Genf (dpa/SN). Lěto po deklaraciji pandemije přez Swětowu strowotnisku organizaciju (WHO) je so w Němskej po přeswědčenju Roberta Kochoweho instituta třeća žołma koronapandemije započała. „Mamy cyle jasne znamjenja za to, zo je třeća žołma hižo zahajena“, rjekny prezident instituta Lothar Wieler žurnalistam w Genfje. Krute nałožowanje škitnych naprawow, kaž wotstawki dodźeržeć a nahubnik wužiwać, je dale nuznje trěbne. Šćěpjenska kampanja je w jeho wočomaj napřemoběh z časom. Njebudźe-li šćěpjenje pobrachowaceho seruma abo hinašich přičin dla přetorhnjene, móhło hač do nazymy 80 procentow ludnosće Němskeje přećiwo wirusej imune być. „Hdyž tomu tak budźe, móžemy wšitke škitne naprawy zběhnyć“, Wieler wu­zběhny. Problemy pak načinja wuwiće nastupajo wirus w druhich krajach.

WHO bě 11. měrca 2020 koronawirus oficialnje jako pandemiju deklarowała. Mjeztym je so po cyłym swěće 120 milionow ludźi z wirusom natyknyło a 2,6 milionow zemrěło.

Rozmach mjeztym wosme lěto za sobu – dźěłarnistwa za wyše mzdy

Wiesbaden (dpa/SN). Twarska branša je tež w koronakrizy derje zasłužiła. Z kónclětnym spurtom zamó hłowne twarske přemysło lońši wobrot wo 4,9 procentow porno lětu 2019 stopnjować, kaž Zwjazkowy statistiski zarjad we Wiesbadenje zdźěli. Za branšu bě to mjeztym wosme lěto za sobu ze spochi přiběracymi wobrotami. Loni w decembru běchu dochody samo wo 18 procentow wyše hač lěto do toho.

K rozmachej přinošowali su nimale wšitke wobłuki twarskeho přemysła, nimo twara dróhow a železniskich čarow, kotrež wostachu snadnje pod niwowom lěta do toho, institucija informuje. Wobroty ćěsliskich firmow su z 13,6 procentami najsylnišo přiběrali. Ličba přistajenych w twarstwje je po informacijach zwjazkowych statistikarjow w přerězku lěta wo 1,5 procentow rozrostła.

Móžeće sej předstajić, zo póńdźemy nazymu zaso bjez škitneho nahubnika a wěstotneho wotstawka do dźiwadła, na koncert abo do koparskeho stadiona? Ja mam z tajkej předstawu hišće swoje problemy. Nětko pak nam šef Roberta Kochoweho instituta Lothar Wieler runje to připowědźa – tón muž, kiž je nam loni takrjec jako powołanski pesimist ze swojim pochmurjenym mjezwočom kóždužkuli nadźiju na lěpše časy stajnje zaso rubił. Snano móžemy tola hišće wěstu nadźiju čerpać. Nětko budźe rozsudne, kak spěšnje móža ludźo wšitkich starobnych skupin wonu škitnu sykawu dóstać. Hdyž pak wobkedźbuju debatu, hač je lěpje šćěpjenske centrumy wužiwać abo so tola radšo na lěkarske praksy spušćeć, ­a hdy móhli tam šćěpić započeć – spočatk apryla, srjedź apryla abo hakle w meji –, mam hižo zaso dosć. W druhich krajach su ze šćěpjenjom wjele dale a tež ze šćěpjenskim porjadom hladajo na najwažniše skupiny hinak wobchadźeja. Smy w Němskej ... Marko Wjeńka

Zranjenemu šubutej žiwjenje wuchował je kedźbliwy muž w sewjerorynsko-westfalskim Balve. Wón zawoła policiju a wodźeše wobchad awtow wokoło ptaka, kotryž sedźeše wosrjedź zwjazkoweje dróhi B 229. Strachoćiwemu zwěrjeću ze zranjenym wóčkom njeje so derje šło, kaž policija pytny. Wona wza šubuta (Uhu) do přikrywa a dowjeze jeho do sokołarstwa, hdźež jeho skótny lěkar zastara.

Dom połny kulkopisakow ma 58lětny Gerd Reck we wuchodofriziskim West­­rhauderfehnje a chce tak swětowy rekord nastajić. „Chcu čłowjek z najwjace kulkopisakami na swěće być“, zdźěli Reck powěsćerni dpa. W běhu 27 lět je wučeny skowar po swójskim trochowanju něhdźe 150 000 pisakow znosył, kotrež ma po cyłym domje rozdźělene. Pječa pak bydli w Danskej muž, kiž wobsedźi 500 000 tajkich pisakow.