Z wudaća: pjatk, 15 januara 2021

Budyšin (kl/SN). Prěnje wuradźowanje lěta 2021 je předsydstwo Budyskeje župy „Jan Arnošt Smoler“ wčera telefonisce přewjedło. Koronapandemije dla běchu čłonojo rozsudźili tuchwilu so wosobinsce njezetkać.

Wobdźělnikam předstaji so Beno Sćapan z Radworja. Župne předsydstwo bě jeho jako kandidata za Zwjazkowe předsydstwo Domowiny za dobu 2021–2025 namjetowało. Hdy nowy gremij wuzwola, ma Zwjazkowe předsydstwo Domowiny kónc januara rozsudźić. Beno Sćapan je čłon Radworskeho młodźinskeho kluba, čłonskeho towarstwa župy Budyšin. Wón je dźakowny za dowěru a chce po wuspěšnych wólbach wažny zwisk mjez župnym předsydstwom a najwyšim gremijom Domowiny zaručić.

Dalše ćežišćo běchu přichodne terminy a projekty. Lětsa chce župa znowa na dźeń wotewrjenych duri w Njechornju přeprosyć. Nadrobniše přihoty wšak dotal móžne njejsu. Maja tuž wočaknyć, kak so połoženje korony dla wuwije.

Předsydstwu župy je dale wažne, zo by skutkowanje motiwatora za wozrodźenje serbskeje rěče w kónčinach, hdźež serbšćinu wšědnje wjace njerěča, wobstajnje rozšěrjało a wobsahowje podpěrało.

Na parkowanišću před jednym z Choćebuskich nakupowanišćow su so w nocy ­na srjedu wjacore awta palili. Při tym buchu tři dospołnje zničene, dalše bu wobškodźene, kaž rěčnica policije zdźěli. Nimo toho je so jědnaće wotpadkowych sudobjow paliło. Dokelž stejachu wone blisko wjaceswójbneho domu, bu tež jeho fasada wobškodźena. Wohnjowa wobora zasadźi wjacore hašenske awta a móžeše płomjenja podusyć. ­Přičina wohenja njeje dotal znata. Policija wuchadźa ze zapalerstwa a pad nětko ­přepytuje. Foto: Michael Helbig

Praha (ČŽ/K/SN). W susodnej Čěskej bu loni 18,8 procentow mjenje nowych wosobowych awtow předatych hač lěto do toho. 202 971 jězdźidłow su překupcy wotbyli, přibližnje 47 000 eksemplarow mjenje hač lěta 2018. Hłowna přičina nišeho wotbytka wosobowych awtow su razne naprawy přećiwo koronawirusowej pandemiji, předewšěm dlěšodobne za­wrjenje tež awtopředawarnjow. Najbóle prašane běchu přiwšěm Škodowki wšěch typow, kotrychž su 74 786 štuk předali (porno 2019 minus 13 proc.). Na druhim městnje slěduje Volkswagen ze 16 767 ­kupjenymi awtami (minus 19 procentow), a na třećim Huyndai ze 16 030 kupcami (minus 17 proc.). Cyłych 74 procentow wotbytych wosobowych jězdźidłow su firmy kupili. Mjenje zajima je hłownje wo z bencinom a naftu ćěrjene wozydła było. Pola elektromobilow nasta porno tomu hotowy rozkćěw – z předanju 3 267 e-awtow přiby wotbytk wo rekordnych 331 procentow. Hybridnje ćěrjene awta mějachu 1 979 kupcow a z tym plus wo 318 procentow. Motorskich dźěše 21 518 mašinow z wobchodow a z tym 16 procentow wjace hač lěto do toho.

Wot wčerawšeho poskićeja w kuchni Čornochołmčanskeho Krabatoweho młyna zaso słódne butřankowe plincy. Zajimcy móža sej je tam telefonisce skazać a w dojednanym času wotewzać. Sobudźěłaćerka Krabatoweho młyna Katrin Nemeth (nalěwo) „plincowe skazanki“ přijimuje a posrědkuje je kuchinskej ekspertce Ance Stephan (naprawo), kotraž plincy pječe. Wčera hišće telko dźěła njemějachu, prěnje skazanki za přichodne dny pak hižo předleža. Foto: Gernot Menzel

Ze šćěpjenskim srědkom schadźa w času korony nadźija. Jako jedne z prěnich zarjadnišćow we Wojerecach dósta hladarnja Hanspach móžnosć, wobydlerjow a hladarjow šćěpić dać. Silke Richter je so z nawodnicu a mějićelku domu Andreju Jatzlau rozmołwjała.

Što sće jako prěnje mysliła a začuwała, jako bu znate, zo su šćěpiwo pře koronu wuwili.

A. Jatzlau: To bě za mnje wulke wolóženje. Woprawdźitu nadźiju pak mějach hakle z přizwolenjom produkcije w Němskej. Běch z toho wuchadźała, zo budu najprjedy we wulkich zarjadnišćach šćěpić započeć a zo budźemy dyrbjeć mocy nałožić, zo bychmy tež my termin dóstali. Dokelž njejsmy dotal pola nas žanu koronainfekciju měli, nadźijach so wězo na spěšne jednanje. 1. januara je nam Čerwjeny křiž Drježdźany šćěpjenski termin zdźělił. Ale hakle, jako team maltezow ze srědkom před durjemi steješe, doskónčnje do toho wěrjach.

