dotal žane dobropisy nimaja.

Zwjazk bě wobzamknył, wot koronawirusa wosebje wohroženym derje ški­tace nahubniki FFP 2 přewostajić, štož je w Němskej hač do 27 milionow ludźi. W prěnjej kročeli móžachu sej potrje­cheni w decembru tři nahubniki w apo­tece darmotnje wotewzać. Wot 1. januara mějachu woni wot chorobnych kasow wotpowědne dobropisy za dwójce šěsć nahubnikow ze swójskim podźělom po dwěmaj euromaj dóstać. Zwjazkowa ćišćernja je minjeny tydźeń započała dobropisy rozdźěleć. Za přepakowanje a rozesłanje su chorobne kasy zamołwite. ­Akcija płaći němske zwjazkowe knježerstwo 2,5 miliardow ­eurow.