Sakska spěchuje serbsku rěč
Swobodny stat Sakska přewostaja lětsa prěni raz 300 000 eurow za serbski komunalny program, to je za kóždu z 42 gmejnow w serbskim sydlenskim rumje 5 000 eurow. Na informaciskim zarjadowanju Rady za serbske naležnosće móžachu so komunalni zastupjerjo wčera hłubšo do maćizny zanurić.
Žane ličby ciwilnych woporow
Washington (dpa/SN). Knježerstwo USA nochce přichodnje ličbu ciwilnych smjertnych woporow při nalětach na teroristow z njewobsadźenymi lětadłami mjenować. Prezident Donald Trump je wčera wotpowědny wukaz swojeho demokratiskeho předchadnika Baracka Obamy zběhnył. Po nim dyrbješe knježerstwo hač do 1. meje ličby předpołožić. Hižo loni bě to knježerstwo Trumpa ignorowało. Fachowcy z toho wuchadźeja, zo kóžde lěto hač do 3 000 ciwilistow w Syriskej, Afghanistanje, Jemenje a Pakistanje nalětow dla žiwjenje přisadźi.
Merz chcył zastojnstwo w CDU
Berlin (dpa/SN). W boju wo předsydstwo CDU podležany Friedrich Merz ma so z městopředsydu jeje hospodarskeje rady stać. To je přichodna předsydka gremija Astrid Hamker zdźěliła. Merz je po jeje słowach swoju zwólniwosć signalizował, za zastojnstwo kandidować. W tej funkciji ma wón tež na wólbnobojowych zarjadowanjach w Sakskej, Durinskej a Braniborskej wustupować. Hamker na to pokaza, zo ma Merz w CDU wjele přiwisnikow.
Wuradźuja wo azylu w EU
Söder namołwja čłonow AfD
Passau (dpa/SN). Předsyda CSU Markus Söder je liberalnych čłonow AfD namołwjał ze strony wustupić. „Nawróćće so a wostajće nacijow samych w AfD. Je načasu směr změnić“, rjekny bayerski ministerski prezident na wčerawšej politiskej popjelnej srjedźe w Passauwje. AfD njeje strona wosamoćenych konserwatiwnych, wosebje křidło wokoło durinskeho prawicarja Björna Höckeho je cyle jasnje po puću do prawicarskeho ekstremizma. „Štóž nochcył tomu dlěje sćěhować, dyrbjał stronu wopušćić.“
Dyrbjała-li Němska, tak kaž sej to AfD w europskim wólbnym boju žada, Europsku uniju wopušćić, by to kónc derjeměća a „kónc europskeje ideje było, kaž ju znajemy“, Markus Söder praji.
Předsydka CDU so wobara
Pokiwy na złóstnistwa ignorowali
Berlin (dpa/SN). W zwisku z masowym zapućowanjom ćěkancow do Němskeje běchu zamołwići tysacy pokiwow na móžnych wójnskich złóstnikow mjez požadarjemi azyla ignorowali. To wuchadźa po informacijach nowiny Bild z wotmołwy zwjazkoweho nutřkowneho ministerstwa na naprašowanje frakcije FDP w zwjazkowym sejmje.
Po tym je zwjazkowy zarjad za migraciju a ćěkancow wot lěta 2014 hač do spočatka 2019 něhdźe 5 000 pokiwow na „złóstnistwa po ludoprawje“ zwjazkowemu kriminalnemu zarjadej a generalnemu statnemu rěčnistwu podał. Z druhich stron přińdźe 2 000 pokiwow. Jenož w 129 padach pak su přepytować započeli. W lěće 2015/2016, potajkim na wjeršku přichada migrantow, mějachu po rozprawje 3 800 tajkich pokiwow. Wobdźěłali pak su jenož 28 padow. „Wulka ličba pokiwow njeje zmóžniła, wšitke pady z policajskimi srědkami přepytować“, zdźěli rěčnik zwjazkoweho nutřkowneho ministerstwa. FDP knježerstwu wumjetuje, zo njeje so chutnje dosć wo problem starało.
