Jaseńca (jp/SN). Nowostku dožiwichu wobdźělnicy beachtury Radija Satkule na druhej staciji wčera w Jaseńcy. Tam njeje so tutón raz tamniši młodźinski klub wo derjeměće starało, ale přichodni maturanća Serbskeho gymnazija. Woni su dotal prěni, kotřiž su wulku zamołwitosć na so wzali a zastaranje zaručili. Hižo loni chcyše so tehdyši 12. lětnik wo staciju w Jaseńcy starać. Wšelakich přičin dla pak dyrbjachu to zaso wotprajić. Dwanatkarjo běchu to derje zdokonjeli. Poskićene kołbaski a pomfritki, piwo, chłódne napoje a bowla su wšitkim słodźeli. „To wšitko smy jara derje předawali. Smy spokojom z wječorom“, wjeseleše so organizatorka Celina Knopec z Kozarc po zdokonjanym dźěle na kromje turněra.

Něhdźe 300 přihladowarjow sćěhowaše na hrajnej runinje fairny turněr z někotrymi napjatymi bojemi. W finalu hraješe Wotrowska młodźina přećiwo mustwu „Pampuchi“, štož běchu něhdyši šulerjo­ 10. lětnika Worklečanskeje wyšeje šule. Hra traješe hač k 21. dypkej, na kóncu so „Pampuchi“ přesadźichu.

Přichodna hosćićelska wjes beachtury je Róžant. (Čitajće tež na stronje 3.)

Něhdźe 300 ludźi je wčera wječor do Jaseńcy na druhu staciju bičwolejbuloweje tury Radija Satkule přichwatało. 17 mustwow, to bě 3 mjenje, hač tydźenja w Ralbicach, je so tam při wjesnym zetkanišću, tak mjenowanej „Bjesadźe“, wubědźowało. Za to běchu zarjadowarjo turněra, dwanatki Serbskeho gymnazija, nimo hrajnišća w pěsku dalše na trawniku spřihotowali. Dobyło je na kóncu mustwo „Pampuchi“, štož su Bobkec hólcy a přećeljo, přećiwo Wotrowskemu cyłkej „17.12“. Foto: Konstantin Hrjehor

ST Radwor –

ST Drohotka Ramnow 1:4 (1:1)

Zestawa domjacych: Ch. Šěrak, Matik – Wjesela, Omran, M. Grubert, Paška, Wróbl, Šnajder, Glücklich, Mička, Wjacławk, C. Dźisławk, Nuk, Hetaš, Šefer, Dej, Schöne

Prěnja přihotowanska hra za Radworskich koparjow přewjedźe so přećiwo znatemu přećiwnikej z wokrjesneje wyšeje ligi. Winowatostnej partiji přěhrachu hosćićeljo minjenu hrajnu dobu jónu 0:6 a wróćohru 2:3. Porno zašłej sezonje chcedźa Radworscy koparjo nětko trochu ofensiwnišo agěrować a z hinašej formaciju wrota přećiwnika nadběhować.

Hlinowske ST –

Sokoł Ralbicy/Hórki 0:4 (0:2)

Zestawa hosći: Schöne – Hantsch, Woko, Šnajder, Mikławšk, Hicka, Mjechela, Gloxyn, Schultz, Al. Wałda, B. Heidorn, L. Heidorn, Matka, Kral, Manuel Šołta, Bejmak, Rachela, Pius Šołta, Markus Šołta

Sokoljo trenuja hižo wot 5. pražnika zaso dwójce wob tydźeń. Minjenu njedźelu přewjedźechu prěnju testowu hru přećiwo lońšemu kontrahentej z wokrjesneje wyšeje ligi z Hlinowca. Hosćićel pak dyrbješe po jenož jednej sezonje zaso zestupić a hraje nětko zaso we wokrjesnej lize.

Trenar Christoph Gloxyn měješe kader z cyłkownje 19 hrajerjemi k dispoziciji, mjez nimi tež tójšto nowopřichadow. Tuž běše jasnje, zo dyrbješe so mustwo najprjedy namakać. W minjenych treningach bě mjenujcy prěnjotnje kondicija wažna. Hrajne formy pak bórze slěduja.