Namjety za hornjoserbske słowo lěta hišće hač do soboty zapodać
Budyšin (SN/bn). Prěnja faza akcije Hornjoserbske słowo lěta 2025 (HSSL) so nachila. Hišće hač do zajutřišeje soboty přijimujetej zarjadowarjej Ludowe nakładnistwo Domowina (LND) a Serbske Nowiny (SN) namjety čitarstwa za lisćinu, kotruž přichodnu srjedu, 17. decembra, wozjewitej. Samsny dźeń zahaji so wothłosowanje. Hač do 23. decembra móža wšitcy zajimcy swój hłós za HSSL wotedać. W mjezyčasu prezentujetej LND a SN namjety na swojich digitalnych kanalach, hdźež je zdobom skrótka rozjimaja. Namjety móža so přez na webstronje SN wozjewjeny wotkaz abo z pomocu tu wotćišćaneho qr-koda zapodać. Po samsnym puću budźe móžno, so na wothłosowanju wobdźělić. Dochadźeja-li namjety sčasom z mejlku na , so tohorunja wobkedźbuja. Tež wothłosować so po tymle wašnju hodźi, je-li mailka z hesłom HSSL woznamjenjena.
Žitawa/Budyšin (SN/MiP). Dohromady štyri nahrawanske terminy w nadawku digitalneho regionalneho radijoweho sćelaka Radio Zett w Žitawje steja tute tydźenje w protyčce Michała Cyža, šefa Budyskeho Studija LUCIJA. Z podpěru basnika Benedikta Dyrlicha produkuje tam radijowy žurnalist Andreas Herrmann štyri nowe wusyłanja za lětuše – mjeztym hižo třeće – „Serbske čitanske pućowanje“.Hižo nahrawali a tydźenja jako podcast na internetnej stronje radija wozjewili su čitanje Marki Maćijoweje a Měrany Cušcyneje z antologije „Der Fiedler unterm Dach“. Kniha bě wóndano w Ludowym nakładnistwje Domowina (LND) wušła a wobsahuje prozu serbskich awtorow w času mjez 1945 a 1990. W druhim, tohorunja hižo wozjewjenym wusyłanju čita basnica a wučerka na Serbskim gymnaziju Budyšin Sylwija Šěnowa basnje ze swojeje zběrki „Mosty přez morjo“, kotruž bě LND před lětomaj wudało.
Na wokrjesnej runinje su so nimale wšitcy koparjo hižo do zymskeje přestawki rozžohnowali. Jeničce we wokrjesnej wyšej lize wotmějetej so sobotu a njedźelu hišće dwě nachwatanskej hrě. Zeleno-běli Bukecy nastupja přećiwo SC Wulke Rědorjecy a SJ Chrósćicy přećiwo Drohotce Ramnow. Předstajimy tu aktualny staw w tabulkach na kóncu prěnjeje połserije.
Prezident Venezuele Nicolás Maduro (srjedźa) je so wčera w stolicy Caracasu na demonstraciji składnostnje róčnicy wulkeje bitwy za čas wobydlerskeje wójny 1859 njedaloko města Santa Ines wobdźělił. Hladajo na přiběrace wohroženje ze stron USA napominaše wón wobydlerjow, zhromadnosć wobchować a njewotwisnosć kraja zakitować. Foto: dpa/Christian Hernandez
Na Póstowym naměsće prěni raz wosebite adwentne wikiBudyšin (SN/MWj). Prěni raz přewjedu Budyske turistiske towarstwo, management nutřkowneho města a Serbska kulturna informacija (SKI) sobotu a njedźelu na Póstowym naměsće zhromadne dohodowne wiki. Wopytowarjow wočakuja 13. a 14. decembra nimo pisaneho programa tež najwšelakoriše poskitki. Tak móža na woběmaj dnjomaj serbske figury z hliny zhotowjeć a hodowne kule debić. Wjacori wuměłcy wustupja ze swojim programom. Mjez druhim čita Wotrowčanka Stephanie Domaškec swójske hodowne stawiznički a na jewišću před Serbskim domom zahudźa šulerjo Budyskeho Serbskeho gymnazija.Jedna z wosebitosćow budu tyzy, kotrež móžeš pola jednotliwych wikowarjow z darikami pjelnić a rjenje zapakować dać. Na te wašnje hodźa so pakćiki indiwidualnje zestajić. Při wudebjenju pomhatej team SKI a Kerstin Roscher w swojej molowanskej kofejowni. Zarjadowarjo přihotuja zdobom kulinariske wosebitosće kaž plincy, poliwki, horce cocktaile, grilowane kołbaski a mjaso, ...
Lars Gottschling drje wě, zo je wjele profitabelnišich inwesticijow hač załoženje wjesneho nakupowanišća. Najebać to je pjenjezy, kotrež je z imobilijemi a wobnowjomnymi energijemi zasłužił, na dobro swojeje domizny, Njeswačidła, inwestował. Zo su Sakske Nowiny tamnišemu předawanišću „Nahkauf“ wutoru poł strony wěnowali, je dalši wupłód noweho myta Domowiny za hospodarstwo, z kotrymž buštaj njedawno Lars Gottschling a Ronny Škoda wuznamjenjenaj. Škoda, z kotrymž je Gottschling wjele lět spřećeleny, ma jako zamołwity we wotnožkach drobnowikowanja hižo wjele nazhonjenjow. Tohodla bě z Hórkow pochadźacy muž idealny partner za zwoprawdźenje tutoho zmužiteho hospodarskeho projekta, wo kotrymž su tež Serbske Nowiny hižo wospjet rozprawjeli.
Před wulkotnej kulisu Wjacławskich wikow su na Budyskim Hłownym torhošću wčera dźěći serbskeje pěstowarnje Jan Radyserb-Wjela wustupili. Ze swojimi jasnymi hłosami wupjelnichu naměsto z woblubowanymi hodownymi spěwčkami a wobkuzłachu z tym mnohich přihladowarjow. Nadobo dźěći rozbudźene wołachu: „Hdźe je rumpodich? Hdźe je rumpodich?“, a jich wołanje roznjese so po wikach. Krótko po tym so rumpodich zjewi a dźěći zawyskachu, jako wón jim dary rozdźěli. Wutrobu hrějace předstajenje pokročowaše a zahori wšitkich, kotřiž tutón krasny serbski dohodowny program dožiwichu. Foto: SN/Bojan Benić
„Lukášo, hdźe sy wčera był?“, praša so mje w Chrósćicach hnydom Monika, hdyž dźeń pozdźišo pola njeje z awtom zastanu, dokelž sym jej slubił, něšto wo čěskim Mikławšu za Serbski rozhłós prajić. „Ja běch wčera tola tón čert.“ Na to jej swoje čertowske „b
