Kónc mawty ma prěnje sćěhi
Berlin (dpa/SN). Wčerawši rozsud Europskeho sudnistwa (EuGH) nastupajo planowanu mawt za wosobowe awta w Němskej ma prěnje konsekwency. Zwjazkowy wobchadny minister Andreas Scheuer (CSU) je wukazał, hižo wotzamknjenej zrěčeni z wobhospodarjerjomaj za planowane zběranje popłatka a kontrolu systema wupowědźić.
Ministerstwo bě hižo loni zrěčenje z awstriskim poskićerjom mawtowych systemow Kapsch a z předawarjom wignetow CTS Eventim wotzamknyło. Opozicija na to kritizowaše, zo ministerstwo fakty twori, byrnjež doskónčna prawniska wěstota scyła hišće data njebyła. Po zwrěšćenju plana dyrbi Zwjazk ze žadanjemi za wotškódnjenjom ze stron wobeju předewzaćow ličić. Scheuer załoži wčera bjezposrědnje po wusudźe dźěłowu skupinu, kotraž ma financne a organizatoriske prašenja zrjadować. Kaž z knježerstwowych kruhow rěka, su tež dalše jednanja a wudawki k přesadźenju mawty hnydom přetorhnyli. Najwyši sudnicy EU běchu wčera rozsudźili, zo by mawt europske zakonje raniła, dokelž bychu ju jenož wukrajni šoferojo płaćić dyrbjeli.
To a tamne (19.06.19)
Dowolowu přestawku Braniborskeho krajneho sejma je šup wužił, zo by do pinčneje garaže derje wobstražowaneho twarjenja zalězł. Sobudźěłaćerjo wuhladachu zwěrjećeho zadobywarja w metalowej konstrukciji pod wjerchom. Zamołwići chcedźa wočaknyć, hač so šup sam zaso z krajneho sejma won namaka. Hewak chcedźa jeho z pomocu škitarjow zwěriny popadnyć a w lěsu wusadźić.
Čas wotstronić chcedźa na sewjeronorwegskej kupje Sommarøy. Dokelž so tam słónco w lěću nimale 70 dnjow scyła njechowa, prócuja so zamołwići kupy wo titul prěnjeho bjezčasoweho pasma swěta. Hdyž je faktisce stajnje swětło, njetrjebaš scyła wědźeć, kak pozdźe je, z kupy rěka. Na Sommarøy je w lětnich měsacach z wašnjom, zo sej dźěći hač do nocy wonka hrajkaja a ludźo fasady swojich domow wo połnocy barbja.
Ukrainski prezident w Němskej
Berlin (dpa/SN). Měsac po nastupje zastojnstwa chcyše nowy ukrainski prezidenta Wolodimir Zelenskij dźensa na prěni wopyt do Berlina přijěć. Tam wočakowaše jeho zwjazkowa kanclerka Angela Merkel (CDU) z wojerskej ceremoniju. Rěčeć chcyštaj wonaj předewšěm wo tym, kak hodźał so měrowy proces na wuchodźe Ukrainy zaso wožiwić. Wšako tam proruscy separatisća a ukrainske jednotki přećiwo sebi wojuja. Němska a Francoska w konflikće posrědkujetej.
Mursi pochowany
Kairo (dpa/SN). Po jeho njewočakowanej smjerći za čas sudniskeho jednanja su bywšeho egyptowskeho prezidenta Mohammeda Mursija w kruhu swójby pochowali, kaž jeho syn Ahmed dźensda zdźěli. Mursi bě so wčera na sudniskim jednanju zwjezł a 67lětny zemrěł, pječa na infarkt wutroby. Opozicija egyptowskemu statej wumjetuje, zo je wina na „poněčimnej smjerći“ Mursija. W lěće 2012 bě wón jako prěni swobodnje woleny prezident kraja na móc přišoł. Wójsko pak Mursija lěto na to wotsadźi, a wot toho časa sedźeše wón w jastwje.
USA sćelu dalšich wojakow
Jamu zadźeržeć
Podstupim (dpa/SN). Nimale 2 000 ludźi je wčera w Podstupimje za lěpši škit klimy a spěšniši kónc zmilinjenja brunicy demonstrowało. Mjez wobdźělnikami bě wjele šulerjow, studentow a staršich. Zhotowili běchu woni plakaty, mjez druhim z napisom „2038? Za klimu přepozdźe!“ abo „Wólby su klimowe wólby“.
Po tuchwilnym stawje maja w lěće 2038 wšitke brunicowe milinarnje zawrjene być. Organizatorojo wčerawšeho protesta namołwjachu braniborske knježerstwo, planowanu nowu brunicowu jamu Wjelcej-juh II hišće do wólbow Braniborskeho krajneho sejma 1. septembra zadźeržeć. Nimo toho měli Janšojsku milinarnju najpozdźišo spočatk 2020tych lět wotpinyć.
Kedźbliwi być
Sudnistwo: Mawt rani zakonje EU
Luxemburg (dpa/SN). Planowany nadróžny popłatk za wosobowe awta w Němskej rani zakonje. To je Europske sudnistwo dźensa w Luxemburgu rozsudźiło. Mawt njewotpowěduje europskim zakonjam, kaž sudnicy zdźělichu. Mawt zawjesć njeje tuž po dotalnym modelu móžno.
