Zesylnja wěstotu
Kritizuja protest pola Kretschmera
Lipsk (dpa/SN). Politikarjo SPD, Zelenych a Lěwicy su protest před priwatnym domom sakskeho ministerskeho prezidenta Michaela Kretschmera (CDU) kritizowali. Předsyda sakskeje SPD Martin Dulig mjenowaše tajku formu rozestajenja „njeakceptabelnu“. „To je wohroženje, dokelž saha do priwatneje sfery. To je namóc“, rjekny politikar SPD we wusyłanju MDR aktuell. Wón mysli při tym předewšěm na swójbnych. Njedźelu rano bě skupina něhdźe 30 ludźi před priwatnej ležownosću Kretschmera w Großschönauwje přećiwo naprawam koronawirusa dla protestowała. Po tym zo bě so šef knježerstwa přez płót z ludźimi rozmołwjał, so debata po 15 mjeńšinach měrliwje skónči a wobdźělnicy so zaso wotsalichu, kaž policija zdźěli.
Předsydka frakcije Zelenych Franziska Schubert rěči wo nowym wuwiću. „Njeńdźe jenož wo zadobywanje do priwatneho ruma politikarja, ale wo signal. Mnozy drje sej nětko dwójce přemysla, hač politisku zamołwitosć přewozmu.“ Rico Gebhart (Lěwica) so kritice přizamkny.
Zeleni: Předewzaća zamołwite
Nowa debata wo móžnosćach domjaceho dźěła w koronakrizy
Frankfurt n. M. (dpa/SN). Zwjazkowy minister za dźěło Hubertus Heil předewzaća doraznje napomina, přistajenym w tuchwilnej koronakrizy domjace dźěło zmóžnić. „Swojowólnje homeoffice zapowědźić by nětko njezamołwite było“, rjekny politikar SPD sćelakej NDR Info. Zdobom wón připowědźi, zo chce swój apel předewzaćam na dźensnišej konferency ze zastupnikami personalnych wotrjadow wjacorych wulkich firmow potwjerdźić.
Hdźež domjace dźěło móžne njeje, měli předpisy hygieny kruće dodźeržeć, minister dale praji. Hewak njemóhł wón wuzamknyć, zo dyrbja zawody produkciju přetorhnyć. Lockdownej wšeho hospodarstwa pak chcył wón na kóždy pad zadźěwać. Jemu dźe wo to, „zo naše hospodarstwo hdźežkuli móžno dale dźěła“. Hubertus Heil wobžaruje, zo je CDU zakonskemu prawu ludźi na homeoffice zadźěwała. „Hewak bychmy nětko w tym dypku dale byli.“ Po jeho posudku su předewzaća móžnosće domjaceho dźěła loni nalěto intensiwnišo wužiwali hač nětko.
To a tamne (12.01.21)
Elefanty Drježdźanskeho coowa smědźa sej nětko 40 metrow wysoki šmrěk słodźeć dać, kotryž je dotal jako hodowny štom w nutřkownym měsće stał. Do wotpowědnych porcijow rozrězany su jón wčera do wonkowneho areala elefantow dowjezli. Wosebita firma bě hałzy wotrězała a zdónk na kruchi rozdźěłała, zo móhli sej słony z nimi hrajkać. Hałzy šmrěka su jim mnohich eteriskich wolijow dla nimo toho wosebita chłóšćenka.
Fatalne misnjenje je so mužej w Šwabskej stało. Wón je policiji zdźělił, zo běchu njeznaći 500 kilogramow ćežki nastroj za industrijne skowanje z hale pokradnyli. Krótko na to so wón znowa přizjewi a wohańbjeny rjekny, zo je so naležnosć wujasniła: Muž bě nastroj před měsacami znatemu požčił a na to prosće zabył. Při telefonaće jemu znaty praješe, zo mašina hišće pola njeho steji.
Lětsa digitalnje po puću
Berlin (B/SN). Němska kanclerka Angela Merkel a zwjazkowy prezident Frank-Walter Steinmeier chwalitaj sej lětuše widejowe poselstwo hwězdnych spěwarjow a so jim po samsnym puću dźakujetaj. „Činiće něšto cyle drohotneho, zasadźeće so za druhich. Pomhaće ludźom, kotrymž so špatnišo dźe, dźěćom z chudšich krajow, dźěćom, kotrež maja bědne žiwjenje“, praji zwjazkowy prezident. Wokoło Třoch kralow ćahnu hwězdni spěwarjo poprawom dom wot domu a zběraja pjenjezy. Pandemije dla to tónkróć móžno njeje. Wot lěta 1959 je so tale pomocna akcija na najwjetšu swěta wuwiła. Na njej wobdźěla so po cyłej Němskej stajnje něhdźe 300 000 dźěći a młodostnych. Wot spočatka akcije nazběrachu tak 1,19 miliardow eurow za 75 600 projektow.
