Biskopičanki krajne mišterki
Po tym zo běchu holcy starobneje klasy młodźiny B Biskopičanskeho KT spočatk januara w Rychbachu/Hornja Łužica předkoło haloweho krajneho mišterstwa w futsal-kopańcy (forma haloweje kopańcy) dobyli, kwalifikowachu so za kónčne koło. Tute wotmě so sobotu, 25. januara, we Wodowych Hendrichecach.
Přitomne běchu dale koparske cyłki FFC Fortuna Drježdźany, TSV Spitzkunnersdorf, FC Rudne horiny Aue a RB Lipsk. Hraješe so po wosebitych regulach futsala stajnje 15 mjeńšinow po modusu kóždy přećiwo kóždemu.
Holcy Biskopičanskeho KT wote wšeho spočatka mócnje wojowachu. Tak dobychu prěnju hru přećiwo FFC Fortuna Drježdźany 2:0, druhu přećiwo TSV Spitzkunnersdorf 2:0 a přećiwo Rudnym horinam Aue so samo 5:1 přesadźichu.
Čestna jehła za Dietmara Kuballa
Sportowče a sportowcy Wojerowskeho FC běchu njedawno na nowolětne přijeće na žurlu Łužiskich dźěłarnjow přeprošeni. Prezident Wojerowskeho FC Bernd Ziemann je wuspěšne dźěło wšěch wotrjadow towarstwa pozitiwnje bilancował. Na wosebite wašnje hódnoćeše dorostowe dźěło w towarstwje a skutkowanje sudnikow.
Christoph Wels, předsyda wuběrka sudnikow Zapadołužiskeho koparskeho zwjazka (WFV) přewza wuznamjenjenje sudnikow: Mirko Scheffler dósta čestnu jehłu sakskeho koparskeho zwjazka w bronzy. Daniel Grader dósta čestnu jehłu WFV w slěbru, Steve Titze a Clemens Reiche dóstaštaj čestnu jehličku WFV w bronzy. Dorostowemu trenarjej Silvijej Schefflerej spožčichu čestnu jehłu WFV w bronzy.
Widźał, słyšał, napisał (03.02.25)
Awtor dźensa
Jurij Bjeńš
Sport (31.01.25)
Mjetańca w Slepom
W sportowej hali Slepjanskeje Němsko-serbskeje šule hraja šulerjo lětnikow wot 2016 hač do 2019 jutře mjetańcu, a to wot 9.45 hodź. hač do 12 hodź. Za wuspěšny dorost sportoweho towarstwa Lok Slepo budźe to posledni domjacy hrajny dźeń w aktualnej hrajnej dobje.
Worklečanki hraja znowa doma
We Worklecach hraje so jutře wolejbul. We wobwodnej lize Wuchodosaksa wojuje prěnje wolejbulowe mustwo žonow wo dypki. A to přećiwo cyłkej z Rózborka a Wolejfantkam. W samsnym času hraje druhe wolejbulowe mustwo muži Viktorije w Zhorjelcu.
01.02. 14:00 ST Viktoria Worklecy – ASV Rózbork (ž)
16:00 Ochranow. wolejfantki
01.02. 14:00 CVJM Zhorjelc II –
Viktoria Worklecy II (m)
06.02. 19:30 ST Marijina hwězda –
ST Bart (m)
19:30 Šumbachske VV (m)
Na jubilejny turněr so přizjewić
Žane dypki na kóncu tydźenja za liški
Łužiske lodohokejowe liški –
ESV Kaufbeuren 3:5 (3:2, 0:2, 0:1)
Hižo zahe přijimachu Běłowodźenjo prěnje chłostanje. Hra z jednym hrajerjom wjac na lodźe pak njebě strašna za liškow. Jako běchu zaso kompletni, docpěchu nawjedowanje 1:0 přez Jordana Tauperta (5.). A jenož štyri mjeńšiny pozdźišo zwyši Dylan Plouffe z třělwu z módreje linije na 2:0. Tola hosćo skrótšichu spěšnje na 2:1. Třělc wrotow Jacob Lagacé dyrbješe tačel po přihrawce Samira Kharboutlija jenož hišće w prózdnych wrotach zaměstnić (9.). Jenož dwě mjeńšinje pozdźišo postara so Lewis Zerter-Gossage po přihrawce Roope Mäkitalowa wo wospjetny předskok dwojich wrotow. Po tym, zo běchu so Kaufbeurenjo wot tutoho šoka zhrabali, wuskočichu w ofensiwje tež zaso někotre dobre akcije. Dwě mjeńšinje do přestawki přetwori Dieter Orendorz, pas Samija Blomqvista, direktnje do kućika a skrótši na 3:2.
