Podpěruje MSPI
Kiel (SN/JaW). Ministerski prezident Schleswigsko-Holsteinskeje Daniel Günther (CDU) zasadźa so za zwoprawdźenje europskeje wobydlerskeje iniciatiwy k skrućenju prawow narodnych mjeńšin Minority SafePack (MSPI). Kaž w nowinskej zdźělence Federalistiskeje unije europskich narodnych mjeńšin (FUEN) rěka, je so Günther z listom na prezidentku Europskeje komisije Ursulu von der Leyen wobroćił.
Liča z protestami
Washington (dpa/SN). Kongres w USA ma dźensa wuslědki prezidentskich wólbow wobkrućić. Poprawom je to jenož formalita, přiwšěm liča z debatu. Dotalny prezident Donald Trump ma wólby dale za wobšudnistwo. Wjacori republikanojo z Domu reprezentantow a senatorojo připowědźichu, zo wólbny wuslědk njewobkruća, po kotrymž bě demokrat Joe Biden wjetšinu hłosow dóstał. W USA tuž dźensa z protestami liča.
Maas w Jordaniskej
Berlin/Amman (dpa/SN). Po wjace hač štyrjoch měsacach je so zwjazkowy wonkowny minister Heiko Maas (SPD) dźensa na prěnju jězbu zwonka Europy podał. W jordaniskej stolicy Ammanje wobdźěli so wón na konferency tak mjenowaneje Stockholmskeje iniciatiwy, w kotrejež wobłuku so 16 krajow za atomarne wotbrónjenje zasadźa. Tema je aktualna, wšako skónči so 28. februara zrěčenje mjez USA a Ruskej wo redukowanju strategiskich nuklearnych brónjow.
W Japanskej infekcije přiběraja
Wšudźe hišće njepřiměrjeny
Neckarsulm (dpa/SN). Wjele wikowarjow zežiwidłow wyši nadhódnotowy dawk swojim kupcam hišće dale njedawa. Kaž discounter Lidl wčera zdźěli, wostanu płaćizny w něhdźe 3 200 filialach nadal na samsnym niwowje a tak tři procenty tuńše. Poprawom płaći wot noweho lěta zaso regularny nadhódnotowy dawk 19 respektiwnje sydom procentow. Tež Edeka-skupinje přisłušacy discounter Netto wabi ze sloganom „Zwyšenje nadhódnotoweho dawka? Nic pola Netto“. Wikowar Rewe bě hižo kónc lěta 2020 připowědźił, zo płaćizny krok po kroku přiměri, štož je z wjele dźěłom zwjazane.
Přiwšěm fachowcy na to tukaja, zo budu sej wikowarjo prjedy abo pozdźišo wšudźe zaso normalny nadhódnotowy dawk žadać. Loni w lěću bě zwjazkowe knježerstwo rozsudźiło, jón přechodnje hač do kónca lěta 2020 znižić, štož měješe konjunkturu přisporjeć.
Zwjazk žadasej wotewrjenje
Němska steji před nowej dobu
Stuttgart (dpa/SN). Kóždolětne zetkanje FDP na dnju Třoch kralow je lětsa dospołnje hinaše. Tak steji šef strony Christian Lindner w prózdnym Stuttgartskim operowym domje, přiwisnicy jeho digitalnje sćěhuja. Hladajo na wólby zwjazkoweho sejma lětsa nazymu chcedźa so liberalni na temy dojednać. Kaž Christian Lindner wuzběhny, je wobnowjenje w Němskej nuznje trěbne. „Tak dźe wo to, zakłady našeho kraja znowa wobjednawać. Wjele zakładnych prašenjow měli sej stajić. Stejimy před znowazałoženjom našeho kraja.“ Žórła němskeho derjeměća maja so wobnowić. Zestarjaca towaršnosć trjeba reformowane socialne systemy.
Nimale dźewjeć měsacow do wólbow chce FDP swoje politiske stejišćo postajić. Nimo wólbow zwjazkoweho sejma su lětsa tež w šěsć zwjazkowych krajach wólby sejma. Nětčiša zwjazkowa kanclerka Angela Merkel (CDU) njebudźe hižo znowa kandidować. „Potom zahaji so nowa doba, stejimy před rozsudnej cezuru“, je Lindner přeswědčeny. „Wólby zwjazkoweho sejma njepostaja wosud strony FDP, ale cyłeje Němskeje.“
To a tamne (06.01.21)
Při zražce ze sněhowym mužom bu ćah w Köthenje wobškodźeny. Intercity Němskeje železnicy bě njedźelu do figury zajěł, kotraž při kolijach steješe. A lokomotiwa so wobškodźi. Policija pyta nětko za swědkami a skedźbnja na to, zo přebytk we wobłuku kolijow žiwjenje wohroža. To wšak dyrbješe bohužel tež sněhowy muž nazhonić.
