Z wudaća: pjatk, 19 februara 2021

pjatk, 19 februara 2021 13:00

Sport (19.02.21)

Plan Žołto-módrych steji

W 111. lěće swojeho wobstaća je so předsydstwo Žołto-módrych Kulow online zetkało, zo by swoju hłownu zhromadźiznu přewjedło. Na njej dojednachu so sportowče a sportowcy wokoło předsydy Rolanda Stiebitza na štyri terminy, za kotrež pak žanu garantiju njepřewozmu. Nimo toho chcedźa, ručež to wjedro dowoli, nowy trawnikowe wolejbulnišćo w Brěžkach přepodać.

17./18.04. nócny wolejbul

04.07.  lěćny sportowy swjedźeń

27.08.  hłowna zhromadźizna

02.10.  nazymski wolejbulowy turněr

Wobchod wotewrjeny

Fanowy wobchod „Hokejowa liška Łužica“ w Běłej Wodźe je zaso wotewrjeny. Wot póndźele do pjatka wot 10 – 12 hodź. a wot 14 – 18 hodź. poskićeja tam poradźowanje po telefonje abo přez mejlku. Nawoda wobchoda Heiko Rauhut k wotběhej serwisa call & collect: „Po prěnim telefoniskim kontakće, po­radźowanju a skazanju dojednamy so z kupcom na termin, hdyž móže sej wěcy wotewzać. Prošu z EC- abo kreditowej kartku zapłaćić.“ Kontaktowe daty: 0 35 76 / 2 15 56 00 abo

Hišće raz přećiwo EHC Freiburgej

wozjewjene w: Sport
pjatk, 19 februara 2021 13:00

Dwójce wo Pückleru

Delnjoserbski magacin Łužyca wusyła telewizijny sćelak RBB jutře, 20. februara, po zwučenym wašnju w 13.35 hodź. Ćežišćo tónraz budźe wjerch Hermann hrabja Pückler-Mužakowski. Składnostnje jeho 150. posmjertnin wěnuje so reportaža prašenju za poćahom mjez Pücklerom a Serbami. W rubrice „Namakanka“ přepytuja k tomu markantne, často pyramidu mjenowane rownišćo Pücklera. Je tónle tumulus wuraz gigantomanije abo naposledk snano tola šibałosće wjercha?

Dalši přinošk předstaji staršisku iniciatiwu Serbskeho swójbneho towarstwa „Gromaźe“. Franziska Albertowa, kotraž bě projekt sobu nastorčiła, organizuje z pomocu Europskeje uniwersity Viadrina w Frankfurće nad Wódru digitalnu wučbu za zakładnych šulerjow. Łužyca jej při tym přez ramjo hlada.

Tohorunja wo kubłanje dźe w rozprawje „Korona a wučba serbšćiny“. Telewiznicy su so mjez wučerkami a wučerjemi wobhonili, kak je so pandemija na jich dźěło wuskutkowała a kak z nowej situaciju wobchadźeja.

wozjewjene w: Telewizija
pjatk, 19 februara 2021 13:00

Płastowka (19.02.21)

1 tydźenje do jutrow su ... čas, 2 skót na pastwje, 3 posledni porst, 4 nabožna zhromadźizna, 5 mały stat na Balkanje, 6 dźěl Čěskeje republiki, 7 woblečenje, 8 horni dźěl košle, 9 hora w Turkowskej

wozjewjene w: Serwis
Njewšědnych hosći maja tele dny na polu blisko Pančic-Kukowa. Tam so wulkej ličbje kołpjow najskerje tak lubi, zo hnydom wjacore dny wostawaja, wšako je picy dosć. Jeničce před dobrym tydźenjom, jako bě wša krajina zasněžena, běchu kołpje naj­skerje na hinašim městnje. Ručež bě sněh fuk, tu wone zaso běchu. Foto: Maćij Bulank

wozjewjene w: Łužica
pjatk, 19 februara 2021 13:00

Drjewo wjesnjenjo za sebje wužiwaja

Při wjesnym haće w Miłoćicach je gmejna Njebjelčicy štomy pušćała. ­Milenka Rječcyna je wo tym z Njebjelčanskim wjesnjanostu Tomašom Čornakom ­(CDU) rěčała.

Kak je k tomu dóšło, zo sće štomy podrězać dyrbjeli?

T. Čornak: Jako gmejna mamy zamołwitosć za wobchadnu wěstotu we wšěch swojich wjesnych dźělach. Wobkedźbować mamy při tym tež strowotny staw štomow. Wjerby a čorne wólše při haće su hižo poměrnje stare. Tuž dyrbimy je pušćeć. Mamy tam zjawnu městnosć wokoło wsy, a dyrbimy na to dźiwać, zo so ničo njestanje. Tohodla dyrbjachmy tak jednać. Maksimalnje hač do kónca februara směmy po zakonju tajke dźěła wukonjeć.

Štó je doskónčnje wo tym rozsudźił?