Póstny čas a prawidła
Wot dźensnišeho płaća nowe wukazy korony dla
Drježdźany/Budyšin (SN/JaW). Tuchwilny lockdown w Sakskej je hač do 7. februara podlěšeny. To je krajne knježerstwo minjeny pjatk wječor rozsudźiło a zdobom nowe škitne postajenje přećiwo koronawirusej wobzamknyło, kotrež wot dźensnišeho płaći. Jako přičinu nowych wukazow a postajenjow kaž tež podlěšenja lockdowna mjenuje kabinet w medijowej zdźělence dale wulku ličbu natyknjenjow z wirusom w swobodnym staće.
Kaž w zdźělence dale rěka, su w nowym postajenju wobzamknjenja „ministerskich prezidentow a ministerskich prezidentkow z kanclerku Angelu Merkel z 5. januara wobkedźbowali. Wukazy maja zaměr, ličbu dalšich infekcijow pomjeńšić a dynamiku koronapandemije zahaćić.“
Žada sej kónc naprawow
Tübingen (dpa/SN). Wyši měšćanosta Tübingena Boris Palmer (Zeleni) žada sej kónc raznych naprawow kowonawirusa dla. „Nětko je dosć“, rjekny wón wčera wječor w telewiziji. Wot spočatka februara měli so naprawy přewidnje zběhnyć. „Škody w hospodarstwje a towaršnosći ekspotencielnje přiběraja. Liču z hoberskej žołmu insolwencow. To dlěje njepřetrajemy.“ Palmer ma zaměr, kwotu nowych natyknjenjow na 100 000 wobydlerjow na pod 50 znižić, za „wopačny puć“.
Chcedźa Trumpa wotsadźić
Washington (dpa/SN). Po nadběhowanju Kapitola přez přiwisnikow wotwoleneho prezidenta Donalda Trumpa planuja demokraća w kongresu USA konkretne naprawy, Trumpa wotsadźić. Předsydka Domu reprezentantow Nancy Pelosi chcyše hišće dźensa rezoluciju předpołožić, z kotrejž wiceprezidenta Mikea Pencea namołwjeja Trumpa njekmanosće dla pušćić. Nimo toho chcedźa parlamentariske jednanje k wotstronjenju Trumpa ze zastojnstwa „naškaranja rokoćenja“ dla zahajić.
Dźěle lětadła namakali
Najhórši sněhowy chaos minjenych 50 lět su kónc tydźenja w ...
Dale a wjace elektroawtow na dróhach
Flensburg (dpa/SN). W Němskej je loni wjele wjace elektroawtow na dróhi přišło hač lěto do toho. Cyłkownje 394 940 nowych e-awtow su přizjewjernje registrowali, kaž zwjazkowy zarjad za jězdźidła informuje. Lěta 2019 bě jich hišće 108 000 było. Mjeztym je nimale kóžde druhe e-awto jenož wot baterije ćěrjene, tamne awta su hybridne a maja přidatnje bencinowy motor.
13,5 procentow, a tak nimale kóžde sedme jězdźidło, bě w lěće 2020 elektroawto. Podźěl je tež tohodla tak raznje přiběrał, dokelž su cyłkownje mjenje awtow předawali. Němscy awtotwarcy z toho wuchadźeja, zo su wiki awtow koronakrizy dla wo něhdźe pjećinu woteběrali. Zwjazkowe knježerstwo zepěra so w boju přećiwo klimowej změnje na elektroawta. Zwjazk a twarcy awtow přewostajeja kupcam premije hač do 9 000 eurow, pola hybridnych awtow hač do 6 750 eurow. Dyrbjał-li trend dale trać, móhło knježerstwo swój zaměr, sydom do dźesać milionow elektroawtow na dróhach měć, hač do lěta 2030 docpěć, rěčnik zwjazkoweho jězdźidłoweho zarjada zdźěli.
Babiš Trumpa dla z nowym profilom
Praha (dpa/SN). Čěski ministerski prezident Andrej Babiš je po nadběhowanju Kapitola přez přiwisnikow wotwoleneho prezidenta Donalda Trumpa swój profil w socialnych syćach změnił. Dotal bě tam 66lětny z čerwjenej baseballowej čapku z napisom „Za sylnu Čěsku“ widźeć. To wšak wobhladowachu mnozy jako referencu na republikanskeho prezidenta USA, kiž bě čerwjenu čapku z hesłom „Make America great again“ (Čińmy Ameriku zaso wulkotnu) na swoje wosobinske politiske znamjo wuwił.
Na swojim nowym profilowym foće je Andrej Babiš nětko z nahubnikom widźeć, pyšenym z čěskej chorhoju. Namócnosće w stolicy USA Washingtonje miliardar a załožer populistiskeje strony ANO wuraznje zasudźa. Krawale wokoło Kapitola běchu „njesłyšany nadpad na demokratiju“, wón praji.
W zašłosći bě Babiš stajnje zhromadnosće z Trumpom wuzběhował, na přikład, zo je runja jemu z hospodarstwa. Čěske nowiny pak změnu hlada Babiša kritizuja, dokelž je „přepozdźe“.