Dokelž njeje žona na wučinjene zetkanje přišła, so 59lětny w Münsteru chětro rozhněwa. Najprjedy da so do sobudźěłaćerja spěšnohosćenca a je na to samo přiwołaneju zastojnikow nadběhował. Skónčnje so jimaj poradźi roznjemdrjeneho muža přemóc. Přiwšěm staj so lochko zraniłoj. Skućićel ma nětko z chłostanskim jednanjom ličić.
Bydlenje w Berlinje přepytali
Drježdźany (dpa/SN). W padźe zhubjenych drohoćinkow Drježdźanskeho Zeleneho wjelba je policija dźensa rano w jednym Berlinskim bydlenju za slědami pytała. Zawěsćene dokumenty maja nětko wuhódnoćić, zdźěli Drježdźanske statne rěčnistwo. Pytaneho pjateho podhladneho njejsu hišće namakali. Tamni štyrjo su w přepytowanskej jatbje.
Lockdown hišće wótriši
London (dpa/SN). Razantnje stupacych ličbow koronainfekcije we Wulkej Britaniskej dla je tamniše knježerstwo naprawy zaso raznje přiwótřiło. „Dyrbimy znowa do lockdowna“, zdźěli wčera wječor premierminister kraja Boris Johnson. Ludźo smědźa swoje bydlenja jenož hišće w najnuznišich padach wopušćić, šule wostanu zawrjene. Naprawy płaća hač dosrjedź februara, dokelž bě Wulka Britaniska minjene dny dale a wjace nowonatyknjenjow zwěsćiła. Wčera bě to 59 000 nowych padow. Wina na tym je mutacija wirusa.
Rozsud tola hakle jutře
Najebać namołwy, so toho wzdać, dale wjele dnjowych turistow do ...
Wokrjes Budyšin ma dale a staršich wobydlerjow
Budyšin (SN). Mamy dale a wjac wuměnkarjow, ale je tež dosć bydlenskich móžnosćow za nich? W Budyskim wokrjesu móhła ličba ludźi, kotřiž su starši hač 65 lět, hač do lěta 2035 na 91 300 rozrosć. Jich podźěl na wobydlerstwje wučinja potom 38 procentow, štož je porno lětu 2017 ze 27 procentami jasne stopnjowanje. Na tónle fakt skedźbnja industrijne dźěłarnistwo twarstwo-agrar-wobswět (IG Bau), powołace so na demografisku prognozu instituta za regionalne hospodarstwo CIMA. Dźěłarnistwo starosći so přemało bydlenjow dla, kotrež su wuměnkarjam wotpowědnje wuhotowane. „Lift město schodu, šěrše durje za jězdne stoły a rolatory kaž tež bjezbarjernu dušu ma jenož mało bydlenjow we wokrjesu. Za razantnje přiběracu staršu generaciju njeje to optimalne, štož ma so změnić“, rozłožuje předsyda IG Bau wuchodneje Sakskeje Peter Schubert, kiž ma to za demografisku nuznosć. Tak měli přidatne bydlenja z wotpowědnymi wuměnjenjemi twarić a hižo wobstejace přetwarić. „Jeli staršu ludnosć bóle njewobkedźbujemy, hrozy nam za něšto lět bydlenska nuza.
Hotelowa branša před wulkej změnu
Frankfurt n. M. (dpa/SN). Mnohe zarjadowanja a wiki su wotprajene a tójšto akcijow nětko online přewjeduja. W času koronapandemije so wjele měnja. Ludźo wot doma dźěłaja a někotre firmy swojich sobudźěłaćerjow hižo na słužbne jězby njesćelu. To ma sćěhi na hotelowu branšu. Tak njepobrachuja jenož turisća, ale předewšěm tež wobchodnicy. Města kaž Frankfurt nad Mohanom, Lipsk abo Berlin, hdźež kóžde lěto wjacore wiki zarjaduja, su wot krizy wosebje potrjechene. „Hotelowa branša steji před wulkej změnu. Ličimy z tym, zo njebudźe po pandemiji dźěl kongresow, wikow abo zjězdow hižo na jednym městnje, ale online přewjedźeny“, rozłožuje Tobias Warnecke z němskeho zwjazka hotelow IHA. „Tak kaž w lěće 2019 hižo ženje wjac njebudźe.“
Něhdźe 25 procentow němskeho turizma su dotal stajnje słužbne jězby wučinjeli. Někotre hotele su za wobchodniski wobłuk hišće wotewrjene, ale su tuchwilu jenož hač do jědnaće procentow wućežene.