T. Čornak: Starše štomy so rady złamaja. To pak by runje při Miłočanskim haće strašne było. Wšako su na ležownosći hrajkanišćo, młodźinski klub, towarstwowy dom a wohnjowoborna gratownja. Runje starši na to dźiwaja, zo móža sej tam dźěći woměrje hrajkać. A woni su loni wo to prosyli, zo bychmy staw štomow přepruwowali, štož smy jako gmejna činili. Zdobom su nas starši na to skedźbnili, zo su wjerby dudławe.

wozjewjene w: Rozmołwa
pjatk, 19 februara 2021 13:00

Podpěruja digitalne koncepty

Radźićeljo gmejny Ralbicy-Róžant su a wostanu wotewrjeni

Ralbicy (JK/SN). Wot Swobodneho stata Sakskeje a Zwjazka loni nastajeny digitalny pakt počina so widźomnje a čujomnje wuskutkować. Po tym zo běchu so wšudźe wutworili trěbne techniske wu­měnjenja, zběrachu wučerjo a kubłarjo prěnje nazhonjenja při wuwučowanju a sposrědkowanju wědy z pomocu digitalnych medijow.

wozjewjene w: Łužica
pjatk, 19 februara 2021 13:00

Policija (19.02.21)

Třoch podhladnych zajeli

Nadźanecy. W zašłej nocy je patrulja Budyskeje policije w Nadźanecach (Nadelwitz) třoch Polakow w starobje 29 a 49 lět zajała, po tym zo bě słužbna straža wobkedźbowała, kak woni dźěłowe graty z předawanišća noša. Zawołana patrulja jědźeše za awtom podhladnych, jako woni ležownosć wopušćichu. Na Krakečanskej wona VW Passat zadźerža. Zastojnicy nimo toho zwěsćichu, zo steješe 29lětny šofer pod wliwom drogow.

Wjacorym ludźom porok wuprajili

Rakecy. Zastojnicy policije zwěsćichu w nocy wot srjedy na štwórtk přeńdźenja nastupajo škitne naprawy přećiwo koronje. Tak su w Rakecach wjacorym ludźom porok wuprajili a jich na korektne wužiwanje nahubnika skedźbnili. Dwaj wobydlerjej měještaj lěkarski atest.

Wojerecy. Na Wojerowskej Hasy měra warnowachu policisća srjedu wječor tři wosoby ze wšelkich domjacnosćow. Napadnyło wobydlerjam domu bě, zo so mužej a žona w starobje 35 do 40 lět wótře wadźa a hudźbu ­poskaja. Na to wołachu policiju.

wozjewjene w: Policija
pjatk, 19 februara 2021 13:00

Pjenjezy potrěbnym swójbam

Budyšin. Budyski jobcenter přewostaja potrěbnym swójbam wotnětka přidatne pjenjezy za digitalne nastroje za distancnu šulsku wučbu. Potrjecheni, kotřiž su spěchowani po socialnym zakoniku 2, móža za to próstwu na 350 eurow stajić. Wuměnjenja su: Dźěćo chodźi na powšitkownu abo powołansku šulu, wone njeje starše hač 25 lět, wobdźěla so pandemije dla na distancnej wučbje a nima trěbne nastroje. Šula ma potrjebu wobkrućić.

Pěstowarnja zdźěla zawrjena

Budyšin. W Budyskim dźěćacym dnjowym přebywanišću „Benjamin Blümchen“ su schorjenje na koronu zwěsćili. Kubłarjo a dźěći potrjecheneje skupiny njemóža tuž karanteny dla do pěstowarnje. Žłobik njeje potrjecheny.

wozjewjene w: Z městow a wsow

Wojerecy (SiR/SN). Łužiska kupjel reaguje přewšo fleksibelnje na aktualne wužadanja. Hdźež hewak wopytowarjo na lěhakach leža, sedźa Jana, Hannibal a Steffi a so na swoje nadawki koncentruja. Wukubłacy bychu tuchwilu na powołanskej šuli w Kamjenicy byli. Ta pak je hišće zawrjena. „Acubije zaběraja so tuž z teoriju direktnje pola nas w kupjeli“, praji jednaćel kupanišća Matthias Brauer. Za 18lětneho Wojerowčana Hannibala Hafermanna stej mjezsobna wuměna a wobstajne zetkanje wažnej. Wón bě so cyle wědomje za wukubłanje we Łužiskej kupjeli rozsudźił. Kulowčanka Steffi Hefter njeje chcyła w běrowje dźěłać, ale z ludźimi a z wodu. W kupjeli waži sej wona dobru dźěłowu klimu a mnohostronske dźěło. Woni maja kursy přewodźeć, płuwanski trening přewjesć, bazen dohladować a za wopytowarjow jako motiwatorojo skutkować. 16lětna Jana Madysa, tohorunja z Kulowa, angažuje so pola Kamjenskeje wódneje straže a je wukubłana wuchowanska płuwarka. Wučomnicy wobchowuja sej na te wašnje čiły zwisk do domizny. „Mamy z nimi wulke zbožo.

wozjewjene w: Łužica

Lěto 2021je hišće młode, a runje tak młoda je nowa wuměłstwowa iniciatiwa, kotraž so pod mjenom „Swobodny społk“ na swójskej domenje https://swobodny-spolk.org w interneće předstaja: „Swobodny społk so za serbske, swobodne, kulturne a wuměłske tworjenje we Łužicy zasadźa.“ Trojorěčnje – hornjo- a delnjoserbsce kaž tež němsce – so iniciatiwa prezentuje, z čornoběłym logom w formje tróšku přesadźeneju połojcow koła. Z toho nastata dynamika dopomina na symbolej yin a yang. Wonej stejitej – tak wuči nas Wikipedija – w chinskej filozofiji za naprěčnej, přiwšěm na so poćahowacej dualnej principaj, kotrež mjez sobu njewojujetej, ale so wudospołnjatej: ćmowe a swětłe, zymne a horce, žónske a muske atd.

Što ma nam potajkim logo Swobodneho społka rjec? Kotrej napřećiwnej mocy so tu dynamisce zjednawatej abo so znowa nastajatej? Někotre mysle k tomu.

Prěni pokiw namakamy pod hesłom „Naša misija“, hdźež rěka: „Swobodny steji za swobodny duch a społk woznamjenja zhromadźenstwo hłójčkow z čerstwej fantaziju“. Potajkim dźe wo to, kolektiw (zhromadnosć) a indiwiduum (swobodu) znowa zapřimnyć.

wozjewjene w: Kultura & wuměłstwo

Serbska debata

nowostki LND