Z wudaća: štwórtk, 23 septembera 2021

Berlin (dpa/SN). Němski zwjazk dźěłarnistwow (DGB) wobzamknjenje strowotniskich ministrow raznje kritizuje, zo njedóstanu nješćěpjeni přichodnje čas karanteny koronawirusa dla zapłaćeny. „Njemóže być, zo politika zamołwitosć za bój přećiwo pandemiji cyle jednorje na dźěławych wotsunje“, rjekny předsyda DGB Reiner Hoffmann nowinarjam. „Šćěpjensku winowatosć přez posleńcu dale wotpokazujemy.“ Nimo toho noworjadowanje woznamjenja, zo dyrbja při­stajeni dźěłodawarja informować, hač su šćěpjeni abo nic. Hoffmann skedźbni na jedne z najwjetšich wudobyćow dźěłaćerskeho hibanja, zo dźěłodawarjo tak mało kaž móžno z priwatneho žiwjenja přistajenych a tak tež wo strowotniskej situaciji ludźi zhonja. „Nochcemy, zo dźěłodawarjo swoju poziciju mocy ze znajomosćemi wo strowotniskich datach swojich sobudźěłaćerjow zesylnja.“

Strowotniscy ministrojo Zwjazka a krajow běchu wčera wobzamknyli, zo nješćěpjeni wot 1. nowembra karantenu wjace zapłaćenu njedóstanu.

Marek Krawc rozprawja wo aktualnje rozjimanych temach w Čěskej

Praha. Cyłkowna přestrjeń role za ra­tarstwo w Čěskej so wosebje twarskich aktiwitow dla wobstajnje pomjeńšuje. Dokelž tam dźeń a wjace składowarnjow a montažowych halow nastawa, pobrachuje dobra ratarska póda. Hižo dźensa ma naš susodny kraj přimjeno „mon­tažna hala Europy“.

Sakska policija wotnětka tež w serbskej rěči za swoje „dobre dźěłowe městna“ wabi. Wčera su kampanju w Budyšinje před Serbskim domom předstajili a so za nju wuchwalowali. Po mojim měnjenju pak bě to najwjetši čas, zo je kampanja skónčnje dwurěčnje zaběžała. Pokiw, za po­wołanje policista w Sakskej tež serbsce wabić, nasta mjenujcy na wobydlerskej rozmołwje z ministerskim prezidentom Michaelom Kretschmerom a dalšimi ministrami Sakskeje w Budyskim Serbskim domje 4. julija 2018, potajkim před ně­što wjac hač třomi lětami. Tróšt dawa mi jeno znate wuprajenje, zo je wšitko, štož dołho traje, skónčnje tola spomóžne. A to kampani tež přeju. Wšako hlada sakskim policistam tójšto dźěła do rukow, chcedźa-li sej zhubjenu dowěru serbskich młodostnych wróćo zdobyć. Wo přichodnych serbskich zastojnikow serbskorěčnje wabić je wuraz runosće. Po tymle puću pak dyrbjeli hižo dawno kročić. Ale radšo zapozdźene hač ženje. Janek Wowčer

Damian Dyrlich, čłon CDU z Noweje Wjeski, piše njedźelne wólby nastupajo:

„Lětuše wólby su wažne směrodajne wólby za přichod“, čitamy w nowinach Die Zeit, FAZ a Die Welt. Tež Zeleni kaž Annalena Baerbock su to podobnje hižo prajili. Haj, zawěrno budźe wuslědk njedźelnych wólbow naš kraj a snano tež Europu sylnje formować.

K dwěmaj wobsahowymaj aspektomaj chcu so tule rady wuprajić: k hłosej na wólbnym lisćiku w Budyšinje a k wólbnym programam stron. Prěni aspekt drje wšitkich wolerjow w Budyskim wokrjesu potrjechi. Zašły raz bě sej Karsten Hilse wot AfD direktny mandat w Budyšinje zdobył a zastupuje tuž naš wokrjes w Berlinje. Bohužel je protestowy rozsud mnohich wolerjow tež w sejmje jenož protest wunjesł.

Tykowany statok Michaela Purschkeho (2. wotprawa) w Njebjelčicach ma wysoku kwalitu. Wjesnjanosta Tomaš Čornak (CDU, 2. wotlěwa) je tele dny čłonow jury Sakskeho statneho myta za twarjenje na wsach (Sächsischer Staatspreis ländliches Bauen) přewodźał, jako sej woni statok wobhladachu. Přijěli běchu předsydka komisije, dipl. ing. architektka Ines Pöschmann-Panzer (nalěwo), dipl. ing. architektka Christine Tenne (3. wotl.) a dipl. ing. twarski wyši rada na wuměnku Christian Meyer (naprawo). Za wubědźowanje přizjewjenych bě 110 objektow. Tych, kotrež sej komisija wobhlada, je 37. W oktobrje chce sakske ministerstwo za regionalne wuwiće dobyćerjow wozjewić. Foto: Feliks Haza

Składnostnje 30lětneho wobstaća kružka wušiwarkow w Slepom wotewrěchu tam wčera wustajeńcu pod hesłom „Kreuzweise – Přez křiž“, mjez druhim z dźělemi serbskeje narodneje drasty.

Slepo (JoS/SN). Zajim na wčerawšim wotewrjenju noweje wustajeńcy w Slepjanskim Serbskim kulturnym centrumje bě wulki. Tam maja wotnětka přehladku wo 30lětnym skutkowanju Slepjanskeho kružka wušiwarkow.

