Statysacy na dróhach Parisa
Paris (dpa/SN). Lutowanskich planow francoskeho knježerstwa dla su so dźensa statysacy ludźi k protestam na dróhach francoskeje stolicy Parisa zhromadźili. Zamołwići z toho wuchadźeja, zo so hač do 800 000 demonstrantow na protestach wobdźěla. Nimo měrniwych wobdźělnikow wočakowaše policije tež namócnosće. Nutřkowne ministerstwo je 80 000 policistow mobilizowało.
Stawkow dla bě zjawne žiwjenje w Francoskej dźensa zlemjene. Wučerjo so na stawkach runje tak wobdźělichu kaž wobchodnicy. Železniski wobchad bě sylnje wobmjezowany. K stawkam běchu dźěłarnistwa namołwjeli. Wone lutowanske plany wotpokazuja. Mjez druhim chce knježerstwo swjatkaj šmórnyć.
Cyłoněmska jězdźenka zaso dróša
Mnichow (dpa/SN). Wobchadni ministrojo Němskeje su dźensa w Mnichowje na wurjadnej konferency wo dalšim zwyšenju płaćizny za cyłoněmsku jězdźenku za zjawny bliskowobchad wuradźowali. Po njewobkrućenych informacijach móhła jězdźenka klětu mjez 62 a 64 eurow płaćić, powěsćernja dpa z kruhow wobdźělnikow zhoni. Spočatk lěta běchu tiket wot 49 na 58 eurow podróšili.
Płaćiznu cyłoněmskeje jězdźenki postaja konferenca wobchadnych ministrow zwjazkowych krajow. Zwjazkowe knježerstwo je na konferencu jako hósć prošene. Zwjazkowa rada jako zastupnistwo krajow ma płaćiznu doskónčnje wobzamknyć. Cyłkowne kóšty jězdźenki njesu zwjazkowe kraje a knježerstwo w Berlinje.
Zwjazkowe kraje su pječa zwólniwe, dołhodobnje hač do lěta 2030 kóždolětnje zhromadnje 1,5 miliardow eurow přinošować, jeli zwjazkowe knježerstwo tohorunja 1,5 miliardow eurow wob lěto garantuje. Dotal předleži připrajenje Zwjazka jenož za lěto 2026.
Israel dale podpěrować!
Centralna rada Židow w Němskej 75. róčnicu swojeho wobstaća swjećiła
Berlin (dpa/SN). Centralna rada Židow w Němskej je zwjazkowe knježerstwo namołwjała, Israel dale bjez wobmjezowanja podpěrować. Prezident centralneje rady Josef Schuster apeluje w tym zwisku na zwjazkoweho kanclera Friedricha Merza (CDU), zo njeby so „wot tutoho puća wotwjesć dał“, nic wot druhich europskich krajow a tež nic „wot jednotliwych zapósłancow“ zwjazkoweho sejma. „Němska dyrbi jasnje po boku Israela stać“, Schuster rjekny.
Tež wón wšitke rozsudy israelskeho knježerstwa ministerskeho prezidenta Benjamina Netanjahuwa njerozumi. Wuprajenja jednotliwych ministrow israelskeho knježerstwa zbudźeja tež mjez Židami zwonka Israela wulke diskusije, Schuster w swojej narěči w Berlinje rjekny. Najebać to dyrbi Němska wěstotu Israela zaručić, njewotwisnje wot toho, kak ministerski prezident runje rěka.
Přewrót w Njeswačidle
Žadyn popłatk za foliju wosuška
Drježdźany (dpa/SN). Wjele diskutowany wotedawk na zapakowanje hodowneho wosuška je najprjedy raz z blida. Zwjazkowe wobswětowe ministerstwo je zdźěliło, zo winowatostny popłatk njezawjedźe, doniž njejsu wšitke znapřećiwjenja přećiwo tomu doskónčnje wobdźěłane, zdźěla sakski hospodarski minister Dirk Panter (SPD). Wón rěčeše w tym zwisku wo „njeběrokratiskim znamjenju dobreje wole“.
„Chcemy naš wobswět škitać, tola z rjadowanjemi, kotrež su realistiske a praktisce móžne“, Panter rjekny. „750 gramow ćežki wosušk runje tak zastopnjować kaž plastowy kofejowy nopašk je w mojimaj wočomaj absurdne.“
Hłowny jednaćel Drježdźanskeje rjemjeslniskeje komory Andreas Brzezinski rěčeše wo pozitiwnym signalu. „Móže so jenož wo nachwilnu kročel jednać, dokelž je tutón popłatk běrokratiski njezmysł.“ Trěbne je praksy bliske dołhodobne rozrisanje w zmysle wšěch pjekarjow, kotřiž wosušk pjeku.
