Za dalši nawrót do Afghanistana
Berlin (dpa/SN). Zo móhli wjace ludźi do Afghanistana wotsunyć, chce zwjazkowe knježerstwo w rozmołwje z nowymi mócnarjemi w stolicy Kabulu praktiske zadźěwki wotstronić. „Chcemy regularny a prawidłowny nawrót migrantow do Afghanistana zmóžnić“, rjekny zwjazkowy nutřkowny minister Alexander Dobrindt (CSU). „Wjedźemy rozmołwy ze zastupnikami Afghanistana na techniskej runinje.“
Nutřkopolitiski rěčnik Zelenych Marcel Emmerich rěčeše wo skandalu, pokazujo na to, zo funguja talibanojo jako akterojo mjezynarodneho terorizma. Po přewzaću mocy přez talibanow w awgusće 2021 su dotal dwójce zasudźenych skućićelow do Afghanistana dowjezli.
Arabski wjeršk w Kataru Israela dla
Doha (dpa/SN). Statni a knježerstwowi šefojo nimale 60 arabskich a islamskich krajow su so dźensa na wurjadny wjeršk w Kataru zešli, zo bychu za zhromadnej wotmołwu na powětrowy nadpad Israela na emirat w Persiskim zaliwje pytali. „Wažimy sej nastajenje arabskich a islamskich krajow a jich solidaritu hladajo na israelsku agresiju“, rjekny ministerski prezident Katara Mohammed bin Abdulrahman Al Thani w stolicy Doha.
Israelske wojerske lětadła běchu minjenu wutoru spytali, nawodnistwo islamistiskeje organizacije Hamas w Kataru morić. Po informacijach Hamas pak je nadpad zwrěšćił. Nadpad běchu mjezynarodnje raznje zasudźili. Katar rěčeše wo „statnym terorizmje ze stron Israela“.
Medije wočakowachu, zo dojednaja so nawodźa arabskich a islamskich statow na zhromadnu deklaraciju z jasnymi słowami. Ministerski prezident Al Thani sej žadaše, zo dyrbjeli słowam skónčnje tež skutki slědować. Zdobom chcedźa diplomatiske prócowanja k skónčenju Gazaskeje wójny dale wjesć a zesylnić.
CDU jasnje dobyła – AfD třeća
Komunalne wólby w Sewjerorynsko-Westfalskej tež test za Berlin byli
Düsseldorf (dpa/SN). CDU je w komunalnych wólbach w Sewjerorynsko-Westfalskej (NRW) najebać snadne straty dale najsylniša politiska móc. K dobyćerjam wólbow w na wobydlerjach najbohatšim zwjazkowym kraju Němskeje pak słuša tež AfD, kotraž je swój wuslědk potrojiła. Z tym zaběra wona třeće městno. Druha je SPD. Zeleni su přirunujo z komunalnymi wólbami 2020 kopicu wolerjow zhubili.
Wothłosowanje w NRW bě zdobom prěni test politiskeje nalady za nowe zwjazkowe knježerstwo CDU/CSU a SPD pod nawodom zwjazkoweho kanclera Friedricha Merza (CDU) po dočasnych wólbach zwjazkoweho sejma lětsa w februaru.
Po tuchwilnym kónčnym wuslědku je CDU w měšćanskich radach a wokrjesnych sejmikach 33,3 procenty (2020: 34,3 procenty) docpěła. SPD dósta 22,1 procent (2020: 24,3 procenty), zdźěli krajna nawodnica wólbow. AfD zdoby sej w Sewjerorynsko-Westfalskej 14,5 procentow (2020: 5,1 procent), Zelenych woleše 13,5 procentow (2020: 20,0 procent). W NRW bě AfD Zelenych hižo we wólbach zwjazkoweho sejma 23. februara přesćahnyła.
Poruhrska a Sakska
Tójšto studentow bjez bydlenja
Lipsk/Drježdźany/Kamjenica. (dpa/SN) Do zahajenja noweho studijneho lěta su studentske internaty w sakskich uniwersitnych městach nimale dospołnje wućežene. Mnozy studowacy čakaja na městno, kaž z naprašowanja dpa wuchadźa. Dohromady su studentam w Lipsku, Drježdźanach a Kamjenicy wjace hač 12 900 městnow w internatach přewostajili. Kopica zajimcow pak nima hišće bydlenje. Jeničce w Drježdźanach potrjechi to kóžde lěto něhdźe 1 000 młodostnych. W Lipsku steji něhdźe 200 studentow na čakanskej lisćinje, w Kamjenicy nimale 500.
Podruž je jara rozdźělna a saha wot něhdźe 170 eurow za jednoru stwu hač do 500 eurow za moderne saněrowane bydlenje. Zdźěla su tež płaćizny stupali. W Drježdźanach a w Lipsku drje maja so internaty w přichodźe saněrować abo nowe nastać, tola potrjeba za bydlenjemi tute planowanje njekryje. W Kamjenicy njejsu dotal nowotwary předwidźane.
Swobodny kraj Sakska chce studentske bydlenja w přichodźe přidatnje z pjeć milionami eurow lětnje podpěrać. Tak chcedźa financne njedostatki wurunać.
