Pjatk 1. a 2.7. Open air „Vinea Mea“ w Smječkecach
Pjatk 1. do 3.7. Swjedźenski kónc tydźenja składnostnje 800lětneho wobstaća Bukec
Pjatk 1.7. do 4.9. Budyska bara Sundowner wšědnje wot 18 hodź. wotewrjena
Pjatk 1.7. 19:00 Koncert ke kóncej šulskeho lěta Budyskeje hudźbneje šule na hłownym jewišću Budyskeho NSLDź
20:30 „Čěske nocy“ na hudźbnym swjedźenju w Smochčanskim kubłanišću swj. Bena
14:00 Sportowy swjedźeń w Lichanju (Spreewiese)
njedźelu hornjoserbsce
11:00 Łužica tutón tydźeń
11:10 Live z Bukec (1)
11:20 “Wulkotny tydźeń europeady“
11:45 Live z Bukec (2)
12:00 Nabožne wusyłanje
(Krystof Rummel)
po tym zbožopřeća
delnjoserbsce
12:30 Aktualny magacin, mjez druhim z „doškrabkami europeady“ a přinoškom wo wuwitanju w Lubinje
13:00 Tematiske wusyłanje: Serbske hudźbne tradicije
13:40 Nabožne wusyłanje
(Madlena Norbergowa)
po tym zbožopřeća
„Čěske nocy“ w Smochćicach
Smochćicy. Serbski ludowy ansambl wuhotuje dźensa, pjatk, a sobotu, 2. julija, zhromadnje z kubłanišćom swj. Bena Smochčanski hudźbny swjedźeń, lětsa pod hesłom „Čěske nocy“. Na dworje kubłanišća chcedźa solisća, chór a balet SLA kaž tež folklorna skupina Cimbálova muzika Jiřiho Janouška a wirtuozowka-huslerka Markéta Janoušková publikum z twórbami na přikład Bedřicha Smetany, Josefa Suka staršeho a Leoša Janáčeka zawjeselić. Kuchnja zarjadnišća poskići k tomu wot 18.30 hodź. čěske a serbske kulinariske speciality, předstajeni započnjetej so stajnje w 20.30 hodź. Zastup při wječornej kasy płaći 29 eurow resp. potuńšeny 19 eurow.
„Lyriske počasy“ w Brězku
Jubilejna hra w Radworju
Prěnje koparske mustwo ST 1922 Radwor hraje jutře wot popołdnja štyrjoch přećiwo regionalnemu koparskemu ligistej BSG Chemiji Lipsk. Budźe to koparski duel we wobłuku swjedźenskeho lěta. Dalše koparske hry:
02.07. 16:00 ST 1922 Radwor –
BSH Chemija Lipsk
02.07. 17:00 Biskopičanske KT –
Slovan Liberec
03.07. 12:30 Biskopičanske KT –
BSG Chemija Lipsk
08.07. 18:30 Biskopičanske KT –
Radebeulski BC
08.07. 19:00 FC Energija Choćebuz –
Hertha BSC
Satkulabičtura startuje
Lětušu bičwolejbulowu turu serbskeho młodźinskeho sćelaka Radija Satkula zahaja póndźelu we Worklecach. Mustwa zetkaja so w 17.30 hodź., hrać budźe so na dwěmaj hrajnišćomaj wot 18 hodź. Mustwa, kotrež chcedźa so na wulkim finalu kónc awgusta w Miłoćicach wobdźělić, dyrbja znajmjeńša na jednej ze šěsć stacijow do kónčneho wurisanja sobu hrać.
