To a tamne (29.01.21)
Dramatisce wupadaca pozdatna mróčel kura při katedrali w Kölnje je wulkozasadźenje wohnjoweje wobory zawiniła. Wobydler bě jej wo sylnym kurje při južnej wěži tachantskeje cyrkwje rozprawjał. Na to přijědźe nimale 40 awtow ze sto wohnjowymi wobornikami z cyłeho města k sławnemu symbolej města, woheń pak njemóžachu žadyn zwěsćić. Prawdźepodobnje běchu swětłomjetaki kurjawu a dešć při wěži wobswětlili, wuskutkujo tak zaćišć mróčele sylneho kura.
Wokno awtowych duri rozbić dyrbjeli su policisća w bayerskim Hohenbrunnje. Do toho bě jim Pkw napadnył, kotryž na awtodróze po seklojtej šćežce jědźeše. Šofer pak policiju ignorowaše a nochcyše zastać. Skónčnje so jej poradźi awto zadźeržeć. Dokelž nochcyše muž awto wočinić, su jeho zastojnicy namócnje wućahnyli a za alkoholowy test sobu wzali.
Mordar Lübckeho zasudźeny
Frankfurt n. M. (dpa/SN). Mordar Kasselskeho knježerstwoweho prezidenta Waltera Lübckeho, Stefan Ernst, dyrbi 15 lět do jastwa. To je wyše krajne sudnistwo dźensa w Frankfurće nad Mohanom rozsudźiło. Nimo toho zwěsćichu wosebje ćežku winu skućićela, štož pušćenje po 15 lětach wuzamkuje. Tohorunja wobskorženeho Markusa H. zasudźichu na pruwowanski čas połdra lěta, dokelž njemóžachu jemu dopokazać, zo je při njeskutku 2019 aktiwnje pomhał.
Incidenca mjenje hač sto
Berlin (dpa/SN). Prěni króć wot kónca oktobra wučinja tak mjenowana sydomdnjowska incidenca koronapademije po informacijach Roberta Kochoweho instituta mjenje hač sto. W Němskej su w běhu sydom dnjow 98 nowych infekcijow na 100 000 wobydlerjow zwěsćili. Tak je incidenca po najwyšim stawje krótko do hód (197,6) wo połojcu woteběrała. W běhu minjenych 24 hodźin su w Němskej 17 553 dalšich infekcijow zličili.
Tež bratr Nawalneho zajaty
Po wšej Pólskej su wčera wječor přećiwo nowemu zakonjej wo ...
Šćěpiwa dla so dale wadźa
Brüssel (dpa/SN). Europska unija a farmakoncern Astrazeneca wadźitej so dale šćěpiwa pře koronawirus dla. Krizowe internetne posedźenje njeje wčera wječor žane wuslědki wunjesło. Komisarka EU Stella Kyriakides apelowaše na moralisku zamołwitosć koncerna, kotryž so wumjetowanjam wobara. Wotwidźomne pak drje je, zo budźe wulke mnóstwo seruma w Němskej a druhich krajach EU hakle tydźenje abo měsacy pozdźišo k dispoziciji hač dotal planowane.
Hladajo na pobrachowacy srědk přećiwo koronawirusej je sej městopředsydka zwjazkoweje SPD Serpil Midyatli europski wjeršk šćěpiwa dla žadała. Tam měli so wšitcy producenća a dodawarjo z Europskej komisiju za blido sydnyć, zo bychu ručež móžno zwěsćili, štó ma hišće kapacity a štó móhł spěšnje produkciske móžnosće, logistiku a dalše trěbne wěcy přewostajić, rjekny Midyatli powěsćerni dpa. „Kriza šćěpiwa dla“ hodźi so jeničce zhromadnje zmištrować.
Šiman: Na njeskutki njezabyć
Sakski krajny sejm wopory holocausta wopominał
Drježdźany (dpa/SN). Składnostnje 76. róčnicy wuswobodźenja koncentraciskeho lěhwa Auschwitz su wčera w plenarnej žurli Sakskeho krajneho sejma wopory nacionalsocializma wopominali. Prezident krajneho sejma dr. Matthias Rößler rjekny zapósłancam, čłonam krajneho knježerstwa a zastupnikam organizacijow woporow: „Kłonimy so ćicho před woporami a wopominamy jich duše. Štož je so tehdy stało, njesměło so nihdy wospjetować.“ Rößler namołwješe kóždejžkuli formje antisemitizma znapřećiwić. „Njebudźmy naiwni! Židowske žiwjenje w Němskej je zaso wohrožene. To mje wohańbja. Stajnje zaso widźimy antižidowsku šćuwańcu a namóc. Hida na Židow je hańba za naš kraj, hač ze stron prawicarjow, lěwicarjow abo muslimow“, Matthias Rößler potwjerdźi.
To a tamne (28.01.21)
Swoju před sydom lětami dobytu postawu Oscaroweho myta njemóže dźiwadźelnik USA Jared Leto wjace namakać. Při přećahu w Los Angelesu bě wón pytnył, zo je postawa preč, kaž telewizijnemu moderatorej rjekny. Tež po dlěšim pytanju wostanje wona zhubjena. 49lětny wšak njewuzamkuje, zo je něchtó pozłoćanu figuru cyle jednorje spakosćił. Wón so jenož nadźija, „zo je w dobrych rukach“, Leto praji.
Sydomlětny syn šefa pućowanskeho portala Trivago Axel Hefer je njewočakowano do jstwy přišoł, jako měješe Hefer runje internetnu rozmołwu z ameriskim powěsćowym sćelakom CNN. „Mamy wopytowarja“, rjekny moderator sćelaka, jako so hólc w spanskim wobleku přidruži a so na klin nana sydny. Mały Victor chcyše do łoža. Moderator so jemu dźakowaše prajo: „Ty sy nam dźeń porjeńšił.“
Nowe naprawy w Sakskej
Drježdźany (dpa/SN). Sakska je kaž wočakowane swoje naprawy koronawirusa dla přiměriła. Tak su dźěłodawarjo nětko winowaći swojim přistajenym domjace dźěło poskićić, hdźežkuli je to móžno, zdźěli ministerka za socialne Petra Köpping (SPD) po wčerawšim posedźenju kabineta. Na kemšach njesmědźa ludźo dale spěwać. Wot jutřišeho su mjez druhim w busach, wobchodach a cyrkwjach lěpje škitace nahubniki trěbne.
Zrěčenje z USA podlěšene
Moskwa (dpa/SN). Ruska a USA su so po informacijach wonkowneho ministerstwa w Moskwje na podlěšenje swojeho poslednjeho zrěčenja wo atomarnym wotbrónjenju bjez wuměnjenjow dojednali. Zastupowacy wonkowny minister Sergej Rjabkow informowaše, zo zrěčenje „New start“ wo pjeć lět podlěša. Prezident Wladimir Putin a nowy prezident USA Joe Biden běštaj so w prěnim telefonaće na to dojednałoj.
Racija přećiwo dealeram