Zwjazkowy wobswětowy zarjad bě rozsudźił, zo płaći za w foliji zapakowany, 750 gramow wažacy wosušk zakoń wo wotpadkach. Z tym měł sej stat popłatk žadać.
Tójšto zajima za přichod bywšeje piwarnje w Mužakowje
Mužakow (JoS/SN). Druhi króć po sydom lětach su minjeny kónc tydźenja składnostnje Dnja wotewrjeneho pomnika historisku piwarnju w Mužakowje wotewrěli. Tójšto wopytowarjow bě tam přichwatało. Wosebje zajimowachu so za twarski staw stareho zawoda ze swojoraznej architekturu.
Piwarnja je 1845 w poslednjej fazy skutkowanja wjercha Pücklera w Mužakowje nastała. Na jednej ze swojich jězbow bě Pückler pjeć lět do toho wjercha Metternicha a z nim tež Plzeńske piwo zeznał. Metternich dari Pücklerej recept woneho sławneho napoja. Tole bě zakład piwarnje, kotraž je wuspěšnje hač do kónca Prěnjeje swětoweje wójny dźěłała. Po tym zawod priwatizowachu a ze zawostajenstwa Pücklera wuwjazachu. Za čas NDR produkowachu tam njealkoholiske napoje. Po wjelelětnym rozpadowanju je město Mužakow objekt bywšeje piwarnje 2017 kupiło a lěto po tym prěni króć zjawnosći we wobłuku Dnja wotewrjeneho pomnika předstajiło.
To a tamne (18.09.25)
We Venedigu chcedźa sej zastup tež klětu zaso žadać, a to samo dlěje hač lětsa. Město nad lagunu na sewjeru Italskeje chce sej 2026 na cyłkownje 60 dnjach mjez spočatkom apryla a kóncom julija wot dnjowych turistow popłatk žadać. Z tym bychu wjele diskutowane rjadowanje hižo třeće lěto nałožowali. Lětsa su sej na 54 dnjach pjeć do dźesać eurow žadali. Što ma zastup klětu płaćić, njeje znate. Wšitcy pak z toho wuchadźeja, zo budźe popłatk za turistow dróši.
Němske wurisanje za přichodny Eurovision Song Contest ESC wotměje so klětu bjez entertainera Stefana Raaba a toho sćelaka RTL. Zamołwity sćelak SWR je wotpowědne rozprawy medijow wobkrućił. „Po tuchwilnym stawje žanu kooperaciju ze Stefanom Raabom njeplanujemy, SWR wčera zdźěli. „Z kajkimi partnerami wurisanje přewjedźemy, njeje hišće znate.“
Za spěšniši kónc ruskeho płuna
Brüssel (dpa/SN). Prezidentka komisije EU Ursula von der Leyen je po rozmołwje z prezidentom USA Donaldom Trumpom spěšniši kónc wšěch europskich płunowych a wolijowych importow z Ruskeje připowědźiła. Ruska financuje krejpřeliwanje w Ukrainje tež z dochodow předawanja wolija a płuna, piše von der Leyen internetnje. Zo by tomu zadźěwała, chce EU import z Ruskeje hišće spěšnišo hač su to poprawom planowali skónčić.
Podhladny před sudnikom
Spanish Fork (dpa/SN). Po smjertnym wutřělu na prawicarskeho aktiwista Charlieja Kirka su pozdatneho skućićela prěni raz sudnikej předstajili. 22lětny Tyler Robinson sedźi w jastwje w zwjazkowym staće Utah, hdźež bě nadpad minjenu srjedu skućił. Podhladny njeje so kaž wočakowane k wumjetowanjam přećiwo njemu wuprajił. Jemu wumjetuja mordarstwo. Jeli jeho zasudźa, hrozy jemu w Utah chłostanje ze smjerću.
Lěpši škit před sabotažu trěbny
Widejowe wobrazy, kotrež pokazuja prezidenta USA Donalda Trumpa ...
UNO: Połoženje grawoćiwe
Gaza/Tel Aviv (dpa/SN). Generalny sekretar UNO António Guterres je dalšu eskalaciju Gazaskeje wójny ze stron Israela z raznymi słowami zasudźił. „Štož so dźensa w Gazy stawa, je grawoćiwe. Dožiwjamy masiwne zničenje cyłych měšćanskich štwórćow, systematiske zničenje města Gazy“, rjekny Guterres w New Yorku. Tajku namóc njeje wón w swojim hižo dźewjeć lět trajacym zastojnstwje hišće dožiwił. „To je moralisce, politisce a prawnisce njeznjesliwe“, tak Guterres. Israelske wójsko je minjenu nóc wojersku ofensiwu w měsće Gazy zahajiło.
Połoženje w Gazy chcedźa na generalnej debaće UNO tematizować. Israel zastopnjuje Guterresa jeho kritiskeho nastajenja dla jako „njewitanu wosobu“.
