Młodych muži chcedźa za wobornu słužbu mustrować

Berlin (dpa/SN). Nowa woborna słužba, wěstotna rada, woborna wěstota: Zwjazkowy kabinet je nowy pakćik zakonjow wobzamknył, kiž ma zwjazkowu woboru zesylnić a při tym wosebje na zawjazowace registrowanje a mustrowanje młodych muži dźiwać, ale dalšu dobrowólnosć słužby při brónjach zachować. Zakitowanski minister Boris Pistorius (SPD) pomjenowa naćisk zakonja wo zawjedźenju noweje woborneje słužby jako „hoberski krok doprědka“. Přihłosuje-li zwjazkowy sejm, ma nowy zakoń wot spočatka lěta 2026 płaćić. Zwjazkowy kancler Friedrich Merz (CDU) rjekny po posedźenju kabineta, kotrež bě so prěni raz po 19 lětach w rumnosći zakitowanskeho ministerstwa wotměło, zo je nadźije połny, zo dosć dobrowólnych namakaja. Wón zdobom wuzběhny, zo je winowatostna słužba móžna, jeli so dosć dobrowólnych njenamaka. Tak su to do naćiska sobu zapisali. „Smy zaso na puću k wójsku woborneje słužby“, wón dale praji. Tole je dobre wuwiće, kotrež wón doraznje wita. Wón tež na wohroženje Ruskeje skedźbni.

... abo kaž Serbja praja: Kuzło dnja su překwapjenki. A tajke su Pěskečenjo za sebje samych a za wšitkich přihotowali, kotřiž tónle kónc tydźenja w dobrej zhromadnosći z nimi swjeća. Z tym smy tež hižo při najwjetšej wosebitosći składnostnje jubileja prěnjeho naspomnjenja wsy před 800 lětami: při zhromadnosći. Ta wšak je motor wšitkich aktiwitow. Kaž w rozmołwach z wjesnjanami zwěsćich, bě jim wosebje wažne naspomnić, zo su wšitcy wobydlerjo, wšojedne hač so w towarstwach angažuja abo nic, jubilejny swjedźeń přihotować pomhali. Wosebje zwjeselace je, zo su w swojich priwatnych archiwach za dokumentami a fotami pytali, kiž wo Pěskecach powědaja. Na te wašnje předleži nětko zhubjena, ale lětdźesatki pytana wjesna chronika w cyle nowej formje a jako zhromadny produkt Pěskečanow. Tuž wjeselmy so na překwapjenki wosebiteho razu tele dny w Pěskecach a tež druhdźe po cyłej Łužicy, a to w najlěpšej zhromadnosći. Milenka Rječcyna

Swojeho 14lětneho syna staj staršej na wróćojězbje z dowola na parkowanišću při awtodróze A 3 w Baworskej zabyli. W Jendźelskej bydlaca swójba bě blisko města Lupburg skrótka pozastała, při tym je so hólc wotsalił, bjez toho zo byštaj staršej to pytnyłoj. Dokelž ležeše šmóratko hólca dale w awće, spyta tón z pomocu druhich šmóratkow swojeju staršeju docpěć. Po dwě a poł hodźinje so drama skónči a hólc staršeju zaso nadeńdźe.

Dokelž bě twarska firma za nowe wjesne srjedźišćo wo tři centimetry přemałe ławki skazała, dyrbješe mała wjeska Wipshausen blisko města Peine kompletne saněrowanje znowa wupisać. Město toho, zo bychu nowe naměsto w septembrje 2024 dotwarili, bu wone tohodla hakle w meji 2025 hotowe. Wyši měšćanosta města Peine so nětko nadźija, zo ławki druheho zmylka dla zaso wottwarić njedyrbja.

Drježdźany/Lipsk (dpa/SN). Wotnajerjow bydlenjow dyrbimy tež w přichodźe před přewysokimi podružemi škitać, měni sakska Lěwica. „Zakonske borzdźidło podružow ma tež po lěće 2025 płaćić. W Drježdźanach kaž tež w Lipsku su wiki bydlenjow napjate. Podruže stupaja a bydlenjow za mało pjenjez je přemało“, rjekny zapósłanča krajneho sejma Juliane Nagel powěsćerni dpa.

Politiska eskalacija hrozy

Genf/Teheran (dpa/SN). W rozmołwach wo atomowych brónjach, na kotrychž běchu so zastupjerjo knježerstwow z Irana, Němskeje, Wulkeje Britaniskeje a Francoskeje wobdźělili, njejsu so na prawe wuslědki dojednali. Rěčnik wonkowneho hamta Irana Ismail Baghai rjekny w statnej telewiziji, zo běchu so jenož wo pozicijach wuměnili. Bjez konkretnych wuslědkow hrozy nětko, hladajo na atomowy program Irana, politiska eskalacija.

Trut wopak lećał