Berlin (dpa/SN). Němski pósłanc w Běłoruskej Manfred Huterer je kraj nachwilnje wopušćił. Předwčerawšim poda so wón na rozmołwy do Berlina, zdźěli wonkowne ministerstwo na naprašowanje powěsćernje dpa. Na te wašnje chce so zwjazkowe knježerstwo z Pólskej a Litawskej solidarizować, kotrejž stej hižo do toho swojich pósłancow z běłoruskeje stolicy Minsk wotwołali.

Knježerstwo w Minsku bě sej žadało, zo matej krajej swój diplomatiski personal redukować. „Naš zaměr pak je diplomatiski zwisk maksimalnje wudźeržować“, měni litawski wonkowny minister Linas Linkevičius. To je tež Běłoruskej tak sposrědkował. Mjeztym wšak stej so krajej na to dojednałoj, zo móhło hižo nachwilne wopušćenje pósłanca pomhać, napjatosće pomjeńšić.

W Běłoruskej ludźo mjeztym prawi­dłownje přećiwo prezidentej Aleksanderej Lukašenkej protestuja, wumjetujo jemu manipulaciju wólbow a awgusće. Opozicija pak ma Swjetlanu Tichanowskaju za dobyćerku, kotraž tuchwilu w Litawskej přebywa. Tež Němska wólby Lukašenka njepřipóznawa.

Połnje wobsadźeny šulski bus dyrbješe połdra hodźiny čakać, doniž njeje parkowace awto skónčnje wotjěło. Stało je so to minjeny pjatk w Neustadće pola Coburga. Tam je so 63lětny muž njesměrnje rozhněwał, dokelž so w zajězdźe na ležownosć zas a zaso jězdźidła zawróćeja. Tež bus tam zaparkowa. Hakle policija a busowy přede­wzaćel zamóštaj 63lětneho změrować. Poměry wobsydstwa zajězda chcedźa nětko přepytować a znowa posudźować. Muž pak ma z chłostanjom ličić, dokelž je z gwałtom bus zadźeržał. Dźěći dyrbjachu z dalšim busom do šule dowjezć.

W Berlinskim kabineće Madame Tussauds su prezidenta USA Donalda Trumpa nětko pod karantenu stajili. Tak su wokoło wustajeneje figury banćik připrawili. Tež škitny nahubnik Trump ma.

Wo aspektach z wida SSW, na wólbach zwjazkoweho sejma so wobdźělić

Zjězd Južnoschleswigskeho wolerskeho zwjazka (SSW) njeje ani měsac nimo. Jeho wobzamknjenje, so jako strona Danow a Frizow klětu na wólbach Němskeho zwjazkoweho sejma wobdźělić, je na stronskej bazy hnydomne reakcije zbudźiło. Hač do kónca septembra su hižo tři wosoby swoju kandidaturu přizjewili. Wokrjesne předsydstwo SSW Sewjerna Friziska je Sybillu Nitsch, na zjězdźe w Flensburgu hakle za městopředsydku strony wuzwolenu, za kandidatku we wólbnym wokrjesu Sewjerna Friziska/Dithmarschenska-sewjer kaž tež za načolnu kandidatku SSW namjetowało. Městny zwjazk SSW Kiel/Pries/Klausdorf je swojemu předsydźe Marcelej Schmidtej při jeho kandidaturje we wólbnym wokrjesu Kiel wšu podpěru zawěsćił.

Kubłanske prašenja postajowachu dnjowy porjad wčerawšeho posedźenja Rady za naležnosće Serbow Braniborskeje w Podstupimje. W srjedźišću stejachu stipendije za přichodnych wučerjow we wjesnych kónčinach.

Podstupim (SN/at). Tež w Braniborskej ćerpja pod tym, zo njeje młodym wu­čerjam atraktiwne dosć we wjesnej šuli wuwučować. Tohodla je krajne knježerstwo „Stipendijowy program za wučerki a wučerjow na wsy“ přihotowało.

Wučerski dorost je za přichod del­njoserbšćiny bytostny. Tohodla so přitomni wčera prašachu, čehodla njebě ministerstwo za kubłanje, młodźinu a sport při rozjimanju tematiki fachowje zastupjene. Kerstin Kosakowa, serbska społnomócnjena wokrjesa Sprjewja-Nysa, žada­še sej wjace wabjenja za wučerske powołanje na wsy a za te serbskich pe­dagogow. „Status wučerjow a wosebje serbskich wučerjow ma so w Braniborskej polěpšić.“ Radźićel Wylem Janhoefer rěčeše pobrachowacych serbskich wučerjow w Delnjej Łužicy dla wo „bórzomnym wohrožacym połoženju“.