Z wudaća: wutora, 05 julija 2022

Šefredaktor SN wupowědźił

Budyšin. Janek Wowčer je swoje dźěłowe zrěčenje jako šefredaktor Serbskich Nowin a wotrjadnik za nowiny a časopisy w Ludowym nakładnistwje Domowina wupowědźił. Wón chce so w přichodźe druhim nadawkam wěnować. Jednaćelstwo nakładnistwa nětko proces znowawobsadźenja pozicije organizuje.

Informowanišćo anticyganizm

Berlin. Po cyłym Zwjazku skutkowace informowanišćo anticyganizm (MIA) je swoje dźěło dźensa w Berlinje zahajiło. Nowe zarjadnišćo chce na wobstejace deficity w systemje prawidłow skedźbnjeć a njejasny wobłuk anticyganistiskich po­dawkow w Němskej registrować. Wo wonkownych formach a rozměrje anticyganizma w towaršnosći rozswětlić, přiměrjeny poradźowanski poskitk potrjechenym natwarić kaž tež zjawnosć a politikarjow sensibilizować su zaměry MIA.

Dalši lockdown njepřetraja

We Worklecach je so wčera 19 mustwow na lětušej prěnjej staciji bićwolejbuloweje tury Radija Satkule wobdźěliło. Něhdźe 350 sportowčow a sportowcow kaž tež přihladowacych je přišło. Dobyło je po štyrjoch hodźinach mustwo „Bul přez sak“, je to team wokoło Ławrjenca Bobki. Přichodnu póndźelu zastanje beachtura Satkule w Budyšinje. Foto: Konstantin Hrjehor

Tuchwilny počas žada sej wot čłowjeka, zo by so derje napił. Na te wašnje so krej w ćěle njezhusći. Milenka Rječcyna je so rěčnika Budyskeho Łužiskeho klinikuma Steffena Lahodu za tym prašała, hač je zastaranje klinikuma z kreju zawěsćene.

Kak posudźujeće situaciju z konserwami darjeneje kreje w Budyskej chorowni Hornjołužiskich klinikow?

St. Lahode: Zwěsćamy stajnje a zaso we wěstych počasach, zo je darićelow ­a z tym tež krejnych konserwow mało. Zwjetša je to měsac awgust. To zwisuje z dowolom darićelow kreje. Dóstawamy krejne konserwy z Drježdźan wot słužby za darjenje kreje Němskeho čerwjeneho křiža DRK Sewjerowuchod. Tuchwilu dodawa DRK mjenje konserwow hač skazamy. To pak potrjechi wšitke chorownje w regionje. Zastaranje pacientow pak smy zamóhli při wšěm dotal zawěsćić.

Kak dołho tuchwilu składowane konserwy, to rěka krej, dosaha?

Nowinki wo Fabmobilu nětko z newsletterom šěrja

Budyšin (SN/MiR). Fabmobil ma swój prěni newsletter. „Chcemy dale a bóle informacije wo našich aktiwitach šěrić“, rozłoži projektowy nawoda Bosćij Pjaca. „Mamy to za trěbne, dokelž smy wuwili wšelake tutorialy, to rěka digitalne nawody za wobchadźenje z našimi poskitkami kaž tež wuknjenske srědki. Z pomocu newslettera móža so zajimcy sami wo wšěm wobhonić.“

Budyšin (SN/bn). „Spěchować dorost a takrjec připódla talenty tež za Serbski ludowy ansambl sej zdobyć je wotmysł wubědźowanja ‚Młoda serbska hudźba – Młoda serbska muzika‘, kotrež w dwulětnym rytmusu wuhotujemy. Dalši zaměr je, młodym hudźbnikam serbske kompozitoriske tworićelstwo zbližić.“ Z tutymi słowami zahaji intendant SLA Tomas Kreibich-Nawka předwčerawšim mytowanski koncert wubědźowanja na hłownym jewišću Budyskeho Němsko-Serbskeho ludoweho dźiwadła.