Lěpje je so prašeć
Inwestuja zaso wjace w Ruskej
Moskwa (dpa/SN). Najebać zapadne sankcije a wosłabjace hospodarstwo su němske firmy loni zaso wjace w Ruskej inwestowali, kaž Němsko-ruska wonkowikowanska komora (AHK) wčera w Moskwje zdźěli. Po ličbach Zwjazkoweje banki su direktne inwesticije lěta 2018 na dwě miliardźe eurow rozrostli. „To je sobu najwjetša ličba po rozpadźe Sowjetskeho zwjazka“, rjekny nawoda AHK Matthias Schepp. Hišće wjetšu ličbu běchu naposledk 2008 docpěli.
Lěta 2014 běchu EU, USA a dalše kraje w zwisku z krizu na Ukrainje sankcije přećiwo Ruskej wukazali. Nimo tajkich chłostanskich naprawow haća po měnjenju předewzaćow tež pobrachowace reformy a wulka wotwisnosć wot energijowych eksportow ruske hospodarstwo. To so negatiwnje na kurs rubla wuskutkuje. Nimo za wukrajnych inwestorow přijomneho kursa rubla je w Ruskej po słowach Scheppa tójšto na zapadźe wukubłanych fachowcow, štož je za němske firmy, kotrež w Ruskej skutkuja, jara atraktiwne. W někotrych wobłukach je so Ruskej poradźiło, klimu za wukrajne inwesticije widźomnje polěpšić.
Minister z demonstrantami rěčał
To a tamne (07.03.19)
Ćeknjena kruwa je železniski wobchad na čarje spěšnika ICE mjez Kasselom a Würzburgom zlemiła. Dokelž bě sej tež hišće do tunla spěšnikoweje čary ćeknyła, dyrbjachu wobchad něhdźe połdra hodźiny přetorhnyć. Kruwa bě z transportera howjadow twochnyła. Wohnjowi wobornicy ju skónčnje popadnychu. Jědnaće ćahow měješe jeje dla dohromady 242 mjeńšin zapozdźenja.
Wohnjowej katastrofje zadźěwał je šofer wosoboweho awta w Hamburgu, jako přez wulku łužu bencina jědźeše. Dokelž bě bencin z dróhi na motor pryskał, so jězdźidło zapali. Šofer wobchowa čuwy a jědźeše dale, na čož so płomjenja zaso hasnychu. By-li wón stejo wostał, by drje ke katastrofje dóšło, policija měni. Bencin bě na jězdnju wuběžał, po tym zo bě tankowy Lkw z ćěriwom do parkowaceho nakładneho awta zrazył.
Rjemjeslniske firmy wopytali
Budyšin (SN). Tradicionelnje podawa so serbski zapósłanc Sakskeho krajneho sejma Marko Šiman (CDU) do zarjadowanja k politiskej popjelnej srjedźe z frakciskimi kolegami do srjedźnostawskich předewzaćow sprjewineho města Budyšina abo jednotliwych druhich komunow swojeho wólbneho wokrjesa.
Dźensnišu turu přewjedźe Šiman hromadźe z krajnymaj zapósłancomaj Alojsom Mikławškom z Worklec a Frankom Hirchu z Wojerec kaž tež z tudyšim měšćanskim radźićelom Heinrichom Schleppersom do Kubšiskeje gmejny. Rozmołwjeli kaž tež wo połoženju zawoda a móžnych starosćach firmownikow wobhonili su so w Richterec pjekarni runje tak kaž w Zimmermannec předewzaću Karoserija a lak we wjesnym dźělu Šekecach (Scheckwitz). Třeća stacija bě Freundec metalotwar w Sowrjecach (Soritz).
Na zhromadny wopyt firmow bě Marko Šiman znowa swojich hornjołužiskich kolegow-zapósłancow CDU přeprosył. Prěnje z dotal 26 lět bě jeho frakcija w krajnym sejmje politisku popjelnu srjedu w Budyšinje hišće podpěrała. Mjeztym je to iniciatiwa Šimana.
