To a tamne (28.05.15)
Swoje stare ručne tobołki wotbyć a město toho hinaše dóstać móža žony njedźelu, 7. junija, w Berlinje. K akciji namołwja syć susodskeje pomocy Polly & Bob. Štóž žanu tobołu njenamaka, dóstanje kupon, kotryž za přichodnu bursu tajkeho razu płaći. Kotra žona smě při swojoraznej akciji w jednej piwowej zahrodźe w Friedrichshainje jako prěnja tobołku wuzwolić, to chcedźa wulosować.
Prototyp prěnjeho domjaceho nastroja swěta k zwěsćenju samodruhosće chcedźa w New Yorku přesadźować. Ameriska grafikowa designerka Margaret Crane bě test kónc 60tych lět minjeneho lětstotka wunamakała, informuje awkciski dom Bonhams. Bě to jedne z najrewolucionarnišich wunamakanjow, kotrež je žiwjenje tójšto ludźi a wosebje žonow zasadnje změniło, kaž w zdźělence domu rěka. Bonhams nadźija so 8 300 eurow.
Łužica (28.05.15)
Rozmach hospodarstwa
Zły Komorow (dpa/SN/ch). Hospodarstwo w Braniborskej so derje wuwiwa. Tole wuchadźa z konjunkturneho naprašowanja třoch Industrijnych a wikowanskich komorow (IHK) k zažnemu nalěću. Na wuchodźe kraja bě połoženje tak dobre kaž hižo minjene 25 lět nic, rěka w zdźělence IHK wuchodneje Braniborskeje w Frankfurće nad Wódru. Nimale połojca předewzaćow zhladuje na dobre wobchodniske połoženje, 45 procentow je z nim spokojom, sydom procentow nic. Tež w južnej Braniborskej dožiwjeja firmy hospodarski rozmach a wozjewjeja najlěpši staw po třoch lětach. 20 procentow pak wočakuje špatniše wobchodnistwo. Pesimistiski wuhlad do přichoda je jedyn z wuskutkow debaty wo přichodźe brunicoweje industrije, praji hłowny jednaćel IHK Wolfgang Krüger.
Třikrajowy festiwal
Financnicy G 7 wuradźuja
Sakski ministerski prezident Stanisław Tilich wobdźělnikow powita
Drježdźany (dpa/SN/K). Nawodne zapadne industrijne staty (G 7) wotmysla zesylnić bój přećiwo financowanju terorizma. Tež za tónle zaměr zetkaja so financni ministrojo a šefojo notowych bankow přisłušnych krajow hač do pjatka w sakskej stolicy Drježdźanach, zo bychu wo lěpšim zhromadnym dźěle wuradźowali. Zazběh je dźensa wječor w cyrkwi Našeje knjenje, hdźež ministerski prezident Stanisław Tilich (CDU) wobdźělnikow powita.
Na temach zamołwitym ludźom z USA, Japanskeje, Němskeje, Wulkeje Britaniskeje, Francoskeje, Italskeje a Kanady njebudźe pobrachować. Wšako dźe wo swětowe hospodarstwo, triksowanje při dawkach, regulowanje bankow, wo Ukrainu, Grjeksku a dalše naležnosće. Rozjimować mjez druhim budu, kak hodźało so při zamróženju zamóženjow teroristow přichodnje spěšnišo reagować, ćahajo za jedyn postronk. Předewšěm Francoska na to pokazuje, zo teroristiske organizacije kaž Islamski stat nowe puće při financowanju swojich akcijow nakročeja.
Za referendum
Stuttgart (dpa/SN). Po ludowym wothłosowanju w Irskej k jenakosplažnemu mandźelstwu žada sej předsyda badensko-württembergskeje SPD Nils Schmid tajki referendum tež w Němskej.
„Lud měł tež w Němskej wo tym rozsudźić, kak maja so mandźelstwa rjadować. Tele za towaršnosć wažne prašenje rozsudźić hodźi so wurjadnje za ludowe wothłosowanje“, rjekny Nils Schmid wčera w Stuttgarće. Wón wupraji so za jenake prawa homoseksualnych a potwjerdźi swoje politiske stejišćo takle: „Njeje lubosće prěnjeje a druheje rjadownje. Štož sej ja a moja mandźelska dźělimoj, nochcu tež druhim zapowědźić.“
Generalny sekretar CDU Peter Tauber prócuje so, žadanje z rjadow swojeje strony za runostajenjom homoseksualnych porow we wšitkich žiwjenskich wobłukach złahodnić. Wón pak přiznawa, zo CDU rozsud w Irskej skedźbnje sćěhuje a w diskusiji rozjimuje.
Schaar je alarmowany
Rozšěrja pomoc
Prěni wuspěch
Jednaja zaso
Dale wulke ćahańcy w AfD
Funkcionarow FIFA zajeli
Zürich (dpa/SN). Bjezposrědnje do wólbneho kongresa swětoweho koparskeho zwjazka je šwicarska policija dźensa rano w Zürichu sydom funkcionarow FIFA zajała. Tole zdźěli justicne ministerstwo kraja. Po informacijach medijow wumjetuja potrjechenym wosobam wobšudnistwo, wudrěwanje a płokanje pjenjez. Mjez zajatymi je tež wiceprezident FIFA Jeffrey Webb, kaž medije rozprawjeja. Akciju w Zürichskim luksusowym hotelu Bar au Lac přewjedźechu na próstwu justicneho ministerstwa USA. Zajatym wosobam hrozy přepodaće instancam USA. Tam přihotuja pječa sudnisku skóržbu přećiwo dźesać funkcionaram.
Runočasnje je šwicarske statne rěčnistwo přepytowanja přećiwo FIFA korupcije dla zahajiło. Při tym dźe wo swětowe koparske mišterstwa w Ruskej 2018 a Kataru 2022. Pječa su wjacorych funkcionarow ze stami milionami dolarow wobtykali, zo bychu so při wothłosowanju wotpowědnje zadźerželi. Při přepytowanju hłowneho sydła FIFA sćazachu wjacore dokumenty a kompjutery.
