Waršawa (dpa/SN). Zwjazkowy minister za wonkowne naležnosće Heiko Maas (SPD) je wobdźělenje Němskeje na wot USA nawjedowanej wojerskej misiji na Hormuskej mórskej dróze w Persiskim zaliwje jasnje wotpokazał. „Na wot USA nawjedowanej planowanej mórskej mi­siji so zwjazkowe knježerstwo njewobdźěli“, rjekny Maas wčera we Waršawje. Zwjazkowe knježerstwo ma strategiju USA „maksimalneho ćišća“ na Iran za wo­pačnu. Němska nochce žanu wojersku eskalaciju a sadźa dale na diplomatiju.

Krótko do toho bě zakitowanska mi­nisterka Annegret Kramp-Karrenbauer (CDU) hišće rjekła, zo njeje Němska wo pró­stwje USA nastupajo wobdźělenje hišće doskónčnje rozsudźiła.

Napjatosće mjez USA a Iranom so mjez­tym dale přiwótřeja. Knježerstwo prezidenta Trumpa je přećiwo iranskemu wonkownemu ministrej Moham­medej Sarifej sankcije wukazał. Tak je sta­ćanam USA zakazane ze Sarifom wikować. Tón sarkastisce reagowaše: „Dźakuju so, zo maće mje za tak wažneho.“

Społnomócnjeny Zwjazka za turizm park błudźenkow wopytał

Wochozy (AK/SN). Strukturna změna ma ze zaměrnymi naprawami potrjechenych we Łužicy direktnje docpěć. „Za to so knje­žerstwo zasadźa, a to z dwěmaj za­­konjomaj. W septembru chcemy zakoń wo­sylnjenju struktury wobzamknyć. Wón rjaduje perspektiwy přichoda. Tamny zakoń­ ma kónc zmilinjenja brunicy organizować. Za wobaj zakonjej z połnej paru dźěłamy“, přilubi Thomas Bareiß, zapósłanc CDU w zwjazkowym sejmje, na swojim njedawnym wopyće we Wo­chožanskim parku błudźenkow. Bareiß je zdobom społnomócnjeny zwjazkoweho knježerstwa za naležnosće turizma. Zaměr wopyta bě, potrjechenych we łužiskim regionje syl­nišo sensibilizować.

Chětro napadny nalěpk na kófrje je paducha wačokow w ćahu přeradźił. So­bu­jěduca 26lětna parowaše swój kófer, po tym zo bě na nuzniku była. Železnicar, kotrehož wo tym informowaše, móžeše so dopominać, zo bě muž runje w Bad Oeynhausenje z kófrom z intercityja wulězł.­ Na to informowachu nawodu naslěd­neho ćaha. A woprawdźe: W regionalnym ekspresu do Hamma železnicar wopisany wačok nańdźe. W Hammje policija­ paducha hižo wočakowaše. Kófer su žonje mjeztym zaso wróćili.

Cyłu kuchnju pokradnyli su njeznaći mu­žej w Hornjej Frankskej. Muž bě kuch­nju při přećahu do druheho bydlenja nachwilnje na chódniku wotstajił. Jako chcyše ju po štyrjoch hodźinach bjez dohlada do noweho bydlenja dowjezć, bě kuchnja fuk. Wona měješe po informaciji wobkradnjeneho hódnotu 500 eurow.

Mnichow (dpa/SN). W aferje manipulowanych dieselowych awtow dla je Mnichowske statne rěčnistwo něhdyšeho nawo­du koncerna Audi Ruperta Stadlera wobskoržiło. Jemu a třom dalšim wobskorženym wumjetuja „jebanstwo, falšowanje wopismow a chłostajomne wabjenje“, statne rěčnistwo zdźěla. 56lětnemu Stadlerej wumjetuja, zo je wot lěta 2015 wo manipulowanjach wědźał, ale při­wšěm awta dale předawał a za nje wabił. Hač proces zahaja, rozsudźi sudnistwo.

Něšto wjace bjezdźěłnych

Nürnberg (dpa/SN). Ze zahajenjom lětnjeje přestawki je ličba bjezdźěłnych w Němskej snadnje na 2,275 milionow rozrostła. To je 59 000 wjace hač w juniju a 49 000 mjenje hač před lětom, kaž Zwjazkowa agentura za dźěło dźensa informuje. Kwota bjezdźěłnosće je wot 4,9 na 5,0 procentow přiběrała. Wjetša bjezdźěłnosć w juliju je typiski zjaw, tež wosłabjaca so konjunktura pak so wuskutkuje, zdźěli čłon předsydstwa agentury Daniel Terzenbach nowinarjam.

Elektro awta spěchować