04.07.22 Worklecy / 1. stacija
11.07.22 Budyšin / 2. stacija
18.07.22 Kulow / 3. stacija
25.07.22 Hórki / 4. stacija
01.08.22 Konjecy / 5. stacija
08.08.22 Pančicy / 6. stacija
15.08.22 Róžant / 7. stacija
22.08.22 Miłoćicy / finale
Přihoty za běh zaběželi
Budyšin (CS/SN). W njepřitomnosći wyšeho měšćanosty Alexandera Ahrensa (SPD), kiž bě swójbnych přičin dla zadźěwany, zwuraznichu wjacori čłonojo Budyskeje měšćanskeje rady předwčerawšim na swojim posedźenju njespokojnosć wo tym, kak je so město Budyšin w zašłych lětach wuwiło. Hladajo na infrastrukturu pobrachuja perspektiwy, skoržeše Jörg Drews z wobydlerskeho zwjazka. Město dyrbjało swoju poziciju znowa namakać. Po wólbach wyšeho měšćanosty, při kotrychž bu Ahrens wotwoleny a Karsten Vogt, kiž bě jako hósć přitomny, wuzwoleny, je wěsty wakuum nastał. Tónle wakuum pak hižo dlěje wobsteji, měnješe Sieghard Albert (AfD). „Njeběchmy kmani, porjadny regionalny wuwićowy koncept wobzamknyć.“ Město Budyšin daloko za Zhorjelcom hinka.
Tykanc podhladny był
Njedźichow. Po tym zo běštej alkohol piłoj a tykanc jědłoj, dyrbještej so předwčerawšim 18lětnej holcy z Njedźichowa strowotniskich problemow dla do chorownje dowjezć dać. Policisća mějachu podhlad a na městnje slědźachu, hač bě snano něchtó wopojne jědy do tykanca měšał. A woprawdźe namakachu woni slědy konopje a zawěsćichu tohorunja zbytki tykanca. Tón nětko w laborje dale přepytuja.
Serbske Pazlicy (SN/MWj). W serbskich gmejnach rostu wjesne towarstwa kaž hriby ze zemje. Předwčerawšim su tajke we Worklecach załožili (SN rozprawjachu) a hižo minjeny tydźeń w Serbskich Pazlicach. Tam je z nimale 30 přitomnych wjace hač 20 wosobow towarstwu přistupiło. „Chcemy w Serbskich Pazlicach wjesnu zhromadnosć polěpšić a wšelake projekty zwoprawdźić. Za to je towarstwo najkmańši puć“, praji nowy předsyda Měrko Domaška. Po jeho słowach je ideja hižo lěto stara. Nastorčili su ju mjez druhim gmejnskej radźićelej Claudia Liznarjowa a Frank Domš, ale tež wjacori wjesnjenjo, kiž su hižo před lětami eksistowacemu wjesnemu towarstwu přisłušeli.
Smječkečanski młodźinski klub
swjeći kónc tydźenja, 1. a 2. julija, swój 25lětny jubilej wobstaća. Po dwulětnej koronowej přestawce smědźa skónčnje zaso bjez hygienowych naprawow swjećić. Startować chcedźa pjatk z wulkej 1990–2000-party ze Fanta 3 (Tommy/Romano/Timmi), na kotruž su wopytowarjo zbliska a zdaloka wutrobnje přeprošeni.
Sobotu budźe wulka techno-party ze znatymi DJjemi. Tak budźe tam mainfloor wot 20 hodź. a RM-club-floor wot 21 hodź. Znaći DJjojo kaž Scala & Simplexx, DJ Charity, Halbsteiv, Lucas & Marw, DJ Romano, Klangchirurgie abo T.S.B.I.N staraja so wo rytmy k rejwanju.
Tuchwilu natwarja młodostni stanaj z rejowanišćomaj a baru. Přizamknje so wuhotowanje jewišća z techniku za DJjow. Přihoty běža po planje a klub nadźija so bohateho wopyta ludźi.
Štóž njeměješe hišće móžnosć sej kartki wobstarać, dóstanje je hišće při wječornej kasy pjatk za 5 eurow resp. 10 eurow sobotu. Wo ćělne derjeměće je postarane.
tekst a foće:
Benjamin Greger