Radźićeljo so schadźuja
Lejno. Byrnjež němska koparska wubranka jutře w połfinalu europskich mišterstwow nastupiła, schadźuja so w 19 hodź. čłonojo Pančičansko-Kukowskeje gmejnskeje rady w Lejnjanskim hosćencu. Na dnjowym porjedźe steja předewšěm twarske naležnosće, mjez druhim wutwar puća Při młónčiku w Pančicach.
Tohorunja jutře, ale w 19.30 hodź. zeńdu so Worklečanscy radźićelo w šuli „Michał Hórnik“. Mjez druhim chcedźa tam šěsć wšelakich nadawkow za wobšěrne saněrowanje wjesneje sportownje rozdawać. Nimo toho wutworja sej stejišćo k zhromadnej přemysłowej přestrjeni serbskich gmejnow pola Miłoćic.
Wobě posedźeni stej zjawnej, zajimcy su tuž přeprošeni.
Pokiwaj (05.07.16)
Seminar za single
Smochćicy. Za ludźi, kotřiž su jako single žiwi, přewjedźe Smochčanski Dom biskopa Bena seminar wot 12. do 14. awgusta. Zajimcy su přeprošeni, so z temu „Jeli njebudźeće kaž dźěći“ zaběrać a spóznać, što napominanje za jednotliwca woznamjenja. Přizjewjenja přijimuja pod www.benno-haus.de abo pod telefonowym čisłom 035935/ 22 317.
Štwórtk na literarnu rozmołwu
Budyšin. Na literarnu rozmołwu z dr. Susannu Hozynej z Budyskeho Serbskeho instituta su zajimcy zajutřišim, 7. julija, (nic dźensa, kaž mylnje wozjewjene) w 19.30 hodź. do Budyskeje Smolerjec kniharnje přeprošeni. W srjedźišću stejitaj wuznamny serbski prócowar Jan Arnošt Smoler a jeho zběrka „Pěsnički hornich a delnich łužiskich Serbow“, kotraž słuša k standardnym twórbam ludowědy a sorabistiki. Přednošk budźe w němskej rěči.
Znowa rěčny kurs
Budyšin. Rěčny centrum WITAJ zarjaduje lětsa zaso intensiwny kurs čěšćiny za Serbow w Chrósćicach, a to wot 1. do 6. awgusta. Čech Pavel Šlechta budźe wšědnje šěsć hodźin wuwučować. Popołdnju čěscy hóstni referenća w swojej maćeršćinje wo čěskej kulturje, stawiznach a dalšich najwšelakorišich temach přednošuja. Nimo wulěta do Čěskeje su zabawne wječorki z čěšćinu planowane. Zajimcy njech so přizjewja w Rěčnym centrumje WITAJ pod telefonowym čisłom 03591/ 550 400 abo e-mailnje pod .
Na swojej internetnej stronje www.recny-centrum-witaj.de podawa rěčny centrum dokładniše informacije a program.
Wjace hač 600 serbskich dźěći je so tele dny we wjacorych wosadach ...
Pokiwy (01.07.16)
Znowa pisany program
Nowa Wjeska. Hižo 41. króć organizuja Nowowješćenjo swój wjesny swjedźeń, na kotryž su hosćo hač do njedźele witani. Z diskoteku Melodia a ze šlagrowej nocu so hejsowanje blisko Klóšterskeje wody dźensa wječor zahaji. Jutře wot 14 hodź. přewjedu volleyballowy turněr wjesnych mustwow, po tym budźe dźěćacy swjedźeń a wot 20 hodź. zapiska diskoteka Light Show. Po rańšim piwku a zhromadnej swačinje móža so hosćo z bliska a zdaloka njedźelu, 3. pražnika, po zwučenym wašnju w 15.30 hodź. na pisany program wjeselić. Swjedźeń zakónči so w 19 hodź. z rejemi z Melodia. Zastup je wšitke dny darmotny.
Boža słužba w stanje
Protyka (01.07.16)
Pjatk 1. do 3.7. Wjesny swjedźeń w Nowej Wjesce
24. Hućinjanski wjesny a hatny swjedźeń
Jězorowy swjedźeń w Bjedrichecach
Sobotu 2. a 3. 7. Festiwal New Sealand při Parcowskim jězorje
9:00 Pućowanje po Dubrjenskim bahnje – zetkanje při hosćencu w Michałkach
11:30 Telewizijiny magacin Wuhladko na MDR
15:00 Lětni swjedźeń při Hórnikečanskim wobydlerskim centrumje
15:00 Wjesny swjedźeń w Ćisowje (Zeißholz)
17:00 Wotewrjenje wustajeńcy „Dźěłaćerjo na wobrazu“ w Muzeju Budyšin
17:00 Komorno-hudźbne popołdnjo w Smochčanskej cyrkwi swj. Bena
17:00 „Pišćele zdypkom w pjećich“ – Koncert z Paulom Derrettom w Kamjenskej hłownej cyrkwi
Njedźelu 3.7. 10:30 Dźeń hórnika w Šćeńcy pola Drjowka
14:00 Zarjadowanje „Rejwanski čaj“ z DJku Coline na zahrodźe Małowjelkowskeje sotrownje
14:00 Koncert z chórom Kurta Schlossera na Biskopičanskej Butrowej horje
14:30 Kolesowanski wulět Domowinskeje skupiny Šunow-Konjecy
Rozhłós (01.07.16)
