Drježdźany (dpa/SN). Sakska ministerka za strowotnistwo Petra Köpping (SPD) njewidźi najebać woteběrace hódnoty in­ci­dency w koronapandemiji hišće „žane woprawdźite wotputanje“. Přiwšěm móžeše wona ze swojej wčerawšej rozprawu w krajnym sejmje polěpšenja zwěsćić. Tak je so ličba infekcijow na 100 000 wobydlerjow w běhu sydom dnjow na 119,8 pomjeńšiła. W decembru ležeše wona w Sakskej hišće pola wjace hač 400 a bě tak po cyłej Němskej najwjetša. Ličba smjertnych padow pak je přeco hišće wulka. Tež mutacije wirusa zamołwitych starosća. Dotal su w Sakskej 16 padow zwěsćili.

Ministerka Köpping pokaza hladajo na wobmjezowanja žiwjenja koronawirusa dla zrozumjenje za přiběracu njesćerpnosć w ludnosći. „To su napinace tydźenje.“ Zaměr je, wobmjezowanja krok po kroku zaso zběhnyć – ale stajnje wotwisnje wot ličby incidency. Nimo toho ma swobodny stat spěšnje reagować móc, dyrbjała-li ličba zaso přiběrać. Naprawy hygieny a wužiwanje nahubnikow wostanu tež w přichodźe centralna tema.

Mjeńšinowa rada wo rozsudźe Europskeje komisije přesłapjena

Berlin (SN). Rada štyrjoch awtochtonych narodnych mjeńšin a ludowych skupin Němskeje namołwja zwjazkowe knježerstwo, sej z jasnym signalom wot Europskeje komisije wužadać, zo rozsud pře­ćiwo europskej wobydlerskej iniciatiwje Minority SafePack cofnje. Komisija EU bě srjedź januara připowědźiła, zo mjeń­ši­nopolitiske žadanja iniciatiwy do pła­ćiwych zakonjow Europskeje unije nje­přetwori.

Debatu wo wosebitych prawach za pře­ćiwo koronawirusej šćěpjenych móžemy sej poprawom lutować. Wězo mamy wo tym rěčeć, hač nimaja šćěpjeni zaso prawo, wšo to činić, štož je nětko korona­wirusa dla zakazane. Wšako najwažniši argument zamołwitych, zo chcedźa nas po tym puću před wirusom škitać, hižo njepłaći: Štóž je šćěpjeny, je škitany! Ja widźu­ problem skerje pola tych, kotřiž njejsu šćěpjeni. Móžu sej derje předstajić, zo widźimy bórze při zachodach ho­sćencow, sportnišćow abo zarjadowanjow taflič­ki „Přistup jeno za šćěpjenych“. Jedyn z wulkich zarjadowarjow koncertow je wšak hižo připowědźił, zo předawa zastup­ne lisćiki jenož hišće šćěpjenym. A cyle­ sprawnje: Móžeće sej předstajić, zo póń­dźeće zaso na kopańcu, na probu chóra abo na wjesny swjedźeń, bjez toho zo sće so ze sykawu před wirusom škitali? Prašenje šćěpjenja njeje etiske, ale budźe prjedy abo pozdźišo za nas wšitkich cyle praktiske. Marko Wjeńka

Zwada mjez porikom direktnje před policaj­skej stražu w Kulmbachu je so za muža w jastwje skónčiła. 30lětny bě so chětro wótře ze swojej přećelku wurěčował. Jako zastojnicy „hamtsce derje znaty“ porik přepruwowachu, so wukopa, zo bě samsny dźeń wukaz zajeća přećiwo mužej dóšoł. Woni jeho zajachu a do jastwa dowje­zechu. „Zo policija jeho problemy na te wašnje rozrisa, z tym drje muž ličił njebě“, w zdźělence zastojnikow rěka.

Serum přećiwo koronawirusej preč ćisnyć­ dyrbjeli su w jendźelskim Rotherhamje. Sobudźěłaćerjo labora běchu zwěsćili, zo njebě specielny chłódźak, w kotrymž šćěpiwo ležeše, přez nóc z milinu zastarany. Tuž dyrbjachu 450 dozow šćěpiwa firmy Biontech/Pfizer wotstronić. Preparat trjeba zymnotu minus 70 stopnjow celsija, zo by so wjacore dny dźeržał.