Budyšin (SN/CoR). Žurla Budyskeho Serbskeho muzeja bě kopata połna, jako su minjenu njedźelu nowu wosebitu wustajeńcu „SORBIAN STREET STYLE“ wotewrěli. Mjez něhdźe 130 wopytowarjemi witaše direktorka muzeja Christina Boguszowa přirjadnicu Budyskeho krajneho rady Birgit Weber, direktora Załožby za serbski lud Jana Budarja a nawodu předsydstwa Ludoweje banki Drježdźany-Budyšin Tilmanna Römpa, prajo: „Smy přeswědčeni, zo móže wuwiće serbskeje a łužiskeje mody přez zakorjenjenje wšelakorych modelowych labelow tu we Łužicy wažne, identiće tyjace a do přichoda pokazowace być. Přeprošam was, so z nami zhromadnje z wjechlawku-darikom wo čerstwy wětřik tu we Łužicy starać!“ W přehladce pokazuja nimo dobyćerskich kolekcijow wubědźowanja SORBIAN STREET STYLE młodych designerow Leje Kelm, Christiany Dögel a Alexandera Gaertnera a Jana Lorenca modu hižo etablěrowanych designerow kaž Štefi Hanušoweje a naćiski šulerjow.
Njeswačidło (SN/CoR). Swoju tradicionalnu nazymsku čitansku turneju je Ludowe nakładnistwo Domowina sobotu z 25. literarnej kermušu w Njeswačidle zahajiło. Nimale połsta zajimcow bě přeprošenje na jubilejne zarjadowanje do tamnišeho hosćenca „Wosobna korčma“ sćěhowało.
Bukecy (SN/bn). „Ha widźu-li ptačata ćahnyć“ bě prěni, hodźacy so spěw prěnjeho zarjadowanja lětušeho rjadu nazymskich koncertow. Ze započatkom kalendariskeje nazymy dožiwi něhdźe 70 zajimcow na žurli Bukečanskeho koncertoweho a baloweho domu wustup chóra Lipa pod nawodom Jadwigi Kaulfürstoweje. Pančičansko-Kukowske ćěleso předstaji w hodźinskim programje přerěz swojeho repertoira. Tón wopřijima nimo serbskich ludowych pěsnjow, kaž na přikład „Zahraj nam rejku“ a „A ženje ja njejsym tak wjesoły był“, wuměłske spěwy mjez druhim Korle Awgusta Kocora, Jana Pawoła Nagela a Jana Bulanka, tradicionalne čěske, morawske a słowakske štučki kaž tež nowše kompozicije Měrćina Weclicha a Křesćana „Jamesa“ Młynka. Najwjace přikleska wuwabištej „Běži woda, běži“ w dynamisce interpretowanej sadźbje Jurja Winarja a jenički němski přinošk „Ptači kwas“ w njewšědnym, tak mjenowany „Kwasny pochod“ Felixa Mendelssohna Bartholdyja citowacym wobdźěłanju Thomasa Gabriela.
Zhorjelc (SN/CoR). Wosebitej serbskej temje wěnowane zarjadowanje wotmě so wčera wječor we wobłuku 5. Zhorjelskeho fotoweho festiwala „Městna podawkow“. Zapřijate do festiwala je wustajeńca fotografa Serbskich Nowin Maćija Bulanka „Prjedy hač woteńdźeš“. Jeho portrety wšědnych nošerkow serbskeje drasty – nastate w lětach wot 1985 do 2010 – su tuchwilu widźeć w dwórnišću kaž tež w cyrkwi Našeje knjenje w Zhorjelcu. Tam bě wčera něhdźe 20 zajimcow, předewšěm fanow fotografije, přišło na čitanje a rozmołwu z fotografom a basnicu Róžu Domašcynej. Organist cyrkwje wobrubi zarjadowanje na zakładźe hudźby Měrćina Weclicha z CD, z kotrejž je Ludowe nakładnistwo Domowina w lěće 2011 wušłeje knihi k portretam wudospołniło. Z podobnymi hudźbnymi meditacijemi su do toho hižo někotre razy připołdnju do wustajeńcy w cyrkwi wabili.
Judith Kubicec skutkuje wot hrajneje doby 2018/2019 jako intendantka Serbskeho ludoweho ansambla. K zazběhej noweje sezony je so Bosćan Nawka z njej rozmołwjał.
Knjeni Kubicec, kajki je Waš cyle wosobinski a powšitkowny facit po prěnim lěće jako intendantka SLA?
Wuznamny serbski komponist a lawreat Myta Ćišinskeho Juro Mětšk swjeći lětsa swoje pjećašěsćdźesaćiny. Ze składnostnje wuhotowanym koncertom „Gesta – dych – kosmos“ počesćichu jeho spočatk meje na žurli Serbskeho ludoweho ansambla w Budyšinje. Nětko změja zajimcy zwonka Łužicy přiležnosć, swjedźenske zarjadowanje wopytać.
Berlin/Podstupim (SN/bn). Renoměrowany a na swojim polu wodźacy komornohudźbny ansambl unitedberlin prezentuje njedźelu, 22. septembra, pod nawodom Ericha Wagnera w 19 hodź. w Berlinskej wili Elisabeth tři kompozicije Mětška „SESTETTO“, „SYNDROM“ a „STIGMA“.