Ralbičenjo kónc tydźenja dwójce testowali
Minjeny kónc tydźenja měješe za Ralbičanskich Sokołow charakter małeho treningoweho lěhwa. Pjatk wječor bě sej trenar Christoph Gloxyn swojich chowancow hišće po zwučenym wašnju na trening přeprosył. Sobotu přewjedźe so test přećiwo prěnjemu mustwu z Kulowa a njedźelu přećiwo druhemu zastupnistwu z Chrósćic.
Sokoł Ralbicy Hórki –
DJK Módro-běli Kulow 0:0
Zestawa domjacych: Schöne – Mikławšk, P. Šołta, Korjenk, L. Heidorn, Mjechela, Šewc, Rachel, Gloxyn, Woko, Šnajder, J. Šołta, E. Schulze, Hantsch, F. Šołta
Z kolesom z wětřikom po Łužicy a Europje
Mjez Kukowom a Kulowom stej w Serbach dwě skupinje wólnočasnych sportowcow, kotřiž su prawidłownje zhromadnje z wubědźowanskimi kolesami po puću. To stej Racing team Kukow/Worklecy z přewažnje serbskimi kolesowarjemi kaž tež KLW velo club, w kotrymž so kolesowarscy sportowcy z Kulowa a wokoliny zetkawaja. A tam su Serbja wězo tež zastupjeni.
Kukowčenjo wjerća swoje zhromadne koła přewažnje njedźelu, mjeztym zo so Kulowčenjo wot apryla hač do septembra we wotměnje srjedu a štwórtk k swjatokowej jězbje na něhdźe 60 km trjechja. Wězo zarjaduja na spočatku a na kóncu lěta zahajensku a zakónčacu jězbu, kotraž je něhdźe 100 km dołha. Loni Serbske Nowiny rozprawjachu, kak so jednotliwi sportowcy přez zymu fit dźerža a kotre zaměry za 2024 maja. Maik Brězan je so někotrych z nich prašał, hač su cile docpěli a što sej za 2025 předewzaja. Nimo toho zjima zajimawostki lěta.
Liški pytaja dorost
Sydom mustwow na halowym koparskim turněrje
Serbske koparske mustwo žonow bě so njedźelu na halowym cupje w Njedźichowje wobdźěliło. Hrajne zjednoćenstwo koparkow ST Nadrózna Hrabowka/Módro-běli Kulow bě 6. TDDK-halowy cup wuhotowało. Na nim wobdźěli so sydom mustwow. Nimo serbskeho cyłka hrajachu tam KT Ottendorf-Okrila, Zeleno-běli Bukecy, ST Lubuš, Wartenbergske ST Berlin 1974, SZ Gerbergrund Goppeln a zarjadowar Nadrózna Hrabowka/ Módro-běli Kulow. Hrajny modus wuhra so kóždy přećiwo kóždemu. Hrajny čas bě stajnje dwanaće mjeńšinow.
Prěnjej hrě dobychu serbske koparki přećiwo cyłkomaj z Bukec a Lubuša stajnje z 2:0. Wrota přećiwo Bukečankam třělištej Johanna Wjeselic a Tea Kuncec a přećiwo Lubušankam Marie Kralec a Johanna Wjeselic. Třeća a štwórta hra přećiwo hrajnemu zjednoćenstwu Nadrózna Hrabowka/Kulow a mustwu Gerbergrund Goppeln skónčištej so 0:0, pjatu partiju serbske mustwo 0:3 přećiwo pozdźišim dobyćerkam z Ottendorfa-Okrille přěhra a šesta hra měješe zaso pozitiwny wukónc. Serbske žony přesadźichu so přećiwo Wartenbergskemu sportowemu towarstwu 2:0. Znowa trjechištej Tea Kuncec a Johanna Wjeselic.
Splećenje nabožiny a politiki
Villanova (B/SN). Teologa Massimo Faggioli nabožnu inscenaciju zapokazanja Donalda Trumpa do zastojnstwa prezidenta wótrje kritizuje. „Přilizowanje ameriskich duchownych dopomina na Wladimira Putina a na rusko-ortodoksnu cyrkej, při wšěch rozdźělach“, praji Faggioli katolskej powěsćerni. Wón warnuje před znjewužiwanjom nabožiny za politiske zaměry.
Jubilar Anselm Grün
Münsterschwarzach (B/SN). Składnostnje 80. narodnin Anselma Grüna so jemu medije wobšěrnje wěnuja. Dotal je kniharnja klóštra w Münsterschwarzachu 20 milionow knihi najznaćišeho benediktinskeho mnicha předała, 300 titulow je běžnje w poskitku. Wob tydźeń ma mnich šěsć hodźin za literaturu rezerwowane. Lětnje je wón na 200 čitanjach ze zdźěla hač do 500 připosłucharjemi po puću.
Kaž nan a bratr