W Budyskim centerje na Žitnych wikach wotměje so tuchwilu wosebite wubědźowanje. Management je namołwjał dźěćace dnjowe přebywanišća sprjewineho města molować abo wuhotować wulki wobraz pod hesłom „Lěćo, słónco, słónčina“. Mjez 13 dźěćacymi přebywanišćemi je tež pěstowarnja „Jan Radyserb-Wjela“, kotraž je w nošerstwje Křešćansko-socialneho kubłanskeho skutka Miłoćicy. Mjeńše dźěći su na płatno molowali dwanaće słóncow před módrym njebjom. Wustajeńca traje hač do 9. julija a wopytowarjo móža za swojeho faworita hłosować. Myto za dźěći z dobyćerskeje pěstowarnje su lód a materialije za paslenje. Foto: SN/Hanka Šěnec

Sydney (dpa/SN). Awstralske knježerstwo je powodźenjow w zwjazkowym kraju New South Wales dla katastrofowy staw wuwołało. Tak maja potrjechene kraje móžnosć spěšnišo pjenjezy dóstać. Situacija je wokoło Sydneyja chětro napjata. Wot minjeneho pjatka je so mócnje dešćowało. W běhu jenož štyrjoch dnjow bě to telko kaž wob lěto w Londonje, meteorologojo zdźělichu. Hač do dźensa rano dyrbješe něhdźe 50 000 ludźi swoje domske wopušćić.

Z nowonatwarom započeć

Kijew (dpa/SN). Ukrainski prezident ­Wolodymyr Zelenskyj je k tomu namołwjał, z natwarom kraja nic hač do kónca wójny čakać. Wjele měli ­paralelnje činić, wón wčera wječor wuswětli. Tak měli kónčiny natwarić, z kotrychž je ruske wójsko wotćahnyło. Dźesaćitysacy domow je tam zničenych. Hladajo na přichodnu zymu, měli energijowe za­staranje w potrjechenych kónčinach zaručić. W šwicarskim Lugano wotměje ­so prěnja wulka konferenca, na kotrejž ­wobjednawaja nowonatwar Ukrainy.

Šěsć ludźi zatřělił

Po dwanaće lětach zasadźa Drježdźanske wobchadne předewzaće (DVB) w měsće zaso čěske tramwajki w normalnym linijowym wobchadźe. Přičina toho je wulka potrjeba jězdźidłow twarnišćow dla. Nimo toho njemóža tuchwilu moderne tramwajki ­reparować, dokelž material předewšěm za elektroniske dźěle pobrachuje. Foto: dpa/Matthias Rietschel

Mjeztym hižo 15. króć je Joey Chestnut z New Yorka wubědźowanje dobył, při kotrymž dyrbi hot dog jěsć. Swójski swětowy rekord 76 tajkich kołbaskow w całće w běhu dźesać mjeńšinow z lońšeho lěta lětsa docpěł njeje. Přiwšěm je 38lětny z wuslědkom, 63 kołbasow, spokojom, wšako njeměješe do toho dosć chwile ­trenować.

Cigaretoweje přestawki dla je muž w Fuldźe nimale swój ćah skomdźił. Poprawom je spěšnik hižo pomałku z dwórnišća wotjěł. Mužej pak so poradźi na njón skočić. Mjez dwěmaj wagonomaj ­sedźo na něhdźe 160 kilometrow na hodźinu spěšnym ćahu je něhdźe 20 kilometrow sobu jěł. Zwjazkowa policija je ćah skónčnje ­zadźeržała. Hladajo na žiwjenje strašnu akciju je wulke zbožo, zo je 32lětny wšitko bjez zranjenjow přetrał.

Tornow (AK/SN). Spěchowanje naprawow we Łužiskej jězorinje ze srědkow hórnistwoweho saněrowanja na zakładźe zwjazkoweho zarjadniskeho zrěčenja (paragraf 4) njebudźe po lěće 2027 hižo móžno. Tole zdźěli jednaćel zaměroweho zwjazka Łužiska jězorina Sakska Daniel Just na minjenym posedźenju w Tornowje. „Starosćimy so wo paragraf 4 zwisowacy z budgetami. Wot Swobodneho stata tuchwilu předwidźany budget za lěto 2023 do 2027 je přesnadny“ , wón rozkładźe. Po měnjenju Sakskeho wyšeho hórniskeho zarjada njehodźa so hižo wšitke předwidźane projekty přewjesć. Jeničce 21,5 milionow eurow je tuchwilu k dispoziciji. Trěbne pak su 38,16 milionow eurow.