Z wudaća: pjatk, 19 februara 2021

Moskwa (dpa/SN). Krótko do dźensnišeje narěče prezidenta USA Joewa Bidena na wirtuelnej Mnichowskej wěstotnej konferency je Ruska kritiku USA nastupajo płunowód Nord Stream 2 wotpokazała. Američenjo njech so radšo wo zawěsćenje milinoweho zastaranja wobydlerjow ­Texasa w USA po zymskim njewjedrje staraja, praji rěčnik Krjemla Dmitrij Pjeskow w Moskwje nowinarjam. Wón němsko-ruski płunowód dale zakituje. „Tónle projekt nima absolutnje ničo z energijowym zastaranjom zjednoćenych statow činić, ale je za energijowu wěstotu europskeho kontinenta.“ Podobnje wupraji so bywši němski wonkowny minister Sigmar ­Gabriel (SPD): „To je europski rozsud, ­kotryž Ameriku ničo njestara.“

Praha (dpa/SN). Čěski wonkowny minister Tomáš Petříček swojeho němskeho kolegu Heika Maasa (SPD) namołwja, wo „raznych naprawach“ při mjezach hišće raz rozmyslować. To je socialdemokrat wčera na zhromadnej widejowej konferency zwuraznił. Podobnje wuprajiłoj staj so tež wonkownaj ministraj Awstriskeje a Słowakskeje. „Bohužel njewočakujemy přichodny čas žane radikalne změny“, rjekny čěski šefdiplomat. Němska strona bě potwjerdźiła, zo su wolóženja móžne, hdyž so połoženje koronawirusa dla w potrjechenych krajach polěpši. W Čěskej so wone tuchwilu njepolěpša, Petříček sprawnje přizna. Zwjazkowe knježerstwo bě Čěsku, Słowaksku a dźěle Tirola w Awstriskej jako tak mjenowane regiony wirusowych mutacijow zastopnjowało. Wot minjeneje njedźele smědźa wottam jenož hišće Němcy a wukrajnicy z bydlenjom w Němskej zapućować. Wuwzaća płaća za dojězdźowarjow a nakładne awta.

Knježerstwo Pólskeje planuje nowy wotedawk medijow za wabjenje

Waršawa. Pólske knježerstwo a wosebje wicepremier Jarosław Kaczyński planujetaj nowy dawk: Wot 1. julija dyrbja wšitke medije kraja – nowiny, telewizijne a rozhłosowe sćelaki kaž tež internetne portale – popłatk na swoje dawkowe dochody wotedać. Ministerski prezident Mateusz Morawiecki wopodstatni nowu „składku“-darik z nuznje trěbnymi dochodami stata k přewinjenju sćěhow koronakrizy a na dobro wot zawrjenja po­trjechenych zawodow, kulturnych institucijow a dalšich zarjadnišćow.

Plany knježerstwa zbudźeja w medijach dotal njesłyšany protest. Liberalna Gazeta Wyborcza wuńdźe minjene dny z čornej titulnej stronu bjez fotow, za to z wulkim nadpismom „Medije bjez wupuća“. Nowina čitarjam rozłoži, čehodla so jim w tajkej njewšědnej formje prezentuje. Podobnje činješe to Rzeczpospolita. Na prěnjej stronje wozjewi wona w po­dobnym layouće protestny list pólskemu knježerstwu, kotryž běchu zastupnicy 43 medijow kraja podpisali.

W času koronapandemije je doma wuknyć hižo normalne. W prěnim lockdownje loni nalěto běchu hišće wulke njedostatki hladajo na techniske nastroje. Runje w swójbach z wjace dźěćimi jedyn laptop abo kompjuter hižo njedosaha, dokelž so konferency z wučerjemi často paralelnje wotměwaja. Mam za spomóžne, zo móža sej šulerjo techniku w šuli abo na gmejnje wupožčić. Přiwšěm z třomi dźěćimi w t. mj. homeschoolingu wobkedźbuju, zo njejsu jeničce nastroje wuměnjenje, ale tež stabilna internetna syć a derje fungowace platformy, z kotrymiž wuknjacy dźěłaja. Runje tam pak su ćeže. Často je syć abo platforma přežadana a nachwilnje wupadnje. Šulerjo, kotřiž sami doma wuknu a so z techniskimi ćežemi bědźa, su tak pod wulkim ćišćom. Wšako nochcedźa konferency z wučerjemi skomdźić a chcedźa swoje nadawki wotwołać. Što jim wša dobra technika pomha, hdyž nimaja ani stabilne zakładne wuměnjenja za domjace wuknjenje? Bianka Šeferowa

Budyšin (kl/SN). Wo lěće župow 2021/ 2022 je předsydstwo župy „Jan Arnošt Smoler“ Budyšin wčera znowa telefonisce wuradźowało. Narokej lěta župow wotpowědujo chcedźa jeho čłonojo Domowinske župy a skupiny do Domu Měrćina Nowaka w Njechornju přeprosyć. Na te wašnje ma so dom zdobom jako zetkawanišćo župow a towarstwow wužiwać. Přez cyłe lěto móža sej Domowinjenjo dom a ateljej serbskeho ludoweho wuměłca wobhladać a so tam po wustajeńcy wodźić dać. Tajke wodźenja poskića Róža Pinkawina w serbskej a němskej rěči. W tym zwisku nastorčichu čłonojo župneho předsydstwa wčera nowonakład brošurki resp. flajera wo Měrćinje Nowaku. Material je trěbny za šulerjow, kotrychž chcedźa za skutkowanje wuměłca zajimować. Šulske rjadownje měli dom Njechorńskeho tež zaso časćišo wopytać. Čłonojo budu poskitk dale přewodźeć.

