Lipsk (dpa/SN). Sakski minister za wědomosć Sebastian Gemkow (CDU) je njewočakowano prěnje koło wólbow wyšeho měšćanosty Lipska dobył. Jurist nažnja 31,6 procentow hłosow a leži tak před tuchwilnym mějićelom zastojnstwa Burkhardom Jungom (SPD). Tón bě porno wólbam w lěće 2013 wjace hač dźesać proc. přisadźił a jeno 29,8 proc. dóstał. Dokelž njeje nichtó z kandidatow absolutnu wjetšinu docpěł, dyrbja wšitcy za štyri tydźenje do druheho koła.

Johnson nochce so wjazać

London (dpa/SN). Britiski premierminister Boris Johnson nochce so na žadyn pad ze zrěčenjom zawjazać prawidła EU za wobswětoškit, prawa dźěławych a statnu pomoc na dobro hospodarstwa, dodźeržeć. To wuchadźa z manuskripta narěče, kotruž chcyše wón w běhu dnja dźeržeć. Chcyše w njej mězniki swojich jednanjow wo přichodnych poćahach z EU prezentować. Njeje žaneje přičiny, wikowanskeho zrěčenja z EU dla tež jeje prawidła přewzać, Johnson zwurazni.

Poslednje přednoški

Waršawa (dpa/SN). Francoski statny prezident Emmanuel Macron je dźensa Pólsku wopytał. Prěni dźeń dwudnjowskeho wopyta wočakowaštaj jeho pólski statny prezident Andrzej Duda a ministerski prezident Mateusz Morawiecki. W srjedźišću rozmołwow stejachu pólsko-francoske poćahi, planowanje etata Europskeje unije za lěta 2021 do 2027 kaž tež klimowa a industrijna politika, kenclija Morawieckeho do wopyta francoskeho prezidenta zdźěli. Macron chcyše so tež z předsydomaj wobeju komorow pólskeho parlamenta zetkać. Jutře chce studentam Krakowskeje uniwersity wo poćahach mjez Pólskej a Francoskej přednošować. Je to prěni wopyt Emmanuela Macrona w Pólskej a prěni wopyt francoskeho prezidenta po lěće 2013. W dołhej přestawce wotbłyšćuje so měnjaty poměr mjez krajomaj.

Düsseldorf/Berlin (dpa/SN). Do dźensnišeho wjerškoweho zetkanja w kanclerskim zarjedźe niskich płaćiznow žiwi­dłow dla je nawoda rjećaza kupnicow Rewe Lionel Souque płaćizny žiwidłow zakitował. „W Němskej bydli něhdźe 13 milionow ludźi w chudobje abo na hranicy mjezy chudoby. Přijomne płaći­zny žiwidłow zmóžnjeja jim strowe a wěste zežiwjenje. To chcemy a mamy jako wikowarjo žiwidłow tež přichodnje zaručić“, rjekny manager powěsćerni dpa. Zwjazkowa kanclerka Angela Merkel (CDU) je wodźacych zastupnikow wikowanja dźensa na zetkanje k rozmołwje wo „fairnych płaćiznach“ žiwidłow přeprosyła. Ratarjo skorža, zo su žiwidła přetunje.

Mnichow (dpa/SN). Znowa su w Bayerskej corona-wirus pola čłowjeka zwěsćili, kaž tamnbiše strowotniske ministerstwo informuje. Tak je so ličba cyłkownych padow w tym zwjazkowym kraju na wosom powjetšiła. Natyknjeny 33lětny je runja tamnym schorjenym sobudźěłaćer předewzaća Webasto w Stockdorfje (Starnbergski wokrjes). Ministerstwo zdobom zdźěla, zo su wšitcy pacienća w strowotnisce stabilnym stawje.

Nowa chorosć płucow je sej w Chinje hižo wjace smjertnych woporow žadała hač epidemija sars před 17 lětami. Strowotniske ministerstwo w Pekingu je dźensa informowało, zo je dalšich 57 ludźi na corona-wirus zemrěło. Tak je ličba smjertnych woporow na 361 rozrostła. Ličba dopokazanych infekcijow dale raznje přiběra. Zamołwići w Pekingu rěča mjeztym wo wjace 17 200 padach, dalše žórła mjenuja 20 000 natyknjenych. W chinskej metropoli Wuhanje su dźensa nowu prowizorisku chorownju wotewrěli. W njej maja tysac łožow. Kompleks běchu w běhu dźesać dnjow natwarili.