„Swětowa rěč wědomostneho pčołarstwa“
Budyšin (SN/bn). We wobłuku Budyskich mjedowych tydźenjow je pčołar Günter Sodan z přednoškom „Hadam Bohuchwał Šěrach – přez jeho wědu sta so pčołka z domjacym zwěrjećom“ wčera něhdźe 20 zajimcam na žurli Budyskeho Serbskeho domu aktualny staw swojeho slědźenja wo załožerju moderneho pčołarstwa rozłožił. Hosćićel referata bě župa „Jan Arnošt Smoler“.
Porjedźenka
W přinošku „Hotuja so na jubilejny koncert“, wudaće SN z 6. ferbruara, wo chórowym lěhwje 1. Serbskeje kulturneje brigady: Brigada njebě lětsa kaž zwučene w čěskich Hejnicach/Haindorf w Jězerskich horinach, ale w Hainewaldźe blisko Wulkeho Šunowa, 10 kilometrow wot Žitawy zdalene. Zamołwjamy so za wopačnu informaciju městnosće.
Redakcija SN
„Rubježnik Rumbo – za kulisami dźěćacych stawiznow“ rěka ...
Arnošt Bohuwěr Jakub
Wo knihach a kniharni (09.02.24)
Loni krótko do hód je w Ludowym nakładnistwje Domowina wušoł dalši zwjazk w rjedźe „Die sorbische Bibliothek“. W tymle rjedźe wudawa serbske nakładnistwo hižo wot lěta 2000 wobstajnje twórby serbskeho literarneho herbstwa a serbskeje načasneje literatury w němskej rěči. Ze zwjazkom z titlom „Wie ein Mittelpunkt entsteht“ je rozrostł na 12 wudaćow.
Nowy zwjazk je nowum w rjedźe, přetož jedna so prěni raz wo antologiju: wo zběrku prozy z pjera wšelakich awtorow. Do toho su so w zwjazkach stajnje twórby abo přełožki twórbow jeničkeje awtorki abo jeničkeho awtora wozjewjeli, na př. basnje Miny Witkojc abo Jakuba BartaĆišinskeho, fabule Handrija Zejlerja, powědki Jurja Kocha abo romany Marje Młynkoweje, Jurja Brězana a Křesćana Krawca.
Kónc „najwjetšeho festiwala dźeń a prawdźepodobniši“
Drježdźany (SN/bn). Po wobzamknjenju Drježdźanskeje měšćanskeje rady ma so wot lěta 2026 wuhotowanje festiwala „Filmowe nocy při połobskim brjoze“ po cyłej Europje zjawnje wupisać. W tym zwisku njebu najenske zrěčenje z dotalnym organizatorom, towaršnosću z wobmjezowanym rukowanjom PAN Veranstaltungslogistik und Kulturgastronomie, podlěšene. Z předwčerawšim wozjewjenym zjawnym listom a zahajenjom kampanje „Filmowe nocy dyrbja być!“ namołwjeja zarjadowarjo „najwjetšeho europskeho filmoweho a koncertoweho festiwala pod hołym njebjom“ měšćanskich radźićelow, tónle rozsud cofnyć. Frakcija CDU namjet podpěruje.
Jan Pječka
Na prěni Łužiski powěsćowy sympozij
Stróža (SN/MiR). Towaršnosć Carl-Gustav-Jung Sakska z.t. přihotuje z podpěru Budyskeje župy „Jan Arnošt Smoler“ prěni Łužiski powěsćowy sympozij. Tón wotměje so wot 21. do 23. junija 2024 w kubłanskim centrumje biosferoweho rezerwata „Hornjołužiska hola a haty“, w Domje tysac hatow w Stróži. W prěnim rjedźe dźe wo to, z wutrobu a rozumom powěsćam připosłuchać.
Zarjadowanje steji pod hesłom „KRABAT – Zaplećenje a wuwiće“. Ćežišćo zaběry je serbski kuzłar a přibliženje k psychologiskemu jadru powěsće. „W rjekowskich skutkach Krabata namakamy – ručež wutrobu a rozum wotewrějemy – poselstwa za dźensniši čas. W bajach a figurach kaž tež w jich dožiwjenjach namakamy wuraz a formu „energije“, něhdy ‚swětło přirody‘ mjenowanu“, rozjasnja předsyda towaršnosće dr. Christian Kessner, „kóžda generacija ma nadawk tele swětło widźeć a jeje poselstwo spóznać.“ Fachowe přednoški a zhromadna wuměna maja so temje bližić a dotalne dopóznaća wobdźělnikow pohłubšić a rozšěrić.
