Z wudaća: srjeda, 06 julija 2022

Njebjelčicy. Přichodne posedźenje Njebjelčanskeje gmejnskeje rady wotměje so jutře, štwórtk, w 19.30 hodź. w gmejnskim zarjadnistwje při sportnišću. Mjez druhim zaběraja so radźićeljo z wjedro měrjacej staciju w Njebjelčicach, z kóštami za twarski plan w Serbskich Pazlicach a z hospodarskim planom 2022. Dale póńdźe wo wustawki za priwatne twarske předewzaće we Wěteńcy.

Kolesowar znjezbožił

Mučow. Při wobchadnym njezbožu předwčerawšim na zwjazkowej dróze B 96 mjez Wojerecami a Mučowom je so kolesowar ćežko zranił. 20lětna wodźerka Peugeota bě tam najprjedy druhe awto přesćahnyła, hačrunjež to na tym městnje dowolene njebyło, a na to nalěwo nimo wobchadneje kupy jěła. Runje w tym wokomiku tam 39lětny kolesowar dróhu přeprěči. Jeho dowjezechu z helikopterom do chorownje.

Ketlicy (LTh/SN). Krasne to dožiwjenje za spěwarki a spěwarjow chóra „Budyšin“ a cyrkwinskeho chóra Lubijsko-Žitawskeje eforije a za něhdźe sto připosłucharjow, jako zaklinči minjenu sobotu nawječor oratorij „Podlěćo“ w Ketličanskej cyrkwi, na městnje wjelelětneho skutkowanja Korle Awgust Kocora.

W jubilejnym lěće 2022 běchu sej Serbja južnych a wuchodnych stron přede­wzali, hromadźe z němskimi spěwarjemi znowa přednjesć oratorij, kaž běchu to 2019 hižo wuspěšnje ze „Serbskim rekwiemom“ zdokonjeli. A što so lěpje hodźi do tutoho krasneho počasa hač oratorij „Podlěćo“ ze zahorjacymi spěwami kaž „Kak stupa so lóštnje a wjesele“ abo „Nasyćene, napowane z wěčnym darom duše su a do próstwy wobzamkane časne dary na polu“ abo „Swjaty Jan žně ska­zuje, syc łučku trawnitu“. Pod dostojnym nawodom cyrkwinskeho hudźbneho ­direktora Christiana Kühne zaspěwachu „Podlěćo“ cyle po něhdyšej hudźbno-koncertantnej praksy, mjenujcy jeno z klawěrnym přewodom.

7.7.–13.7.2022 Budyski filmowy ­palast: Thor: Love and Thunder w 3 D: wšědnje 14:30, 17:17 a 20:00 | pj a so 22:45 Thor: Love and Thunder: wšědnje 16:45 a 19:30 | pj a so 22:20 ­Liebesdings: wšědnje 14:40, 17:10 a 19:40 | pj a so 22:00 The Gray Man: srj 20:00 Alfons Zitterbacke – Endlich Klassenfahrt: wšědnje 14:40 a 17:00 (nimo pj) | pj 16:20 Karlchen – Das große Geburtstagsabenteuer: wšědnje 14:20 | nj 12:30 Minions – Auf der Suche nach dem Mini-Boss w 3 D: wšědnje 15:00, 17:15 a 19:20 (nimo srj) | pj a so 21:45 Minions – Auf der Suche ­nach dem Mini-Boss: wšědnje 14:30 a 16:50 | nj 12:45 | pj 19:20 Licorice Pizza: pj 17:00 | pó 20:00 Sneak Preview: pó 20:00 Elvis: štw, so, pó a srj 19:20 Dog: pj, nj a wu 19:20 Jurassic World: Ein neues Zeitalter: wšědnje 14:00 a 17:00 | pj, so a pó 20:00 Jurassic World: Ein neues Zeitalter w 3 D: wšědnje 19:20 (nimo pó) Die Geschichte der Menschheit – leicht gekürzt: wšědnje 20:00 (nimo pó) | so, pó a srj 16:20 | pj a so 22:30 Top Gun Maverick: wšědnje 19:40 (nimo pó a srj) Lightyear: wšědnje 14:30 | nj 12:10 Immenhof – Das große Versprechen: nj 12:00 Biene Maja – Das ge­heime Königreich: nj 12:00 Mia and Me – Das geheimnis von Centopia: nj 12:30 Der kleine Nick auf Schatzsuche: nj 12:15 Der Wolf und der Löwe: nj 12:00 Phantastische Tierwesen: Dumbledores Geheimnisse: štw, nj a wu 16:20 The Black Phone: pj a so 22:30 Massive Talent: pj a so 22:20

Wočerstwjenišćo w Běłej Wodźe za 435 000 eurow wobšěrnje ponowja

Běła Woda (AK/SN). Přirodna Běłowodźanska Janska kupjel ma spočatk prózdnin wotewrěć. Tole zdźěli nawodnica ­měšćanskeho twarskeho zarjada Dorit Baumeister na zašłym posedźenju měšćanskeje rady. Poprawom bě start 1. junija předwidźany, ale twarske dźěła traja dlěje hač planowane.

