Peking (dpa/SN). Prezidentaj Chiny a Ruskeje staj na swojim zetkanju w Pekingu dobry poměr mjez krajomaj potwjerdźiłoj. Poćahi su pruwowanja mjezynarodnych změnow wobstali a móža so dale wutwarjeć, rjekny statny a stronski šef Chiny Xi Jinping statnej powěsćerni Xinhua. Po jeho słowach běštaj wobaj statnikaj wjace hač 20 kooperaciskich zrěčenjow podpisałoj, mjez druhim we wobłuku energije, lětarstwa, kumštneje inteligency a ratarstwa. Ruski prezident Wladimir Putin rjekny, zo su rusko-chinske poćahi „wysoki niwow bjez runjeća“ docpěli.

Što staj Xi a Putin wo wójnje w Ukrainje prajiłoj, njeje znate. Pječa rěčeštaj wobaj wo „regionalnych prašenjach“, kotrež su „w mjezsobnym zajimje“.

Drježdźany (dpa/SN). Sakska justicna ministerka Constanze Geiert so za to wupraja, zakoń wo změnje zapiskow wo splahu a předmjenow na stawnistwach předźěłać. „Nastupajo zakoń wo samopostajowanju dyrbi so něšto stać“, rjekny politikarka CDU w rozmołwje z Drježdźanskimi a Lipšćanskimi nowinarjemi. „Nochcemy zakoń wotstronić. Rozum pak sej žada, w zajimje potrjechenych hišće něštožkuli změnić.“ Tak měli so po jeje měnjenju jastwa wuraznje ze zakonja wo samopostajowanju wuzamknyć. Hladajo na pad zasudźeneje prawicarskeje ekstremistki Marle Svenje Liebich bě so samo zwjazkowy minister za nutřkowne naležnosće Alexander Dobrindt za změnu zakonja wuprajił. „Tónle pad pokazuje, kak jednore je, zakoń wo samopostajowanju znjewužiwać a zjawnosć, justicu a politiku na nós wodźić“, Dobrindt w tym zwisku rjekny.

Svena Liebicha běchu 2023 k jastwu zasudźili. Na to tón swój splah změni a chcyše jatbu w žónskim jastwje wotsedźeć. Wokomiknje je wón na ćěkańcy.

Politikar Zelenych chcył wólby krajnych sejmow Němskeje zjednoćić

Berlin (dpa/SN). Wiceprezident zwjazkoweho sejma Omid Nouripour w stronje Zelenych je za swoje žadanje za splećenjom wšěch terminow wólbow krajnych sejmow razne spjećowanje bayerskeje CSU žnjał. Jeje generalny sekretar Martin Huber wumjetowaše Nouripourej, zo chce zwjazkowym krajam samostatnosć wzać. „To je typiske zelene postajowanje a nješwarny nadpad na federalizm“, Huber kritizowaše. Wón w tym zwisku nowinarjam napřećo potwjerdźi: „My Bayerojo rozsudźimy sami wo swojim wólbnym terminje a wo dobje legislatury.“ Poli­tikar Zelenych bě namjetował, zo měł so we wšitkich zwjazkowych krajach Němskeje krajny sejm w přichodźe samsny dźeń wuzwolić. Nimo toho měła so wólbna doba zwjazkoweho sejma po jeho předstawach na pjeć lět rozšěrić a wothłosowanje z wólbami krajnych sejmow zwjazać, Nouripour nowinje Bild rozłoži. Z tym móhli kóšty a organi­zaciske mocy lutować. Načolny zastupnik Zelenych skorži na „wujachlenosć“ w politice.

Zo mniša rjada benediktinow swój klóšter we Wechselburgu wopušća, je wulka škoda, tole je Drježdźansko-Mišnjanski biskop Heinrich Timmerevers prawje spóznał. Biskopstwo zhubi tak mjenujcy duchowny rjap wažneho centruma wěry. Štož je nam Serbam Róžant, to je katolikam w zapadnym dźělu biskopstwa Wechselburg. Tam putnikuja młodźi a starši, tam napjelnjeja swoje duchowne resursy. Wosebje młodźinje biskopstwa bě a je klóšter wažny přistaw. W Ettalskim klóštrje je dźensa wjace hač 50 mnichow žiwych. Z tróšku dobrej wolu a snano tež optimizmom bychu so zawěsće zaso dwaj abo třo z nich zwólniwi wuprajili klóšter zachować. W biskopstwje kaž Drježdźansko-Mišnjanskim, hdźež je tak a znak mało katolikow a jich ličba dale spaduje, su swětłownje kaž klóštry wěriwym wažny signal. Tak woni spóznawaja, zo je jich wěra kruće w zjawnym žiwjenju zakótwjena. Ale wězo – nětko dyrbimy žarować. Bóh zwarnuj, zo protestujemy. Maximilian Gruber