Incidenca dale jara wysoka
Budyšin. Z hódnotu 1 492,9 po Roberta Kochowym instituće je incidenca w Budyskim wokrjesu dźensa dale jara wysoka. Tam rozprawjachu wčera wo 562 natyknjenjach z koronawirusom a dalšich pjeć smjertnych padach. 335 infekcijow a šěsć zemrětych pacientow zwěsćichu we wokrjesu Zhorjelc, indicenca po RKI wučinja tam dźensa 1 085,6.
Wobstawaja na dobrych jobach
Choćebuz. Při pospěšenym wustupje z brunicy je sej Němski dźěłarniski zwjazk (DGB) do dźensnišeje 17. łužiskeje konferency wot politiki zarunanje za derje zapłaćene joby žadał. Wot noweho knježerstwa wočakuje wobwodny šef DGB Berlin-Braniborska Christian Hoßbach, zo wone kurs wobchowuje, ze změnu strukturow dobre dźěło w rewěrje zaruča a wupłaćenje strukturneho spěchowanja časowje přiměri.
Lětopis 2021/2 wušoł
We łužiskej jězorinje kładu wulku wažnosć na kilometrowe sćežory. Wšako su wone bytostny wobstatk hladajo na wuchowanje ludźi. Stołpy dyrbja tuž nětko zaso ponowić.
Budyšin (SN/CoR). Z wjace hač dwaceći zarjadowanjemi je protyka za swjedźenske lěto „2022 – lěto Zejlerja a Kocora“ hižo derje pjelnjena. Wčera je Domowina na nowinarsku konferencu přeprosyła, zo by zjawnosć wo tučasnym dźěłowym stawje planowanja informowała. Dohromady 30 namjetow bě kulturny referent serbskeho třěšneho zwjazka Clemens Škoda w běhu tohole lěta nazběrał. Někotre akcije kaž kompozitoriske wubědźowanje „Kocor 2.0“ su mjeztym hižo dokónčene. „Chcu so wšitkim institucijam, towarstwam a iniciatiwam dźakować, kotrež so angažuja. Smy wšitkich namołwili, a baza je z retomasom idejow wotmołwiła“, rjekny Škoda. „Smój sej z bywšej intendantku SLA Judith Kubicec wot spočatka přezjednaj byłoj, zo trjebamy za cyłe lěto jedyn zhromadny program. To bě ćežko dosć zrjadować, dokelž su wšudźe iniciatiwy byli. Ale smy cyły čas – a tu činješe to wosebje Clemens Škoda – hromadźe rěčeli“, podšmórny nawoda 1. serbskeje kulturneje brigady Friedemann Böhme.
Za přetwar bywšeje Wojerowskeje wyšeje šule „Na kromje města“ na nowu zakładnu šulu „Handrij Zejler“ z hortom je 365 000 eurow wjace trěbne, hač bě dotal zaplanowane. Cyłkowne twarske kóšty podróša so wot 4,580 milionow eurow na 4,945 mio.
Wojerecy (AK/SN). Přidatne wudawki móže město ze swójskeho etata zwjesć. To je měšćanska rada na swojim wčerawšim posedźenju jednohłósnje wobzamknyła. Pozadk su přidatne wudawki za podróšene twaršćizny a njeplanowane přidatne trěbne dźěła za šulu.
Kubłanišćo bu 1959 twarjene a 1995 saněrowane. Lětsa w februaru započachu je přetwarjeć. Hač do julija 2022 ma wšitko hotowe być, tak zo móža wuknjacy zakładneje šule „Handrij Zejler“ spočatk šulskeho lěta 2022/2023 do twarjenja zaćahnyć.
Dešno (mih/SN). Zo Saksojo rady po swěće pućuja, je znate. A njeje-li to praktiskich přičin dla móžno, da podadźa so druhdy kaž Karl May prosće duchownje na dyrdomdejsku jězbu do cuzych krajow. Nic literarnje, přiwšěm tohorunja wuměłsce přeprošuje dalši Saksa nětko zajimcow na fantastiske pućowanje. Tak wita Dešnjanski Domizniski muzej wot minjeneje njedźele zajimcow na hodownu wustajeńcu. W Riesy bydlacy tružacy ludowy wuměłc Fredo Kunze wjedźe wopytowarjow do bajkojteho swěta swojich drjewjanych figurow. Přehladka pokazuje z wulkej lubosću tružene figury ze scenami samotneje kupy Robinsona Crusoewa, sceny Dona Quijota w Španiskej kaž tež hońtwu na buwoły pola Indianow na dźiwim zapadźe Ameriki. W krótkich jednanjach powěda wuměłc ze swojimi figurami kuzłapołne stawiznički. Mnohe małke detaile tutu jězbu po swěće wobohaćeja. Wjacore sceny wo fantastiskim žiwjenju Münchhausena buchu za Drježdźanski Muzej sakskeho ludoweho wuměłstwa stworjene a su jako požčonka Münchhausenoweho města Bodenwerda widźeć.
Riga (dpa/SN). Posledni dźeń swojeho dwaj dnjej trajaceho zeńdźenja w letiskej stolicy Rize su so wonkowni ministrojo 30 čłonskich statow NATO dźensa z katastrofalnym skónčenjom wojerskeho zasadźenja w Afghanistanje zaběrali. Tam běchu militantno-islamistiscy talibanojo po nimale 20 lětach zapadneje wojerskeje prezency srjedź awgusta w běhu někotrych dnjow móc wróćo zdobyli. A tak dóńdźe ke chaotiskim scenam.
Wopory amoka wopominali
Trier (dpa/SN). Lěto po amokowej jězbje w Trieru su tam dźensa wopory njeskutka wopominali. W srjedźišću steješe ekumeniska Boža słužba w Trierskej katedrali, na kotrejž wobdźělichu so wopory, přiwuzni a wuchowanske mocy. Při amoku 1. decembra 2020 bě pjeć ludźi žiwjenje přisadźiło. Dźesatki ludźi so zranichu, něhdźe 300 je trawmatizowanych. Skućićel bě ze swojim awtom w pasmje pěškow wotpohladnje do ludźi jěł.
Sobušulerjow morił
Na žarowanskej swjatočnosći za dźiwadźelnika Volkera Lechtenbrinka chcedźa so nimo jeho wudowy tež štyri bywše žony wobdźělić. „To je sej wón přał a do swojeje smjerće tak postajił“, rjekny jeho wudowa Ural-Aytekin-Lechtenbrink. Volker Lechtenbrink bě tydźenja 77lětny po ćežkej chorosći zemrěł. Wón bě dohromady pjeć króć woženjeny.
Nimale 24 kilogramow drogow je policija w Barnimskim wokrjesu w Braniborskej dwěmaj wikowarjomaj drogow sćazała. Zastojnicy běchu bydlenja a přemysłowu kónčinu 34lětneho a 29lětneho přeslědźili, hdźež nańdźechu 23,9 kg hašiša a marihuany. Nimo toho sćazachu pistolu, prózdne šćěpjenske wupokazy, techniske nastroje a pjenjezy. Braniborska policija bě wobeju dlěje hač lěto wobkedźbowała. Zwěsćić hišće dyrbja, što staj sej mužej z dobytka drogow kupiłoj.