To a tamne (24.03.21)
Pobrachowaceho podpisma dla dyrbja na Augsburgskim krajnym sudnistwje wobšěrny proces přećiwo wikowarjej drogow znowa přewjesć. To je Zwjazkowe sudnistwo rozsudźiło. Krajne sudnistwo bě wobskorženeho loni w juliju po tydźenje trajacym jednanju k wosom lětam jastwa zasudźiło. Bjezposrědnje po procesu bu hłowna sudnica do Mnichowa přesadźena, a na wućišćanym wusudźe pobrachowaše jeje podpismo. Bjez tajkeho pak wusud njepłaći.
Zwady mjez bratrom a sotru dla dyrbješe mać w Lindauwje nad Bodamskim jězorom policiju wołać. Razne rozestajenje wudyri, po tym zo bě mać internet w bydlenju wotpinyła. 15lětny 18lětnu sotru masiwnje za włosy ćahaše. Policija jeho nachwilnje sobu wza, zo njeby swoju sotru dale nadběhował. Přećiwo njemu nětko ranjenja ćěła dla přepytuja.
W Israelu zaso wolili
Jerusalem (dpa/SN). Hižo štwórty raz w běhu jenož dweju lět su wobydlerjo Israela dźensa nowy parlament wolili. Něhdźe 6,6 milionow wólbokmanych smědźeše swój hłós jednej z něhdźe 40 lisćin dać. Kaž běchu poslednje naprašowanja wujewili, móhła strona Likud ministerskeho prezidenta Benjamina Netanjahuwa najebać straty wólby dobyć. Wosebje organizowaneje šćěpjenskeje kampanje koronawirusa dla Benjamin Netanjahu mjez wolerjemi tuchwilu připóznaće žněje.
Chcedźa wo přičinach rěčeć
Bonn/Hannover. Katolska cyrkej w Němskej chce tež k jutram prezencne Bože mšě zmóžnić. Přeće Zwjazka a krajow so toho wzdać zamołwitych překwapja, zdźěli dźensa předsyda Němskeje biskopskeje konferency Georg Bätzing. Jutry su najwažniši swjedźeń křesćanow. Tež Ewangelska cyrkej w Němskej je připowědźiła, zo chce sej přičiny rozsuda wot zwjazkoweje kanclerki najprjedy raz jasnje rozkłasć dać.
Dźesać ludźi zatřělił
Najebać mjenje spadkow w awstralskim zwjazkowym kraju New South Wales ...
Radikalny lockdown přez jutry
Berlin (dpa/SN). Hladajo na drastisce přiběrace ličby natyknjenych z koronawirusom su so Zwjazk a zwjazkowe kraje wčera na přiwótřeny radikalny lockdown přez jutry dojednali. Wot 1. do 5. apryla, takrjec wot zeleneho štwórtka hač do jutrowneje póndźele, budźe zjawne, priwatne kaž tež hospodarske žiwjenje w dalokej měrje zastajene, zo bychu třećej žołmje pandemije zadźěwać móhli. To připowědźichu dźensa w nocy zwjazkowa kanclerka Angela Merkel (CDU) a ministerscy prezidenća krajow.
Hižo dlěje hač tři měsacy trajacy lockdown budźe wo dalše tři tydźenje hač do 18. apryla podlěšeny. Angela Merkel wopodstatni radikalny lockdown z eksponencielnje přiběracymi ličbami koronainfekcijow a z přećeženjom intensiwnych stacijow kaž tež z wupřestrěćom dalšich wariantow koronawirusa.
Ratarjo znowa protestowali
Berlin (dpa/SN). Plany zwjazkoweho knježerstwa k škitej překasancow mjez ratarjemi dale kritiku zbudźeja. Dźensa su woni tuž znowa ze swojimi traktorami do Berlina jěli, zo bychu tam swój protest zwuraznili. Šoferojo dyrbjachu tam ze zašlahanymi dróhami w nutřkownym měsće ličić. W samsnym času běše tež hišće awtokorso stawkowacych dźěłaćerjow metaloweje industrije předwidźane, k čemuž je dźěłarnistwo IG metal wobłuka Berlin, Braniborska a Sakska namołwjało.
Zwjazkowe knježerstwo je w februaru nowy zakoń namjetowało, kotryž zasadźenje rostlinoškitnych srědkow jasnje wobmjezuje. Ratarjo postupowanje kritizuja, bojo so mjenje wunoškow a wjace agrarnych importow.