Mikławš Wićaz bě wuznamny matematikar a informatikar w NDR a pochadźeše z Kamjeneje pola Radworja. W měrcu su jeho 100. posmjertne narodniny. Tafla z němskorěčnym napisom na kamjenju blisko wsy na njeho dopomina. Nětko ma so pruwować, hač hodźi so serbski wotpowědnik dodać.

Kaž w druhich hosćencach móža sej wobydlerjo tež w Choćebuskej „Běrnjacej kisće“ na Grodkowskej jědź skazać a wotewzać – tule přihotuje kuchar Silvio Klose runje „rězk to go“. Sobudźěłaćerjo mějachu ideju, z kóždej zličbowanku něšto za tych přinošować, kotřiž maja socialne njelěpšiny a su na pomoc pokazani. Tak su Choćebuskej tafli na wšě 2 000 eurow přepokazali. Móžno to jenož bě, dokelž ludźo poskitk, sej jědźe kónc tydźenja wotewzać, lěpje přijimuja, hač běchu sej to w „Běrnjacej ­kisće“ myslili. Mustwo hosćenca so tuž wšitkim podpěraćelam dźakuje a so nadźija, zo móže wopytowarjow bórze zaso w hosćencu posłužować. Foto: Michael Helbig

Meteorologojo wěšća za přichodne dny nimale nalětnje temperatury a chětro měnjate wjedro. Běła pycha, kaž na přikład wokoło Bukec na našim wobrazu, so tuž poněčim pozhubja. Přiwšěm zyma hišće nimo njeje. Wosebje we wječornych hodźinach mamy ­dale ze zmjerskom a hładkimi pućemi ličić. Hač pak so w blišim času hišće raz sněži, fachowcy rjec njemóža. Foto: SN/Hanka Šěnec

Pjatk 19.2.    Wirtuelne wubědźowanje Transcribathon Budyskeho Serbskeho instituta

Sobotu 20.2. 13:35 Delnjoserbski magacin Łužyca w telewiziji RBB

  17:00 Wirtuelna party hry „Tabu“ Budyskeho SAEK pod schadźowanka.de

  18:00 Młodźinske kemše w Róžeńčanskej putniskej cyrkwi wo temje „Rozestajenje z načasnymi prašenjemi cyrkwje“

Njedźelu 21.2. 8:30 Kemše w livestreamje z Kulowa

  9:00 Kemše w livestreamje z Chrósćic

Póndźelu 22.2. 19:30 Onilnowy ekumeniski póstny seminar Smochčanskeho kubłanišća swj. Bena na temu „Swoboda a zamołwitosć křesćanskeho čłowjeka. Kak móžemy zhromadnje žiwi być?“ z jednaćelom Ewangelskeho zwjazka w Sakskej Haraldom Lamprechtom

Wutoru 23.1. 17:00 Měšćanska rada Wojerecy

Srjedu 24.2. 14:00 Měšćanska rada Choćebuz

  16:00 Měšćanska rada Budyšin

  17:00 Měšćanska rada Zły Komorow

Štwórtk 25.2. 19:00 Gmejnska rada Chrósćicy

  19:30 Gmejnska rada Njebjelčicy

Sobotu 27.2. 17:00 Łužiski zapustowy stream w němskej rěči na Youtube

Njedźelu 28.2. 8:30 Kemše w livestreamje z Kulowa

  9:00 Kemše w livestreamje z Chrósćic

njedźelu hornjoserbsce

11:00 Łužica tutón tydźeń

11:20 Stanisław Nawka dźěła mjeztym 25 lět za bjezdomnych

11:45 Ewangelske a katolske wosady w strukturnej změnje

12:00  Nabožne wusyłanje

(Jan Malink)

po tym zbožopřeća

delnjoserbsce

12:30  Aktualny magacin, mjez druhim z přinoškom wo mjezynarodnym dnju maćeršćiny

13:00 Tematiske wusyłanje: Hendrichej Jordanej k 180ćinam

13:40 Nabožne wusyłanje

(Madlena Norbergowa)

po tym zbožopřeća

„Tabu“ wirtuelnje sej zahrać

Budyšin. Na wirtuelnu partiju woblubowaneje hry „Tabu“ přeprošuje Budyska wotnožka Sakskeho wukubłanskeho a wupruwowanskeho (SAEK) kanala jutře, sobotu, w 17 hodź. Přistup je na stronje schadźowanka.de móžny, hdźež nańdu zajimcy nimo toho dalše wólnočasne poskitki za cyłu swójbu. Mjez druhim wuhotuje SAEK tam „Serbske kino w póstnym času“ a „Warjenje z Rafaelu“.

Na młodźinske kemše

Róžant. Młodźinske dekanatne dušepastyrstwo wuhotuje jutře we 18 hodź. w Róžeńčanskej swjatnicy kemše za młodostnych. Tema Božeje mšě budźe roze­stajenje z načasnymi prašenjemi cyr­kwje. Dekanatny kružk kemše hudźbnje wobrubi.

Klub w dobrej stwě

Budyšin. Štóž so za klubowej atmosferu a elektroniskej hudźbu žedźi, tomu skići Budyski kolektiw FirleTanzFreaks jutře wot 20 hodź digitalnu alternatiwu. Dohromady štyri DJjojo, kotřiž su dotal mjez druhim w barje Sundowner a we wobłuku Budyskeho nalěća tačele napołožili, kaž w žanru rěka, chcedźa publikum z technom a house zahorić, wusyłajo live z Kamjentneho domu. Wjace pod steinhaus-bautzen.de