Rekordne zmjerzki minjenych nocow su wšelke lodźane skulptury ...
Wo połoženjena mjezy šło
Drježdźany (dpa/SN). Sakske krajne knježerstwo je dźensa wo połoženju na mjezy Čěskeje wuradźowało. Nutřkowny minister Roland Wöller (CDU) informowaše wobdźělnikow wo najnowšim wuwiću. Při tym móžeše na to pokazać, zo je so situacija porno njedźeli a póndźeli změrowała. Přiwótřenych rjadowanjow zapućowanja mutacijow koronawirusa dla bě na němsko-čěskej mjezy, wosebje pak na awtodróze A 17, ke kilometry dołhim haćenjam dóšło. Šoferojo dyrbjachu dlěje hač dwě hodźinje čakać.
Po informacijach zwjazkoweho knježerstwa smědźa wot njedźele jenož hišće ludźo z Čěskeje a Tirola do Němskeje přijěć, kotřiž maja tu bydlenje. Wuwzaća płaća za sobudźěłaćerjow strowotnistwa a šoferow nakładnych awtow. Rjadowanje bě w Čěskej a Awstriskej protesty zbudźiło. Čěscy aktiwisća žadaja sej „wjećbu“ za postupowanje Němskeje.
Žane lěpšiny
Wo perspektiwach w krizy rěčeli
Berlin (dpa/SN). Hladajo na wulke mjerzanje dlijaceje so pjenježneje podpěry za wot koronakrizy potrjechene předewzaća rěčeše zwjazkowy minister za hospodarstwo Peter Altmaier (CDU) dźensa ze zastupnikami wjacorych branšow. Na tak mjenowany „hospodarski wjeršk“ bě zastupnikow 40 zwjazkow přeprosył. Temy běchu aktualne krizowe połoženje, najnowše wobzamknjenja Zwjazka a krajow, pomocne programy a móžne perspektiwy wotewrjenja za hotelownikow, hosćencarjow a kulturnikow.
Hižo do zahajenja posedźenja je sej hospodarstwo spušćomnje planowane zběhnjenje wolóženjow žadało. Zamołwići běchu dalši lockdown najprjedy raz hač do 7. měrca raznje kritizowali. Zwjazki skorža dlijaceho so wupłaćenja pomocnych srědkow a wulkeje běrokratije dla.
Hłowny jednaćel Zwjazka němskich wikowarjow Stefan Genth warnowaše Altmaiera před nowymi hołymi lubjenjemi a tróštowanjom. Wón wočakuje perspektiwu a skutkownu podpěru.
Dowol k jutram abo nic?
Rozdźělne posudźowanje ministerskeju prezidentow incidency dla
Berlin (dpa/SN). W debaće wo najlěpšich strategijach k zběhnjenju dalšich wobmjezowanjow koronawirusa dla namołwja zwjazkowe knježerstwo ke kedźbliwemu postupowanju. Wolóženja njesměli k tomu wjesć, zo ličby infekcijow potom zaso spěšnje přiběraja, zwurazni rěčnik zwjazkoweho knježerstwa Steffen Seibert wčera w Berlinje. Je tuž wažne, do dalšich wolóženjow najprjedy raz wuwiće cyklusa infekcijow dwaj tydźenjej do toho wočaknyć.
Prašany za wuhladami za lětuši jutrowny dowol Seibert wospjetowaše, zo dyrbimy wuwiće přichodnych tydźenjow wočaknyć. Hakle po tym móhli posudźować, kajke wolóženja su w kajkim wokomiku móžne. „Zwjazkowe knježerstwo na tym dźěła, zo bychu jutry 2021 cyłkownje hižo hinaše byli hač jutry 2020.“ Ličba infekcijow a wobsadźenych łožow na intensiwnych stacijach woteběra. Połoženje je pak přiwšěm „hišće njewěste“, rjekny Seibert hladajo na nowe strašne mutacije koronawirusa.
Rěčnik knježerstwa rozłoži informacije k dalšim móžnym wolóženjam a za to trěbnym wuměnjenjam.
To a tamne (16.02.21)
Za wodźidłom kwada lepili su policisća dźewjećlětneho hólca w Bitburgu ze sydomlětnym sobujěducym. Štyrikolesate jězdźidło wužiwać pak směš jeno z jězbnej dowolnosću. Nan młodeho šofera twjerdźeše, zo hólc kwad dosć derje wobknježi. Přećiwo nanej zahajichu chłostanske jednanje, dokelž bě ćerpjeł, zo jeho syn bjez jězbneje dowolnosće jězdźi. Policistam bě kwad napadnył, dokelž jědźeštej hólcaj bjez nahłownika. TÜV jězdźidła bě nimo toho pjeć lět wotběžany.
Ćeknjene swinje su wčera wječor na awtodróze A 14 w Saksko-Anhaltskej wobchad lemili a zasadźenje policije zawinili. Po informacijach policije bě so transporter skotu njedaloko wotbóčki Peißen zwróćił. Někotre swinje běhachu na to po jězdni. Rumowanje traješe hač do ranja w pjećich a awtodróha do směra na Drježdźany bě dospołnje zawrjena.
