ISS wostanje dale w swětnišću
Moskwa (dpa/SN). Mjezynarodna swětnišćowa stacija (ISS) móže po hódnoćenju ruskeho swětnišćoweho zarjada Roskosmos hišće hač do lěta 2030 bjez wulkich poćeženjow w swětnišću wostać. „Stacija funguje a tomu budźe tež hišće dalše dźesać lět tak“, zdźěli šef Roskosmosa Dmitrij Rogozin minjeny pjatk statnej agenturje RIA Nowosti. Najebać to, zo njeje hišće doskónčneho rozsuda hladajo na přichod ISS, su so potrjechene kraje na to dojednali, zo ma stacija 400 kilometrow nad zemju samo hač do lěta 2030 dźěłać.
ISS je mjeztym dwaceći lět w swětnišću. Hač do lěta 2024 Američenjo a Rusojo miliardy drohi projekt dale planuja. Podlěšić zhromadnu misiju, wo tym hižo dlěje rěča. Jedne z prašenjow je, hač techniski staw stacije podlěšenje scyła dowola. Wšako je material tež raz přetrjebany. To wšak prawidłownje přepytuja, Rogozin wujasni. Najnowše wuslědki přepytowanja maja srjedź lěta předležeć.
ISS je najwjetši wot čłowjekow twarjeny objekt w kosmosu, wobhospodarjeny wot mjezynarodneje kooperacije 16 krajow a pjeć swětnišćowych agenturow.
Mjenje plajtow
To a tamne (24.02.20)
Sobujěducy ptačk w Mnichowskej podzemskej železnicy je w interneće tójšto originelnych komentarow zbudźił. We wideju je widźeć, kak mały kakadu na kolenje swojeho wobsedźerja sedźo w podzemskej sobu jědźe. Něchtó z komentatorow měni: „Nadźijomnje ma ptačk pjeluški.“ Dalšim je kakadu dopokaz, zo so „kontrolerojo dźeń a lěpje tarnuja“, zo bychu čornojězdźerjow lepili.
Žortnje myslene přispomnjenje prezidenta awstriskeje hospodarskeje komory Haralda Mahrera na Wienskim Operowym balu je kritiku komunalnych politikarjow zbudźił. Žurnalistam bě Mahrer rjekł, zo pije w swojej wosobnej loži na balu „jenož mineralnu wodu, dokelž zlutniwje z čłonskimi přinoškami wobchadźa“. We Wienje su rozhorjeni, dokelž je Mahrer drohu ložu wotnajał, ze zjawnymi srědkami.
Nowy Zeleny wobchod nastawa
Pozitiwna bilanca Serbskeho sejma
Drježdźany (SN). Serbski sejm je prěnje lěto skutkowanja „prěnjeho swobodnje woleneho zastupnistwa Serbow“ pozitiwnje bilancował. Kaž w zdźělence sejma rěka, su „žadanja parlamenta z wobstatkom loni wujednaneho koaliciskeho zrěčenja sakskeho knježerstwa“. To nastupa mjez druhim „poskitk dialoga, rozšěrić samopostajenje serbskeho ludu, připóznać serbšćinu jako druhu cuzu rěč, zmóžnić kubłanje na maćernorěčnym niwowje a Serbow naležnje do strukturneje změny zapřijeć.“
Dale zapósłancy wčera w rumnosćach krajneje nowinarskeje konferency Sakskeho krajneho sejma podšmórnychu, zo „běchu rozmołwy z Domowinu hladajo na wuzwolenje čłonow serbskeje rady wuspěšne“. Nimo toho je sejm zwjazkowe knježerstwo namołwjał, na runinje UNO „wujednanu normu zakładnych prawow narodnych mjeńšin ILO 169 hišće w aktualnej legislaturje ratifikować“. Mjeńšinowy sekretariat w Berlinje je tele žadanje wobkrućił. Sejmikar dr. Měrćin Krawc wuzběhny, zo je „kulturna a kubłanska awtonomija lěpša hač tuchwilne derje měnjene cuzopostajenje“.
Tesla smě štomy dale pušćeć
Berlin (dpa/SN). Z protestom běchu wobswětoškitarjo docpěli, zo njesmě Tesla za planowanu fabriku nachwilnje žane štomy pušćeć. Wyše zarjadniske sudnistwo Berlin-Braniborska pak je wčera próstwu dweju wobswětoweju zwjazkow wotpokazało, lěs zachować. Wobzamknjenju sudnistwa njehodźi so znapřećiwić. Zwjazkaj matej postupowanje Tesle za njezakonske, dokelž twar fabriki hišće doskónčnje přizwoleny njeje. Wot dźensnišeho ranja přebywataj dwaj wobswětoškitarjej w lěsu na dotal njepostajeny čas.
