Münster/Rom (dpa/SN). Po wjerškowym zetkanju we Vatikanje nastupajo skan­dale znjewužiwanja w katolskej cyrkwi žada sej Trierski biskop Stephan Ackermann wot bamža Franciskusa konkretne a zawjazowace wukazy. „Trěbna je wobstajna kontrola po wšěm swěće“, rjekny społnomócnjeny Němskeje biskopskeje konferency k prašenju splažneho znjewužiwanja wčera wječor powěsćerni dpa. Swjaty wótc bě k zakónčenju konferency we Vatikanje kónc zatajenja připowědźił, bjeztoho zo by konkretne kročele mjenował, kak chcył to přichodnje docpěć. Zwjazki woporow běchu tohodla najebać jasne słowa bamža přesłapjene reagowali.

Předsyda Němskeje biskopskeje konferency, kardinal Reinhard Marx, so kritice spjećuje. „Sym woprawdźe zaćišć měł, zo je so tu jasnje rěčało a zo knježa jasne směrnicy. To přesadźić njemóža z Roma. To je nadawk wšelakich biskopskich konferencow“, rjekny Marx w telewiziji ZDF.

Dom mjeńšin po wšěm zdaću hišće cyle z blida njeje

Flensburg (SN). Jako wusahowacy němsko-danski pomjezny projekt mysleny Dom mjeńšin je cofnjeny. Přičina toho su po wšěm zdaću interne rozkory danskeje mjeńšiny, kotraž přezjednje za projektom njesteji, kaž wottam rěka. Danska nochce za projekt tež žane pjenjezy přewo­stajić. Dom mjeńšin zwoprawdźić chcychu poprawom Zwjazk němskich Se­wje­­roschleswigčanow (BDN), towarstwo Sydslesvigsk Forening (SSF) a Federali­stiska unija europskich narodnych mjeńšin FUEN. SSF je hižo 2016 hodźace so twarjenje prezentowało. Na němskej stronje běchu wulce zahorjeni. Tež pjenjezy za dom su hižo zaplanowali. Zhromadna ideja pak je wot lětušeho januara wusonjena. Informaciski a dokumentaciski centrum na temu mjeńšiny njebudźe.

Za hłowneho předsydu BDN Hinricha Jürgensena ideja hišće cyle z blida njeje. „Dyrbimy wo njej hišće raz znowa rozmyslować. Wosobinsce mi wažne njeje, zo mamy dom z kamjenjow jako symbol“, Jürgensen rozłožuje. Tuž měli wšitko hišće raz na nulu wróćo wjerćeć.

Nowa „Miss Germany“ je policajska zastojnica Nadine Berneis ze Stuttgarta. 28lětna móžeše so při wólbach w nocy na njedźelu w Europskim parku Rust pola­ Freiburga přećiwo 15 dalšim wob­dźělnicam přesadźić a je sej tak sama són spjelniła, kaž wona rjekny. Berneis bě najstarša wobdźělnica, najmłódša bě 19 lět. Třeće městno wobsadźi 22lětna studentka Anastasia Aksak z Lipska.

Wopita šoferka je ze swojim awtom w sewjerorynsko-westfalskim Sundernje do wabjenskeje tafle za jězdźenje bjez alko­hola zrazyła. Awto wosta mjez murju a taflu tčacy, tak zo dyrbješe žona do­moj nóžkować. Tam wona policistam wobkrući, zo bě njezbožo zawinowała. Na plakaće wabjenskeje kampanje wob­chadneje straže wabještej bleša wody a klučik awta z hesłom „Přećeljo za žiwjenje“ za strózbe jězdźenje. Policija wuka­za pře­pytowanje kreje 21lětneje a sćaza jeje jězbnu dowolnosć.