„Někotre zbywace twarske dźěła su hišće trěbne. Twarski zawod z Krušwicy je z pjeć ludźimi na městnje a dočinja wonkowne dźěła“, twarska nawodnica rozłoži. Zawod z Habrachćic (Ebersbach) je nowe zachodne twarjenje z kioskom natwarił. Gastronom Steffen Laube chce Jansku kupjel wobhospodarić. Po dlěšim času so wón z Berlina do domizny nawróći. W kupjeli chce wón nimo toho koncerty a filmowe wječory organizować. Z městom je najprjedy raz probowy čas jedneje sezony wujednany. Potom chce komuna kupjel znowa wupisać. Dohromady płaći ponowjenje kupjele 435 000 eurow. Tele wudawki financuja ze swójskimi srědkami a ze spěchowanjom z europskeho fondsa za regionalne wuwiće.

7. lětnik Ralbičanskeje Serbskeje wyšeje šule je sej wčera z wučerku Gabrielu Cyžowej a wučerjomaj Křesćanom Zahrodnikom a Janom Rjedu do Techniskich zběrkow do Drježdźan dojěł. W tamnišej wustajeńcy ličenskeje techniki přednošowachu ­šulerki a šulerjo w serbskej rěči wo stawizniskich temach informatiki, na přikład wo firmach Apple, Microsoft, Nintendo, Robotron a IBM kaž tež wo Konradźe ­Zusym. Přednoški běchu wuknjacy do toho w šuli spřihotowali. Dale zaběrachu so na wšelakich stacijach z fyziskimi a matematiskimi prawidłami a wosebitosćemi. Po wopyće muzeja smědźachu šulerki a šulerjo po měsće dundać, prjedy hač so połnje zaćišćow zaso z ćahom do Łužicy nawróćichu. Foto: Jan Rjeda

Před 75 lětami, 6. julija 1947, je po Druhej swětowej wójnje zaso serbska nowina wušła

Na prašenje, što zwostanje z toho, štož je w powójnskim času hač do přewrótoweje doby było, njehodźi so lochce zrozumliwa wotmołwa nadeńć. Što pak, hdyž sy sam we wonym času dźěłał? Je wšitko wopak było, ničo hódne? Přećiwo tajkemu zhladowanju so raznje wobaram, tež w mjenje swojich rowjenkow. A to runje na dnju 75. róčnicy wuchadźenja prěnjeho wudaća Noweje doby.

Wěm, zo budźe so za połsta lět hinak sudźić, wo našich skutkach a mojedla njeskutkach. Ale po kotrych měritkach?

Nowa doba, wot 1947 hač do kónca 1990 serbska nowina za Hornich Serbow, bě, telko je jasnje, stołp serbskeje publicistiki a nochcyjo ale bóle chcyjo maćerka slědnych serbskich publikacijow, kaž su to Nowy Casnik, Rozhlad abo Płomjo.

TJ Sokol Spálené Poříčí –

Sokoł Ralbicy/Hórki 0:2 (0:2)

Zestawa domjacych: Martin Prantner – Jaroslav Sklenář, Štěpán Kuneš, Jaromír Roj, Ondra Bláha, David Gross, Václav Homolka, Jakub Sloup, Jakub Tupý, Marek Hofman, David Šlajs, Luděk Tupý, Václav ­Hulec, Jan Jindřich

Zestawa hosći: Štefan Pospíšil – Maik Brězan, Jan Hrjehor, Enrico Krawc, Michał Serbin, Markus Serbin, Fabian Pilc, Livius Frencel, Antonius Wałda, Konstantin Hrjehor, Filip Hoffmann, Lavinia Frenclec, Stella Pilcec, Linus Hrjehor

Po dwěmaj lětomaj přestawki běše skónčnje zaso móžno partnerstwo mjez městom Spálené Poříčí, gmejnu Ralbicy-Róžant a sportowcami sportoweju je­dnotkow hajić. Wot 1965 zetkawaja so sportowcy, wot 2014 tež zastupjerjo města a delanskeje gmejny. Tuž bě so lětsa tež wospjet wjesnjanosta Hubertus Ryćer wobdźělił. Někotre přećelstwa haja hižo wot wšeho započatka.

Po pjatkownym přijězdźe w 300km zdalenym Spáleném Poříčí a postrowjenju w swójbach, steješe sobotu dopoł­dnja kultura w srjedźišću. Zhromadnje podachu so wšitcy na wulět k hrodej Zbiroh mjez Plzenjom a Prahu. Po koparskim duelu popołdnju na ponowjenym sportowym arealu (hlej rozprawa) Serbja a Češa na sportnišću zhromadnje wječerjachu a hajachu dale přećelstwa. Tež nowe nastachu. Po zhroma­dnym wobjedźe podachu so Ralbičenjo zaso na dompuć a chwalachu sej dobru organizaciju a dźakowachu so ze serbskim spěwom. Za klětu slubichu domjacy, zo přińdu z wulkej delegaciju na stolětne wobstaće sportoweho towarstwa z Delan. Maik Brězan