Na jubilej su wčera tohorunja zhladowali. Wjesnjanosta Jörg Funda (CDU) překwapi čłonki kružka ze zbožopřećom a kwěćelom za kóždu z nich. W postrownych słowach wón wuzběhny, zo 30lětna zhromadnosć zdobom towaršliwosć a tradiciju wobchowuje. „Ručne dźěła po serbskich mustrach znowa pokazuja, kak kulturne herbstwo w Slepom zachowu­jemy“, wjesnjanosta wuzběhny.

„Přehladka dawa zajimcam dohlad do ludowuměłskeho tworjenja pilnych žonow Slepjanskeje wosady a za jeje mjezami. Dźe-li wo prezentaciju našeje wosady z jeje bohatstwom na nałožkach a tradicijach, je kružk wušiwarkow z jehličku a nitku pódla“, Manfred Hermaš w swojej lawdaciji podšmórny.

Měšćanska rada Kulowa etat za komunalny lěs wobzamknyła

Kulow (AK/SN). Swój komunalny lěs dale zamołwiće a směrodajnje wobhospodarjeć chce tež město Kulow. To podšmórny naměstnik nawody twarskeho a porjadoweho wotrjada Jurij Brösan na minje­nym wuradźowanju měšćanskeje rady. Jednohłósnje wobzamknychu Kulowscy radźićeljo klětuši hospodarski plan za komunalny lěs. „Ličimy z nadbytkom něhdźe 8 700 eurow“, Brösan rozłoži. „Wiki drjewa su zaso stabilne.“

Kaž z etata 2022 wuchadźa, chcedźa dochody něhdźe 61 200 eurow docpěć, mjez druhim 42 100 eurow z předanje drjewa. Za přetworjenje lěsow nadźijeja so ně­hdźe 18 600 eurow spěchowanskich srědkow Sakskeje. Tomu napřećo steja wudawki nimale 52 400 eurow. Cyłkownje wobsedźi město Kulow 162,7 hektarow lěsa.

Chasow. Njedźelu, 26. septembra, wot 13 do 18 hodź. budźe při wětrniku w Chasowje dźeń wotewrjenych duri. Wětrnik drje přistupny njebudźe, wobhladać pak móža sej zajimcy historiske twarjenje, kotrež je pod zapřijećom „dom kata“ znate, a kiž bu z Lišeje Hory do Chasowa přenjesene. Na znowanatwarje wobdźěleni rjemjeslnicy na městnje wšelake rjemjesła pokzuja. Wjedźenja su tohorunja planowane. Wo zabawu a dobru naladu staraja so Chróšćanscy muzikanća. Zastup je darmotny. Přiwšěm je kóždy krošik rady widźany a witany. Wšako twar hišće dokónčeny a dozapłaćeny njeje. Čłonojo a přećeljo Njeswačanskeho domizniskeho a kulturneho towarstwa wjesela so na mnohich wopytowarjow.

Předstaja Serbsku protyku

Malešecy. Na premjeru Serbskeje protyki 2022 su wšitcy zajimcy póndźelu, 27. septembra, we 18 hodź. do hosćenca „Wódny muž“ w Malešecach přeprošeni Redaktor protyki Pětr Šołta předstaji nowostku zhromadnje z Lubinu Malinkowej, Gerlind Šubertowej a Gretu Helenu Scheffel, kotrež wurězki ze swojich přinoškow čitaja. Zastup je wot 17.30 hodź.

Minjenu njedźelu swjećeše wohnjowa wobora w Rachlowje pod Čornobohom w Kubšiskej gmejnje 100. róčnicu wobstaća. W lěće 1921 załožichu ratarjo a rjemjeslnicy woboru, zo bychu žně a chěže zhromadnje škitali. Nimo wobory běše tež šula wjesne srjedźišćo za serbskich a němskich wobydlerjow Rachlowa. Zo bychu serbskorěčny charakter tež w přichodźe zdźerželi, je nawoda Rachlowskich wohnjowych wobornikow Jens Lehmann (na jewišću naprawo) ideju zrodźił, dwurěčne ­pućowanske tafle nastajić. Foto: Olaf Reichert

Hamor (AK/SN). Oficialna kupanska sezona w Bjerwałdskim jězoru je zakónčena. Na minjenym posedźenju Hamorskeje gmejnskeje rady wjesnjanosta Achim Junker (CDU) rjekny: „Minjenu sezonu su tysacy hosći z kraja a wukraja wólno­časne zarjadnišća w našej gmejnje wo­pytali.“ Wón dźakowaše so předewšěm čestnohamtskim zamołwitym, mjez druhim za porjad a wěstotu, wohnjowym wobornikam kaž tež čłonam Němskeho čerwjeneho křiža, staracym so wo wěstotu w a při wodźe. Sportowe čołmy mjeztym do zymskeho składu woža.

W krajinowej wuměłskej twórbje „Wucho“ su lětsa wosom wulkich zarjadowanjow wotměli. Tak běchu hosćo na přikład tež na poskićenja Łužiskeho festiwala a akademije Europskeho chóra Zhorjelc přišli. „Za dźiwadło pod hołym njebjom ze 270 městnami pytamy trajnje spušćomneho wo hospodarjerja, kiž poskići wopytowarjam a wobydlerjam atraktiwny a wobstajny program a zdobom gastronomiske zastaranje zawěsći“, wjesnjanosta Junker rjekny.