Žana zawisć na SPD
Zeleni namjety předstajili
Berlin (dpa/SN). Wjace za škit klimy činić je jedyn z hłownych zaměrow Zelenych. Z nowym programom nětko zaměrnje swoje cile sćěhuja. Minjeny pjatk su jón w Berlinje zjawnosći předstajili. Tak namjetuja wustork parnišćowych płunow při wodźenju awta a tepjenju wo 40 eurow na tonu wuhlikoweho dioksida podróšić. Samsny čas pak měli dawk za milinu wotstronić a kóždemu wobydlerjej nimo toho energijowy pjenjez 100 eurow na lěto płaćić.
Šefina strony Annalena Baerbock rjekny, zo su to konkretne naprawy, kotrež chcedźa w běhu lěća zdźěłać. „Čas tłóči“, wona wuzběhny. Tež zwjazkowe knježerstwo ma skónčnje jednać započeć, mjez druhim, zo prawniski zakład za planowany kónc wudobywanja brunicy zhotowi. Dale Zeleni namjetuja, wotbytk elektroawtow spěchować. E-awta maja dobropis dóstać a jězdźidła, kotrež wjele ćěriwa přetrjebuja, so podróšić.
Program je Baerbock minjeny pjatk zhromadnje z frakciskim šefom strony Antonom Hofreiterom a badensko-württembergskim ministerskim prezidentom Winfriedom Kretschmannom předstajiła.
To a tamne (01.07.19)
73lětnej wuměnkarce z Budyšina su móšeń wróćili, kotruž běchu jej před nimale dźesać lětami na zahrodźe w Ringenhainje pokradnyli. Nětko je ju 29lětny Čech na wuchodźowanju po lěsu pola Šluknova našoł a na Habrachćičanskej policajskej staciji wotedał. Chorobna zawěsćenska karta a diwersne dalše karty wšak su mjeztym njepłaćiwe. Ale snadź móže rentnarka ze wšelakimi bonusowymi kartkami hišće něšto započeć.
Rozkora mjez stami hosćimi lěsneje kupjele w Düsseldorfje je zasadźenje policije zawinowała. Dźesatki zastojnikow su minjenu sobotu spytali zwadu změrować. K ćělnym rozestajenjam na zbožo dóšło njeje. Někotři z kupacych běchu so na skupinu hewrjekacych młodostnych hóršili. Tući pak njedachu sej ničo rjec. Na to so tež dalši wopytowarjo werbalnje do młodostnych dachu.
Protestuja tež w prózdninach
Berlin (dpa/SN). Za wobswětowe hibanje Fridays for future su šulerjo w Berlinje tež w druhim tydźenju lětnich prózdnin na puć šli a protestowali. Kaž rěčnik hibanja zdźěli, njepušća zapósłancow tak jednorje do lětnjeje přestawki, njejsu-li swoje domjace nadawki w klimowej politice spjelnili. Po cyłym swěće šulerjo stajnje pjatk stawkuja, zo bychu na klimowu změnu skedźbnjeli.
Z AfD njekooperować
Berlin (dpa/SN). Nimale dwě třećinje wólbokmanych Němskeje stej za to, zo nima CDU z AfD hromadźe dźěłać. To wuchadźa z naprašowanja „Deutschlandtrend“ w nadawku telewizije ARD. Přiwšěm trend kraj pači. Na wuchodźe wupraja so 49 procentow přećiwo zakazej kooperacije CDU z AfD, kotryž bě předsydka CDU Annegret Kramp-Karrenbauer wuprajiła. 46 proc. woprašanych je za njón. Na zapadźe je porno tomu 68 proc. woprašanych za zakaz a po cyłym Zwjazku 64 proc.
Jatba Yücela njezakonska była
W centralnej chinskej prowincy Hunan, ze spektakularnymi formacijemi ...
Wjeršk G 20 zahajeny
Wohroženja přiběraja
Wo wučerjow dyrbi Sakska sama wabić
Praha (SN/at). Temy, kotrež staj kubłanskaj ministraj Čěskeje a Sakskeje Robert Plaga a Christian Piwarz (CDU) wčera w Praze rozjimałoj, su zdobywanje wučerjow, digitalizaciju a medijowe kubłanje na šulach kaž tež cuzorěčne wukubłanje. Na rozmołwje wobdźěleni běchu tež zapósłancy Sakskeho krajneho sejma Marion Junge (Lěwica), Lothar Bienst a Marko Šiman (wobaj CDU). Čěska strona je zajimowana, nastupajo digitalizaciju w swojich kubłanišćach ze Sakskej hromadźe dźěłać, rozprawja čłon europskeho wuběrka krajneho sejma Marko Šiman.
Wobaj ministraj staj wčera tež na serbšćinu nawjazałoj. Našu maćeršćinu do diskusije zapřijeć móža runje tak we wobłuku metodiki při zdźěłanju digitalnych wučbnych srědkow. Kak móhło to konkretnje wupadać, so Šiman nětko praša: „Što je wažne a što trjebamy za serbsku wučbu?“ Wón ma za spomóžne z małymi krokami započeć.
To a tamne (28.06.19)
W parku so słónčić móže jara drohe być. W italskim Venedigu je so 23lětna Kanadźanka na Papadopoli-zahrodach w bikiniju słónčiła a dyrbješe za to 250 eurow pokuty płaćić. Zo njeje dowolene po lagunowym měsće z jeho wuznamnym historiskim centrumom w kupanskej drasće so pohibować, na zjawnych městnach přebywać abo priwatne jězdźidło wužiwać, wona njewědźeše.
Město Mnichow je porno Venedigej wotewrjeniši. Hač mužojo abo žony, wšitcy smědźa so při rěce Isar tež jenož w kupanskich cholowčkach słónčić. Hłowna wěc, zo su primarne splažne dźěle njewidźomne, tak rěkaše tele dny jednohłósnje w Mnichowskej měšćanskej radźe. To wšak hladajo na přewšo katolsku Bayersku chětro překwapja. Zwonka wupokazanych městnow pak maja wšitcy wotpowědnje zdrasćeni być.
Nochcedźa sej wobraz njepřećela nanuzować dać
Budyšin (CS/SN). „Měniš, zo chcedźa Rusojo wójnu?“ Tale linka z basnje Jewgenija Jewtušenka słužeše jako hesło zarjadowanja, na kotrež je Budyska Lěwica předwčerawšim do Röhrscheidtoweje bašty přeprosyła. Z hosćom běštaj tam bywši zapósłanc Lěwicy w zwjazkowym sejmje Wolfgang Gehrcke kaž tež žurnalistka a awtorka Christiane Reymann. Wonaj staj njedawno knihu „Němska a Ruska – kak dale?“ wozjewiłoj. W kole, kotrež moderěrowaše serbski zapósłanc krajneho sejma Hajko Kozel, sedźeše nimo toho hospodarski eksperta Reinhold Gläß. Wón je za saksku software-firmu wjele w Ruskej a na Ukrainje po puću.
