Berlin (dpa/SN). Wosrjedź koronapandemije je zwjazkowy sejm dźensa swoje zakónčace wuradźowanja wo etaće za lěto 2021 zahajił. Spočatnje rozłoži financny minister Olaf Scholz (SPD) plany, prjedy hač su wo etatach kóždeho jednotliweho ressorta rěčeli. Hospodarski plan chcedźa pjatk doskónčnje schwalić. Jutře steja wuradźowanja wo etaće kanclerskeho zarjada na dnjowym porjedźe. Opozicija tak mjenowanu generalnu debatu tradicionalnje wužiwa, zo by z politiku knježerstwa wotličiła.

Koronakriza je etat 2021 porno tamnym lětam dospołnje změniła. K zmištrowanju krizy chce knježerstwo 180 miliardow eurow nowych kreditow brać, mjeztym zo běchu minjene lěta bjez noweho dołha wušli. Za to běchu we wu­stawje zakótwjeny zakaz zadołženja zběhnyli. Olaf Scholz wšak na to skedźbni, zo zaruča dołh statej dźěłakmanosć. Opozicija jón porno tomu kritizuje. FDP widźi strach, zo so hoberski dołh hišće dale powjetši. Zeleni boja so lutowanskich naprawow po krizy.

Najebać wulki wothłós na swój dóńt a najebać wulkomyslne pomocne poskitki wobkradnjeny 89lětny muž w sewjerorynsko-westfalskim Wittenje pjenježne dary wotpokazuje. Policija bě paducha, kiž bě seniorej tysac eurow ze zaka wućahnył, w zjawnym lisće naswarjeła („hańbuj so, mały njekničomny paducho“). Na to přizjewichu so pola policije sta ludźi, kotrychž je dóńt muža hnuł. Rentnar pak wo pjenjezy njerodźi.

W škitnym wobleku kwas swjećił je młody porik w Indiskej. Po puću na wěrowanje njewjesta zhoni, zo bě so z koronawirusom natyknyła. Dokelž so kwasna hosćina spjećowaše kwas wotprajić, nastaji strowotniski zarjad mały baldachin, pod kotrymž móžeštaj nawoženja a njewjesta tradicionalnu ceremoniju zmandźelenja přewjesć. Hnydom po tym pak dyrbješe njewjesta do koronacentruma.

Drježdźany (B/SN). Krajny biskop Tobias Bilz pokaza so w přinošku za pokutny dźeń dźakowny za to, zo je tón w Sakskej přikazany swjaty dźeń. „To je wulki dar. Móžemy přidatny dźeń wužiwać, zo bychmy sej swój žiwjenski puć wuwědomili, a móžemy z Bohom wo tym rěčeć.“ Čas tuchwilneho nowemberskeho lock­downa ma biskop Bilz za wužadanje a za to, zo „wobmjezowanja ćešo znjesemy hač w nalěću. Mnozy storča na hranicy swojich mocow“. Bilz wabješe za sylnišu dowěru do Jězusa, kiž je wšitkich bědnych a trapjacych k sebi wołał. Nimo toho­ napomina wěriwych za kedźbliwiši mjezsobny wobchad.

Koronatelefon wotšaltowany

Zhorjelc (AK/SN). Planowane znowa­wotewrjenje Zhorjelskeje synagogi je na spočatk lěta 2021 přestorčene. Přičina je aktualne napjate połoženje koronawi­rusa dla we wokrjesu Zhorjelc. To zdźěli předsyda spěchowanskeho kruha Zhorjelskeje synagogi dr. Markus Bauer.

„Nowy termin hišće nimamy, zawěsće pak budźe tón bórze w nowym lěće. Sy­na­gogu wotewrějemy potom jako kul­turny forum w režiji města Zhorjelca. Kuplo­wa žurla budźe za koncerty, přednoški a konferency k dispoziciji. Mjeńše zarjadowanja móžemy na žonjacej emporje wotměć, dźěłarnički w bywšej stwě rabinera“, podšmórny předsyda spěchowanskeho kruha. W modlerni bywšeje wšědneje synagogi budu židźa přichodnje swoje nutrnosće swjećić móc. Spěchowanski kruh so wjeseli, zo je zaměr, synagogu znowa wotewrěć, bórze docpěty. 82 lět po pogromowej nocy maja židźa w Zhorjelcu skónčnje zaso swójsku rumnosć, hdźež móža so modlić.