W zašłosći hižo sće dźakowano lěkarjam kaž dr. Matthiasej Jochmannej, wot kraja „přikazane“ wuměnjenja na přikład za testowanje na koronu přesadźić móhli. Wón je personal kubłał.

Budyšin. Tuchwilna zymička wabi won do přirody. Wšako su dźěći doma a trjebaja zabawu. Prawy to čas, sej zaběru wonka pytać. Chcemy tuž fota wo wašich dožiwjenjach při zabawje w sněze wozjewić. Snadź je tež bórze móžno na lodźe so smykać abo lodohokej hrać. Sćelće nam swoje wobrazy z mejlku na redaktion@serbske-nowiny. de a přidajće k tomu krótku informaciju, što sće dožiwili. My motiwy rady wozjewimy.

BTU z online-poskitkom

Zły Komorow/Choćebuz. Na Braniborskej techniskej uniwersiće wotmě so wčera dźeń digitalneje orientacije. Wysokošulskemu kubłanišću poboku bě Braniborska syć za studijnu orientaciju. Termin na kubłanišću bě wysokošulskemu dnjej w Sakskej přiměrjeny. Přetož w Złym Komorowje kaž tež w Choćebuzu wobstajnje tež wulka ličba zajimcow ze Sakskeje studuje.

Šansa dale wobsteji, so za demokratiju zasadźeć

Budyšin (CS/SN). Financny wuběrk Budyskeje měšćanskeje rady diskutuje tuchwilu wo tym, koordinaciske a fachowe městno partnerstwa za demokratiju (KuF) dale wjesć abo nic. Tele fachowe městno ma swoje sydło w Budyskim Kamjentnym domje. Dotal bě rěč wo 50 000 eurach za personalne kóšty a 10 000 eurach za zjawnostne dźěło. Runje tele dźěło běše přewodźacy wuběrk města Budyšina při ewaluaciji skutkowanja KuF jako polěpšenjahódne posudźował. Hewak pak maja čłonojo wuběrka skutkowanje KuF za přewažnje spo­móžne.

Korony dla njebě móžno wšitke planowane projekty zwoprawdźić, mjez druhim njejsu konferencu wo demokratiji přewjesć móhli. Tak so njedawno na wuradźowanju financneho wuběrka prašachu, hač njejsu pjenjezy z lěta 2020 zbyli. „Njewužiwane pjenjezy dyrbimy Zwjazkej wróćić“, rjekny Budyski měšćanosta za financy, porjadk, kubłanje a socialne dr. Robert Böhmer. Wotličenje za lěto 2020 pak dotal hišće njepředleži. Spěchowanske srědki njemóhli tež na hinaše wašnje wužiwać, dokelž su eksaktnje za mjenowany wotmysł přewostajene.

Njewšědne postupowanje

Huska. Mjez Mjedźojzom (Medewitz) a Huskej (Gaußig) je so wčera popołdnju wobchadne njezbožo stało. Opel Astra suny so na hładkej dróze z jězdnje a zrazy na prawym boku dróhi do štoma. Šofer pak jědźeše z wobškodźenym awtom dale hač na parkowanišćo w Husce. Hakle tam zawoła wuchowansku słužbu, wohnjowu woboru kaž tež policiju. Po prěnich informacijach su so tři wosoby při njezbožu zranili, kak ćežko, dotal znate njeje. Awto je po zdaću dospołnje skóncowane. Sobujěduceho bě štom wotboka trjechił.

ˇ
ˇ
ˇ

Kolektiw Klanki je

w prěnim rjedźe wuměłske zhromadźenstwo. Na prašenja Bosćana Nawki skupina tuž konsekwentnje a z wuraz­nje jednotnym hłosom wotmołwja.

Čłonki skupiny su so dotal skerje z technom hudźbnje artikulowali. Hdy je so hiphop jako dalši kmany žanr wopokazał?

W jetšina z nas njeje scyła hišće hudź­bu činiła, tak zo je Kolektiw Klanki za nas hudźbny debit. Hiphop wobsteji zwjetša z jedno­reho beata a skići wjele móžno­sćow za rěč a słowo. Tekst steji w srje­dźišću, a tuž je to idealna forma, chceš-li wobsahi posrědkować. Dokelž mějachmy zaćišć, zo mamy něšto rjec, je hiphop za to perfektny žanr – tež, dokelž móžemy přehnawać a wótrje kritizować.

Kak sće so namakali a kolektiw wu­tworili?

Smy hižo dołho spřećelene a lóšt měli, zhromadnje něšto tworić. Po tym zo je loni tójšto noweje serbskeje hudźby wušło a dokelž někotre z nas hižo pozadk w elektroniskej hudźbje maja, smy tež ideju za zhromadny projekt zrodźili. Nimo toho falowaše nam tajki žónski cyłk w Serbach.

Fota: Melanie Wowčerjec