Spahn razne kontrole zakituje
Wótra kritika Awstriskeje nowych namjeznych rjadowanjow dla
Berlin (dpa/SN). Zwjazkowy minister za strowotnistwo Jens Spahn (CDU) je razniše kontrole na mjezy k Čěskej a Awstriskej k wotwobaranju koronawirusa zakitował. „Dyrbimy wokrjesam podłu mjezy składnosć dać, k měrej přińć“, rjekny Spahn Stuttgartskim nowinarjam. Wón sam je šěsć kilometrow wot nižozemskeje mjezy zdaleny wotrostł a wě sej lěpšiny Europy bjez mjezow wažić. „Je pak wokomikow w tuchwilnej pandemiji, w kotrychž je trjeba na dobro wěstoty a strowoty wšěch rozsudźić.“
Na mjezy k Čěskej a awstriskemu zwjazkowemu krajej Tirol płaća wot wčerawšeho nowych mutacijow koronawirusa dla razniše postajenja při zapućowanju wobydlerjow z teju krajow. Z potrjechenych kónčin smědźa jenož hišće wosoby do Němskeje přijěć, kotrež maja tu bydlenje. Wuwzaća płaća za medicinski personal, za šoferow nakładnych awtow a za sezonowe dźěłowe mocy. Hač do jutřišeho chcetej Sakska a Bayerska wo dalšich wuwzaćach za ludźi rozsudźić, kotřiž dźěłaja we wažnych powołanjach.
Róžowa póndźela w Kölnje
Köln (B/SN). Dokelž póstniske ćahi lětsa wupadnu, přewjedźechu přećah dźensa w miniaturnej formje a klanki w póstniskich kostimach přez město rejowachu! Wot lěta 1802 zahorjatej legendarnej a typiskej klance na kijach Tünnes a Schäl Kölnskich wobydlerjow. Při tym rěčitej wonej w Kölnskim dialekće. Ze sydom do wósom kilometrow dołhim póstniskim přećahom z něhdźe 10 000 wobdźělnikami bě w zašłych lětach Kölnjanski ćah najwjetši w cyłej Němskej. Lětsa stejachu we wulkej hali jenož 16 miniaturnych póstniskich wozow. Róžowa póndźela je wusko z katolskej cyrkwju zwjazana. Swjedźeń wotměje so stajnje póndźelu do popjelneje srjedy. Wot 11. do 19. lětstotka počesćichu bamžojo njedźelu do róžoweje póndźele zasłužbne wosobiny ze złotej róžu. Dokelž wotměwaše so hłowna zhromadźizna karnewalskich towaršnosćow přeco póndźelu po tutej njedźeli, pomjenowachu ju norojo róžowu póndźelu.
Čěska nuzowy staw wukazała
Praha (dpa/SN). Čěska je nětko tola dramatiskich ličbow infekcijow z koronawirusom dla nuzowy staw wukazała. Wón płaći wotnětka 14 dnjow, zdźěli mjeńšinowe knježerstwo ministerskeho prezidenta Andreja Babiša. Knježerstwo wotpowěduje tak próstwje wšitkich 14 zarjadniskich regionow kaž tež Prahi. Wuwzaćny staw měješe so poprawom minjenu nóc skónčić. Ze swojim rozsudom spřećiwja so knježerstwo woli parlamenta, kiž bě wotpokazał lockdown podlěšić.
Žada sej ministra wotwołać
Berlin (dpa/SN). Městopředsyda FDP Wolfgang Kubicki je sej hladajo na dlijace so wupłaćenje pjenježneje podpěry hospodarstwu koronapandemije dla žadał, hospodarskeho ministra Petera Altmaiera (CDU) ze zastojnstwa wotwołać. „To je so tak prawje nimokuliło. By derje było, bychmy-li druheho čłowjeka w tej zamołwitosći měli“, rjekny Kubicki wčera w telewiziji. „Altmaier je wina, zo njejsu předewzaća přilubjene pomocne srědki přeco hišće dóstali.“
Prěni zaměr šćěpjenja docpěty
Šiman za nowy logistiski centrum
Budyšin (SN/MkWj). Zapósłanc CDU w Sakskim krajnym sejmje Marko Šiman předewzaćelow we Łužicy namołwja, čěskim powołanskim dojězdźowarjam nachwilnje kwartěr w Němskej wobstarać. Tak móhli wšitcy zhromadnje přichodne tři tydźenje wobmjezowanja koronawirusa dla přetrać. Trěbne negatiwne testy na koronawirus su dojězdźowarjam wulke brěmjo, dokelž dyrbja zdźěla hodźiny dołho při testowanskich centrumach čakać. To rjekny Šiman minjeny pjatk na internetnej nowinarskej konferency w Budyšinje. „Sakska ma tež w tuchwilnej koronakrizy wšědnje 12 000 dojězdźowarjow z Čěskeje a Pólskeje. W časach do krizy bě jich dwójce telko. Do Hornjeje Łužicy jězdźi wšědnje 1 000 ludźi z Čěskeje a 4 000 z Pólskeje. Ličby pokazuja, kak wažne dźěłowe mocy ze susodneju krajow su.“
