Podstupim/Choćebuz (dpa/SN). Sta swětnišćowych fanow su wčera w planetarijomaj w Podstupimje a Choćebuzu start němskeho astronawta Alexandera Gersta k swětnišćowej staciji ISS sobu dožiwili. Raketa typa Sojuz z „astro-Alexom“ a dalšimaj astronawtomaj je krótko po 13 hodź. na swětnišćowym dwórnišću w kazachskim Bajkonurje wotlećała, štož originalnje wusyłachu.

W Podstupimskim planetariju Urania su wopytowarjo poslednje sekundy do starta zhromadnje wróćo ličili. Jako so raketa wot rampy pušći, wudyri aplaws. Nawoda planetarija Simon Plate je sej wěsty, zo su ludźo w prěnim rjedźe wosobiny Alexandera Gersta dla zahorjeni. „Wón je prosće super sympatiski astronawt.“ W Choćebuzu je wjace hač sto zajimcow wotlět rakety w swětnišćowym planetariju „Juri Gagarin“ wobkedźbowało. Dokelž běchu zastupne lisćiki za kuplu planetarija spěšnje wupředate, su w foyeru přidatne telewizory nastajili. Gerst leći we wobłuku misije „Horizons“ hižo druhi króć k ISS. 41lětny geofyzikar budźe druhi Europjan, kiž staciju ISS nawjeduje. Misija traje pjeć měsacow.

Znateho krosnowarja po fasadach Alaina Roberta (55) su zajeli, jako tón spyta, bjez kóždeho zawěsćenja na wysokodom w juhokorejskej stolicy Seoulu zalězć. Na 77. poschodźe 555 metrow wysokeho Lotte World Towera bě krosnowanje za chrobłeho Francozu po dwěmaj hodźinomaj skónčene. Z wisatej platformu dowjezechu jeho na třěchu 123poschodoweho twarjenja. Policija jemu wumjetuje, zo njeje wobsedźerja mróčeloškrabaka do swojeje akcije wo dowolnosć prosył.

Z cirkusa ćeknjeny elefant je so po porynsko-pfalcskim Neuwiedźe přechodźował. Při tym so ani awtow ani pěškow njeboješe. Zwěrjo bě měrne, a sobudźěłaćerjo cirkusa móžachu je bjez problemow zaso wróćo wjesć. Prawdźepodobnje bě elefant elektriski płót swojeho wobhrodźenja roztorhał. Jeho puć na swobodźe wšak bě runje kilometer dołhi.

Berlin (dpa/SN). Prěni króć za čas swojeho zastojnstwa je zwjazkowa kanclerka Angela Merkel (CDU) dźensa w zwjazkowym sejmje na prašenja zapósłancow wotmołwjała. Dotal njebě so žadyn knježerstwowy šef do tajkeho koła prašenjow a wotmołwow podać trjebał. Woprašowanje je wobstatk koaliciskeho jednanja mjez CDU, CSU a SPD a ma so wotnětka trójce wob lěto přewjesć.

Senat koaliciji přihłosował

Rom (dpa/SN). Senat w Romje je nowemu italskemu knježerstwu dowěru wuprajił. Cyłkownje 171 parlamentownikow je wčera wječor populistisku koaliciju skerje lěwicarskeho hibanja Pjeć hwězdow a prawicarskeje a wukrajnikow wotpokazowaceje Lega podpěrało. 25 senatorow so hłosa wzda, 117 wupraji knježerstwu njedowěru. Do toho bě ministerski prezident Giuseppe Conte wabił, „knježerstwa přewróta“ podpěrać. Dźensa měješe parlament wothłosować. Tam pak matej wobě stronje wjetšinu.

Wuprajenja złahodnjene