Popłatk bě w prěnim rjedźe prestižny projekt bayerskeje CSU w zwjazkowym knježerstwje. Jón chcychu wot oktobra 2020 na awtodróhach a zwjazkowych dróhach zběrać. Němskim šoferam chcychu popłatk přez niše dawki zaso wróćić. Wukrajni šoferojo bychu jenož na awtodróhach mawt płaćić dyrbjeli.
Luxemburgscy sudnicy argumentowachu, zo nadróžny popłatk diskriminuje, dokelž by jeničce šoferow we wukraju přizjewjenych awtow potrjechił. Nimo toho by zasady swobodneho wikowanja a swobodneho posłužboweho wobchada ranił. Mawt běchu lěta 2015 wobzamknyli. Po spočatnych wobmyslenjach a snadnych změnach jej tež komisija EU přihłosowaše. Awstriska je na to zhromadnje z Nižozemskej na Europskim sudnistwje přećiwo tomu skoržiła.
To a tamne (18.06.19)
Najebać policajsku eskortu a módru swěcu njeje w šwicarskim Schaffhausenje dźěćo w maćernym žiwoće dlěje čakać chcyło. Zastojnicy dyrbjachu zastać a přepodachu žonu sanitetarjam, kotřiž tohorunja su z módrej swěcu přismalili. Jenož mjeńšiny pozdźišo žona w chorobnym awće porodźi. Nan bě nimojěduce policajske awto zadźeržał, dokelž měješe žona po puću do chorownje sylne hrona. A policija wołaše chorobne awto.
Pjanaj dwójnikaj staj policiji w Braunschweigu ćeže načiniłoj. Jedyn ze 46lětneju bě chětro alkoholizowany z mopedom nimo žony jěł, kotraž policiju zawoła. Ta móžeše na zakładźe čisłoweje taflički adresu muža zwěsćić. W bydlenju nańdźeštaj zastojnikaj dwójnikow při jědźi. Tak dyrbještaj wobaj duć, a wobaj měještaj tři promile alkohola w kreji.
Prezidij FUEN njezměje přichodne tři lěta zastupnika Serbow
Jubilejny kongres Federalistiskeje unije europskich narodnych mjeńšin w Bratislavje je zakónčeny. Prezidij organizacije wostanje přichodne tři lěta bjez zastupnika Łužiskich Serbow.
Bratislava (SN/MkWj). Z wólbami noweho předsydstwa je so sobotu w słowakskej stolicy Bratislavje jubilejny kongres Federalistiskeje unije europskich narodnych mjeńšin (FUEN) składnostnje jeje 70lětneho wobstaća zakónčił. Cyłkownje 120 delegatow bě wot štwórtka dźěło minjeneho lěta bilancowało a ćežišća přichodneho skutkowanja postajiło. FUEN je ze 103 čłonskimi organizacijemi ze 35 krajow najwjetše zastupnistwo awtochtonych narodnych mjeńšin po wšěm swěće.
Při wólbach nawodnistwa bě dotalny prezident federalistiskeje unije Loránt Vincze, Madźar z Rumunskeje, znowa za zastojnstwo nastupił. Napřećiwneho kandidata wón njeměješe. Hinak, hač běchu někotři wočakowali, wuprajichu jemu delegaća z přemóžacymi 90 procentami dowěru a wuzwolichu jeho tak na přichodne tři lěta znowa do zastojnstwa.
Biskop w Sedmihródskej był
Drježdźany (B/SN). Sakski ewangelski krajny biskop Carsten Rentzing je minjeny měsac Rumunsku wopytał. W Sedmihródskej (Siebenbürgen) zetka so wón ze zastupjerjemi tamnišeje ewangelskeje cyrkwje. Přewodźeli su jeho farar Matthias Fischer, ekumeniski referent Friedemann Oehme a Zwickauski superintendent Harald Pepel, pochadźacy ze Sedmihródskeje. Biskop Rentzing přednošowaše w Sibiuskim (Hermannstadt) teologiskim instituće na fachowu temu „Lutherski specifikum a jeho zakótwjenje w dźensnišej ekumenje“, za čož žněješe jara wulke připóznaće.
Zrěčenje ma měr sylnić
Prócuja so wo srědki za běrow
Budyšin (SN). Problematika pobrachowacych serbskich kandidatow na wuhladnych městnach za wólby noweho Sakskeho krajneho sejma je naležnosć, kotruž prawniski wuběrk Serbskeho sejma tuchwilu rozjimuje. Wo tym zhonichu čłonojo Serbskeho sejma na sobotnym posedźenju w Budyskim Serbskim domje runje tak kaž wo prócowanjach nastupajo załoženje serbskich swobodnych šulow. Te bě wuběrk za regionalne wuwiće předstajił, kaž w nowinskej zdźělence sejma rěka.
Serbski sejm chce kandidatow a kandidatki za saksku Radu za serbske naležnosće nominować. Jeho čłonojo mysla na zhromadnu lisćinu z dalšimi gremijemi a zwjazkami.
Sejmarjo maja za trěbne swoje skutkowanje optimować. Tohodla měł kóždy wuběrk tři temy pomjenować, z kotrychž so za přichodne posedźenje na jednu wusměrja. Wotpohlada tuž so na idejowym wubědźowanju społnomócnjeneho zwjazkoweho knježerstwa za nowe zwjazkowe kraje „Čińće! sobu“ wobdźělić. Měnja, zo hodźa so tak běrow/jednaćelnja Serbskeho sejma zarjadować.