njedźelu, hornjoserbsce
11:00 Łužica tutón tydźeń
11:20 Na wopyće pola Witaj-dźěći w Malešecach a Němcach
11.45 Ma Załožba za serbski lud přewjele pjenjez?
12:00 Nabožne wusyłanje
(Christoph Rummel)
po tym zbožopřeća
delnjoserbsce
12:30 Aktualny magacin, mjez druhim wo abiturientce Delnjoserbskeho gymnazija
13:00 Koncert po přećach připosłucharjow
13:40 Nabožne wusyłanje
(Manfred Hermaš)
po tym zbožopřeća
Pokiwaj (30.06.16)
Dźěći předstaja cirkus
Wojerecy. Dźěćacy cirkusowy warjetej „Hoywoy“ přewjeduje tele dny cirkusowy camp na Wojerowskej dźěćacej a młodźinskej farmje. Jutře, pjatk, w 15.30 hodź. chcedźa swój program po móžnosći prawje wjele wopytowarjam předstajić. Lubowarjo cirkusa a wšitcy dalši zajimcy su tuž do wulkeho stana na dźěćacej a młodźinskej farmje wutrobnje přeprošeni.
Po bahnje pućować
Michałki. Na tři wodźene prózdninske pućowanja po Dubrjenskim bahnje přeproša w juliju Kulowska skupina přirodoškitneje organizacije NABU. Zarjadowanja wotměja so njedźelu, 3. julija, kaž tež sobotu, 16. a 30. julija. Zajimcy zetkaja so stajnje w 9 hodź. při hosćencu „Zum Mühlengrund“ w Michałkach. Wobdźělenje płaći na dorosćeneho dwaj euraj, dźěći móža so na wodźenju po přirodoškitnym pasmje Dubrjenskeho bahna darmotnje wobdźělić.
Do kina (30.06.16)
30.6.– 6.7.2016 Budyski filmowy palast: Ice Age – Kollision voraus: wšědnje 14:00 a 16:15 | nj 12:00 Ice Age: Kollision voraus w 3 D: wšědnje 15:00, 17:30 a 20:00 | pj a so 22:30 | nj 12:30 Smaragdgrün: wu 17:30 Conjuring 2: wšědnje 19:45 (nimo pó) | pj a so 22:00 Ein ganzes halbes Jahr: wšědnje 14:45, 17:15 (nimo pó) a 19:30 (nimo wu) | wu 20:00 | pj a so 22:30 Central Intelligence: wšědnje 17:00 (nimo wu) a 20:30 (nimo srj) Elsterglanz und der Schlüssel in die Weibersauna: wšědnje 18:30 Alice im Wunderland: nj 12:15 Angry Birds: wšědnje 14:45 | wu 9:45 Warcraft: The Beginning w 3 D: pj a so 22:45 Zoomania: nj 12:30 The Jungle Book: wu 9:45 Rico, Oskar und der Diebstahlstein: wu 10:00 Bibi & Tina: Mädchen gegen Jungs: wu 9:30
Kino-ekstra: Monsieur Chocolat: pó 17:15 a 20:15
Wojerowski CineMotion:
Ice Age – Kollision voraus w 3 D: wšědnje 13:25, 15:40, 17:55 a 20:10 | pj a so 22:20 Ice Age – Kollision voraus: wšědnje 12:05, 14:10, 16:20 a 18:30 | wu 10:00 Ein ganzes halbes Jahr: wšědnje 15:05, 17:30 a 20:35 | pj a so 22:55 Central Intelligence: wšědnje 17:15 (nimo nj a srj) a 19:45 | pj a so 22:05 Conjuring 2: wšědnje 19:50 | pj a so 22:35 Alice im Wunderland: wšědnje 12:40 | wu 10:20 Einmal Mond und zurück: wšědnje 13:00 | wu 10:30 Angry Birds: wšědnje 15:00 | wu 10:55 Smaragdgrün: nj 17:15 Freeheld: srj 17:15
Pokiwaj (29.06.16)
Maltezojo swjeća
Kamjenc. Składnostnje 20lětneho wobstaća Kamjenskeho wustawa maltezow swj. Moniki přewjedu tam pjatk, 1. julija, lětni swjedźeń z dnjom wotewrjenych duri. Wón započnje so w 14 hodź. z Božej słužbu, kotruž wobrubi šola z Wóslinka. Přizamknje so kofej z tykancom, k čemuž zaklinči dujerska hudźba. Tež sobudźěłaćerjo su program přihotowali. Tuchwilu maja w Kamjenskej hladarni 86 wobydlerjow a dźesać dalšich w nachwilnym hladanju. Dwanaće žonow a muži zetkawa so nimo toho w dnjowej hladanskej skupinje, zdźěli nawodnica wustawa Andrea Špitankowa.
Tekstilna dźěłarnička
Budyšin. Pod hesłom „Stare mustry na nowej drasće“ poskića Budyski Serbski muzej 16. a 23. julija stajnje wot 10 do 13 hodź. tekstilnu dźěłarničku. Wona je wšitkim starobnym skupinam přistupna. Za dźěći hač do šěsć lět pak je radźomne, zo so přewodna wosoba sobu wobdźěli. Štóž chcył so na dźěłarničce wobdźělić, měł so na kóždy pad přizjewić. Nadrobniše informacije pod www.sorbisches-museum.de