Wotsrjedź januara hižo burja přećiwo zakonjej z tak mjenowanej napominanskej stražu blisko Alexanderoweho naměsta protestuja a prawidłownje ze swojimi traktorami do Berlina jězdźa. Za dźensniše zarjadowanje bě něhdźe 400 wobdźělnikow přizjewjenych.
„Wažny stołp kontinuity“
Kolokwij wo stawiznach biskopstwa ze signifikantnym serbskim podźělom
Drježdźany (SN/bn). Pod hesłom „Puće tworja profile – Katolska cyrkej w sakskej diasporje“ stej Drježdźansko-Mišnjanske biskopstwo a Institut za sakske stawizny a ludowědu składnostnje 100. róčnicy znowazałoženja diecezy třidnjowski wirtuelny wědomostny kolokwij wuhotowałoj. Wot minjeneho štwórtka hač do soboty je dohromady 19 teologow, stawiznarjow, sociologow a dalšich akademikarjow wo najwšelakorišich wobłukach nabožneho, historiskeho a towaršnostneho wuwića biskopstwa přednošowało a diskutowało. Přerěznje je něhdźe sto zajimcow referaty sćěhowało, mnozy z nich su so na slědowacych rozmołwach wobdźělili.
To a tamne (23.03.21)
Mrowje doma plahować dale a bóle přiběra. To wuchadźa ze šwicarskeje studije, kotraž bu nětko w fachowym časopisu wozjewjena. Hladajo na wikowanje su zwěrjeće družiny požadane, kotrež móža so w jim cuzych kónčinach lochce wupřestrěwać. Wědomostnicy trend wikowanja z mrowjemi hižo dlěje wobkedźbuja, ale so boja, zo so tak mnohotnosć družin poněčim zhubi.
Dweju wosebiteju hosći móžachu nětko w italskim Venedigu witać. Delfinaj stej po kanalu Grande a mjez druhim nimo znateho Markusoweho naměsta płuwałoj, a wonej so po wšěm zdaću derje čuještej. Delfiny we Venedigu njejsu scyła tak rědke, ale na wjele wobjězdźenych wódnych pućach wone skerje překwapja. Koronawirusa dla pak su kanale tuchwilu jara prózdne, štož nimo delfinow tež dalše ryby do nich wabi.
Mjez sobu so podpěrać a sylnić
Drježdźany (B/SN). Z modlitwu a mjezsobnym sylnjenjom hodźi so zmotanosć w tychle ćežkich časach přewinyć. Naša zhromadnosć je nětko wosebje wažna, namołwi krajny biskop ewangelsko-lutherskeje cyrkwje Sakskeje Tobias Bilz hłownohamtskich a čestnohamtskich cyrkwinskich sobudźěłaćerjow, za čas koronapandemije njespušćić zmužitosć. „Z Božej pomocu dobywamy nowe perspektiwy. Koronapandemija nas k tomu namołwja, so dopominać na žórła našeho duchowneho žiwjenja a je wužiwać“, piše biskop Bilz w lisće sobudźěłaćerjam w cyrkwi. „K tomu słušeja modlitwa, krutosć, čitanje biblije, wšelake wosobinske formy nyšpora a małe formaty Božich słužbow. Wone su wažna kótwica, hdyž so wšitko do prašenja staja.“
Za azyl Pakistanjana
Žadaja sej kodeks zadźerženja
Stuttgart (dpa/SN). Socialne křidło CDU je swoju stronu namołwjało, přikład CSU sćěhować a prawidła transparency za wšitkich nošerjow mandata zdźěłać. „CDU trjeba kodeks zadźerženja, zo bychmy konfliktam zajimow kaž w aferje nahubnikow dla zadźěwali“, rjekny Christian Bäumler, wiceprezident zwjazka křesćansko-demokratiskich dźěłopřijimarjow. CDU dyrbjała kedźbować, zo njepóńdźe so jej kaž italskej sotře Democrazia Cristiana, kotraž bě korupcije dla zašła. Bayerski ministerski prezident Markus Söder (CSU) bě připowědźił, zadźerženske prawidła zapósłancow přiwótřić.
Wjace ludźi na intensiwnej
Berlin (dpa/SN). Po prěnich kedźbliwych wolóženjach w koronapandemiji ličba pacientow na intensiwnych stacijach chorownjow zaso přiběra. Z wjace hač 3 000 wobsadźenymi łožemi je poćežowanje zaso tak wulke kaž w najhóršim času pandemije loni nalěto. To zdźěli zjednoćenstwo intensiwnych a nuzowych lěkarjow. Medicinarjo rěča wo „třećej žołmje na jara wysokim niwowje“.
Weil: Ludźo wučerpani