Dojednanje njejasne
Brüssel (dpa/SN). Politikarjo a fachowcy 27 krajow Europskeje unije su cyłu nóc wo kompromisu nastupajo etat wuradźowali a njejsu so hač do ranja doskónčnje dojednali. Hač na tuchwilnym wosebitym wjeršku rozrisanje nańdu, njeje jasne. Wjeršk je so hižo wčera wječor z wulkimi diferencami započał. Tak njejsu sej wobdźělnicy hač donětka přezjedni, kelko, hač scyła a za čo ma EU pjenjezy wudać. Dojednać so je wosebje ćežko, dokelž hladajo na brexit britiske přinoški pobrachuja.
W Hamburgu njedźelu wola
Z peticiju so zaběrać
Na wopory spominali
Hanau/Berlin (dpa/SN). W mnohich němskich městach su ludźo wčera wopory atentata w Hanauwje wopominali. Zwjazkowy prezident Frank-Walter Steinmeier a jeho mandźelska Elke Büdenbender zetkaštaj so w Hanauskej radnicy z přiwuznymi woporow. Po tym staj zhromadnje z 5 000 ludźimi na morjenych spominałoj. „Dźensa je hodźina, w kotrejž mamy pokazać, zo towaršnosć hromadźe steji. Njedamy so zatrašić“, Steinmeier podšmórny. Po krawnym njeskutku 43lětneho Němca sej mnozy politikarjo wot strony AfD žadaja, přiznać, zo je sobu wina na prawicarsce motiwowanej namocy.
Pad z jědnaće mortwymi policiju dale zaběra, kotraž so mjez druhim praša, hač je něchtó wo planach atentatnika wědźał a jeho podpěrał.
Rozhłosowy popłatk drje zwyša
Berlin (dpa/SN). Rozhłosowy popłatk měł so po słowach komisije fachowcow wot januara 2021 wo 86 centow na 18,36 eurow měsačnje podróšić. Swoju rozprawu z poručenjom je komisija k zwěsćenju pjenježneje potrjeby rozhłosowych sćelakow (KEF) wčera w Berlinje zastupnikam zwjazkowych krajow přewostajiła. Woni maja w tej naležnosći poslednje słowo a maja doskónčnje wo wobjimje popłatka za sćelaki ARD, ZDF a Deutschlandradio rozsudźić. Poručenje komisije je zdobom směrodajne. Dotal płaća ludźo 17,50 eurow na měsac.
Zjawnoprawniskemu rozhłosej je popłatk hłowne žórło dochodow. Tón běchu w aprylu 2015 wot 17,98 na 17,50 eurow znižili. Wot toho časa njejsu jón změnili. Wo wobjimje popłatka rozsudźeja prawidłownje po štyrjoch lětach. Přichodna perioda traje wot 2021 do 2024. W lěće 2018 běchu z rozhłosoweho popłatka něhdźe wosom miliardow eurow wuzbytkowali. Za loni liča z podobnej sumu.
To a tamne (21.02.20)
Za čas dowola nad Sewjernym morjom 2012 bě tehdy 13lětna Paula blešu z powěsću do wody ćisnyła. Nětko wosom lět pozdźišo je ju wobydlerka kupy Langeoog namakała. Dźakowano socialnym medijam bu foto z powěsću 40 000 króć dale date, doniž tež Paulu z Badensko-Württembergskeje njedocpě. Kaž so wukopa, bě Paula blešu swój čas na samsnej kupje morju přepodała, hdźež bu namakana.
Miłe februarske temperatury su na tym wina, zo dźiwina w Berlinje nětko hižo wotuća. „Wjewjerčki, insekty kaž tež šupy k měrej njepřińdu“, rěka z tamnišeho wobswětoweho zarjada. Tež ptački w měsće hižo dwaj tydźenjej prjedy fifola hač hewak. Někotre samo hižo swoje hněžka přihotuja. Jeli nětko hišće raz mjerznje, móže to za dorost jara zlě wuńć. Wěste družiny zwěriny dźě su hač do měrca w zymskim sparje.