Z přełožkami so zaběrali
Dorozumja so wo kubłanju
Erfurt (dpa/SN). Durinska, Sakska a Saksko-Anhaltska chcedźa so nastupajo kubłanje lěpje mjez sobu wotrěčeć. Na zetkanju w Erfurće wuzběhnychu kubłanscy ministrojo zhromadne problemy, kaž njedostatk wučerjow, wupad wučby a demografiske wuwiće.
Hižo wjacore lěta bědźa so srjedźoněmske kraje z přemało wučerjemi. Runočasnje woteběra ličba pěstowarskich dźěći. Tole najprjedy raz wućeženje pěstowarnjow zniži, ale pozdźišo tež zakładne šule potrjechi. Hižo spočatk lěta zetkachu so ministrojo w Saksko-Anhaltskej, klětu ma Sakska hosćićel zeńdźenja być.
W Erfurće chcedźa tematiku zhromadne wujasnić. Ćežišća zhromadneho dźěła su dalekubłanja. Tak móhli durinscy wučerjo tež w Sakskej abo Saksko-Anhaltskej dalekubłanja wopytać a nawopak. Tež přichodni wučerjo měli přiražki dóstać.
Nimo toho mjenowachu ministrojo digitalizaciju jako wažnu temu přichoda. Wuměna wo konceptach ze susodnymi krajemi je za to zmysłapołna a trěbna, wuzběhny durinski minister za kubłanje, Christian Tischner (CDU).
To a tamne (15.09.25)
Mobilny telefon je při nurjenju namakał němski dowolnik pola Alcúdia na kupje Mallorca. Ani w hotelu ani pola policije wo nastroj njerodźachu, jako chcyše muž jón tam wotedać. Tuž wza 44lětny telefon sobu do Němskeje a přepoda jón policiji w bayerskim Ansbachu. Tam so zastojnikam poradźi, wobsedźerja smartphona wuslědźić. Muž bydli w Londonje. Policistka chce handy do dowola sobu wzać a jón w Londonje wotedać.
Swimmingpool je šoferow wosrjedź zwjazkoweje dróhi B 41 w Porynsko-Pfalcy zadźeržał. Wosrjedź mosta bě so připowěšak z plastowym basenkom sylneho wichora dla powalił. Policija nadróžny wobchad pomału při powalenym nastroju nimo wjedźeše, doniž njebě připowěšak zaso z dróhi. Při akciji so nichtó njezrani. Kupać so tak a tak nichtó njemóžeše, dokelž woda w nim njebě.
Serbski Oscar do Chrósćic
Marko Wjeńka
Ze superlatiwami dyrbiš zlutniwje wobchadźeć, dokelž so spěšnje přetrjebaja. Tole je žurnalist Hanns Joachim Friedrichs 1989 rjekł, po tym zo běchu jemu powěsć na blido połožili, zo je Berlinska murja wotewrjena. Tola na kóncu njeměješe tež wón žadyn druhi wuraz hač „historiski“, hladajo na tutón podawk.
Mi nochce hladajo na hoberski wukon Chróšćanow w lěće 2025 tež ničo druheho do mysli přińć hač „historiski“. Hdy smy tajke něšto hižo raz měli? Tři kulturne wjerški, kotrež su sej wjele dźěła a prócy a wosebje wutrajnosć žadali. Jubilejne swjatočnosće k 800. róčnicy naspomnjeja wsy w juniju běchu přewšo poradźene a dostojne. Swjedźenski ćah z wjace hač 40 wobrazami a sobuskutkowacymi wšěch wjesnych dźělow bě impozantny.
Folklorny festiwal jenož dny po tym bě kaž přeco wulke wužadanje. A nětko tež hišće pasion. Tón je wšitkich sobuskutkowacych wosebje napinał: Přihoty su hižo před lětom zahajili. Na kóncu steješe 180 wosobow na jewišću. Jich hrajerski wukon je wšitkich zahorił.
Pólska wobroća so na UNO
Waršawa (dpa/SN). Pólska žada sej zadobyća ruskich trutow do swojeho powětroweho ruma dla nuznje posedźenje wěstotneje rady UNO. Tole zdźěla wonkowne ministerstwo we Waršawje. Wonkowny minister Radosław Sikorski rjekny rozhłosownikam, zo chcył „kedźbnosć wšeho swěta na nadpad bjez runjeća na čłonski kraj UNO, na Europsku uniju a na NATO“ wodźić. Zetkanje ma so dźensa wječor w New Yorku wotměć.
Zasudźuja nadpad Israela
New York (dpa/SN). Čłonojo wěstotneje rady UNO su w dotal přewšo rědkej zhromadnej deklaraciji wojerski nadpad Israela na wodźacych zastupnikow islamistiskeje organizacije Palestinjanow Hamas w Kataru zasudźili. Cyłkownje 15 čłonow gremija wupraji Katarej swoju solidaritu a podšmórny wuznam wotputanja w tutym konflikće. Při israelskim nadpadźe bě wutoru w Kataru šěsć ludźi žiwjenje přisadźiło. Nawodnicy Hamas wostachu pječa njezranjeni.
USA hroža wukrajnikam
